1 Tesalónica 5
5
1Wanaih balna, ma balna āna kidika dawak ma balna kidika niningkauh laih, manna yakat wauhtaya manaulnikna dini bik awaski. 2Manna yamni amanglatamana Dawan watwi kaiwarang kidika mani laih ismangnakattas mana kat kiwi kawarang ki, sihm di malyang as pukta kiwi kāwa kapat.#Mt 24:43; Lc 12:39; 2 Pi 3:10. 3Muih balna kidika aput yuyulwarang mani kat: “Di bitik laih kulnin aslah lani dawak alasna karak bik ki”, bahang kaldakadas kat witingna minitna yakat daukalnin kidika kaiwarang ki, sihm muih yal as muih karuk kat dalani balna#Is 13:8. dakawa kapat; dawak sip kiri yaklalawas karang. 4Kaunah wanaih balna manna laih, puksani yakat awasmana, Dawan kaiwarang mani kidika kaldakas mana kat manalaihna atnin sihm di malyang as kapat. 5Manna bitik mana laih yaringni dawak madah dini mana. Mayang laih pukta dawak puksani dini awas mayang; 6kidika bahang mayang laih muih ūk balna kakama kapat atnin awaski, kaunah sahmuhni atnin ki mamuihki yamni karak. 7Kakama muihni balna kidika laih, pukta yakat kakami, dawak wasak dadauwa balna kidika laih, pukta yakat wasak dadauwi; 8kaunah mayang laih madah muihni mayang kidika, mamuihki yamni atnin ki ma balna bitik yakat ban kaput. Kalmuknin ki rahm kulnin lani dawak dalani lani kidika karak bik, dawak muihni yakat nanitdaknin dini kidika kau bik manakitdakna atnin, laihwi yaknin lani kidika duna atnin yulni.#Is 59:17; Rom 13:12; Ef 6:13-17. 9Kat Papang yaklau wah dunin yulni maisihwaski, kaunah laihwi yaknin lani kidika laihna atnin Madakiwan Jisas Krais munah. 10Jisas Krais laih mayang mayulki dauna, sahmuhni atnin kidik awaskat dauna atnin, witing karak aslah yalahna atnin yulni. 11Kidika bahang, kulnamna dulautanauh dawak parasni kaltanauh biri biri, uman yamtamana kaput.
Pal yaklau wanaih balna yakatyul diyulna kidika
12Wanaih balna, kalmana dinit buktayangna manna pasmangna yakat wark yayamwa balna kidika yakat rispik yamna atnamna yulni, tunan duwi Dawan yulni balna manayuyulwa kidika. 13Uba palni dalani kaltalnamna ki, wark yayamwa kidika yulni. Biri biri kulnin aslah lani karak yalahtanauh.
14Wanaih balna di ūk bik yamnin manayuldi, wark kalalahwas muihni balna yakat biltanauh, kulninna bukna muihni balna kidika kulninna dulautanauh, parasnina dis muihni balna kidika yakat parasnina diatanauh dawak muih balna bitik yakat kulnamna laihwattanauh.
15Manna amung talnauh muih as bik muih ūk yakat dutni yulni dutni kalyamnin awaski. Nawatkauh, yamni kidika yamnin traitalnauh, manna pasyakat dawak muih balna bitik yakat bik.
16Ban kaput alasna awanauh.#Fil 4:4. 17Minit bitik yakat mamatna yultanauh. 18Di balna bitik yulni Papang yakat tingkih kalatanauh, kat witing manna Jisas Krais yakat kulyang muihni mana kidika kaupak dukih kalawa kidika laih kidika ki.#Fil 4:6; Col 4:2-7.
19Spirit kuhnipau kidika pipiwinih. 20Papang yuldibauwakat yul yuyulwa balna yulni kidika ruhmwi dadawinih. 21Bitik traini talnin yakat ātanauh dawak yayamni balna kidika laihwattanauh. 22Di dudutni balna bitik kaupak naikau alahwanauh.
23Kulnin aslah Papangni kidika yaklau, manna yakat holi manayamwarang, dawak muihmana nuhni bitik, spiritmana, sangmanaka kidika bik manana karang, dutni as bik dis, Madakiwan Jisas Krais kaiwarang kidika yulni. 24Kiunin yulna muihni kidika laih barangni ki, dawak adika dini bitik kaput yamna karang ki.
Parasnin lani balna dawakwitni blis yamna kidika
25Wanaih balna yangna yulkina bik mamatna yultanauh.
26Wanaih balna bitik yakat umnin holi as karak parastanauh.
27Yamnin manayultayang, Dawan parasni kau, wanaih balna bitik yakat adika wauhnitaya ulna adika yulta tala diatanauh.
28Madakiwan Jisas Krais yaklau manna mamatna yakat witing minikun talnin lani duwa kidika manana karang.
Currently Selected:
1 Tesalónica 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998