1 Samuel 3
3
Dawan yaklau Samuel yakat kalyulna kiuna
1Wahmabin Samuel laih Dawan dini yamwi tanitkat kiwadai Elí yaklau yamnin kalyulwa yakat. Kidika mani balna yakat dadasni palni dai Dawan yaklau muih as kau yul as kalyulna atnin kidika; ma balna bitik yakat laih awasdai muih as amana kau kapat sahmuhni talna atnin kidika. 2Kaunah Elí witing ma as kat, mahka minikpa kidika puklakna manikat, witing payahnin pāni yakat kamatusdai. 3Samuel laih Dawan ūni yakat kalangna tusdai, Papang lani baksni tusdai kidika yaihnit yakat. Holi pāni awasni kidika laih tanitkat dahlwa sakdai. 4Kaput laih Dawan yaklau kalyulna:
—¡Samuel!
—¡Akat sakyang! —witing yaklau nangnitlana dai.
5Kidika usnit kat kiri kiunadai Elí sakdai yakat, dawi kalyulna dai:
—Akat sakyang; ¿ais yulni aiwinik yayultamahn?
Elí yaklau nangnitlana:
—Yang man yakat mayultasyang. Watta yawa alangwah.
Kaput laih Samuel nawatwi kiwi kalangna dai. 6Kaunah Dawan yaklau kalyulna dai:
—¡Samuel!
Dawak Samuel yaklauwi Elí yaihnityak kiwi yulna dai:
—Akat sakyang; ¿ais yulni aiwinik yayultamahn?
Elí yaklau nangnitlana:
—Yang walakibis, yang man yakat mayultasyang. Nawatta yawa alangwah.
7Samuel laih witing baisa Dawan yakat amanglawas dai, kat witing yakat baisa di as bik kalkalahwakat talwasdai. 8Kaunah wat bas yakat Dawan yaklau Samuel yakat kalyulna dai, dawakat yaklauwi Elí yakat kiwi kalyulna dai:
—Akat sakyang; ¿ais yulni aiwinik yayultamahn?
Bahang Elí witing amanglana dai Dawan yaklau kalyulwa kidika wahmabin yakat, 9bahang wahmabin yakat aput kalyulna dai:
—Yawa alangwah; Dawan yaklau mayulwarangkat, nangnitlama: ‘Yultah, man dima yamyang adika madakawi.’
Bahang Samuel nawatwi kiwi pāni yakat kalangna dai. 10Kidika usnit kat Dawan watwi kiunadai, taihwatwi sakkauna muhnilau kau kalyulna dai kaput kalyulna:
—¡Samuel! ¡Samuel!
Samuel yaklau nangnitlana:
—Yultah, dima yamyang adika madakawi.
11Dawak Dawan yaklau kalyulna:
—Israel tawanni yakat di as yamkiki angdika muihni dakawarangkat tapani kat bik dalawarangki. 12Kidika mani yakat, Elí kau kalyulnayang balna bitik kau laih bayakwas karangki, kaput yamnayang karang wanaihni balna yulnina. 13Witing yakat kalyulnayang wanaihni balna bitik kau wah diakiki ban kaput atnin, witingna dutnina yulni witing laih uman nuki; witing walanibis balna dutni palni yayamna kaput bik kidika witing laih dibilwaski. 14Kidika bahang, Elí witing wanaihni balna niningyakat pramis yamnayang witingna dutnina kidika laih sip bik uswi yakwas karangki, sakripais kau karang dawak bik minitdis kalanin dini kau karang bik sip uswi yakwas karangki.
15Adika bayakna usnit kat, Samuel kalangna dawak mapiris kat yaklauwi, dawi Dawan ūni dūrni balna kidika apahna dai. Samuel witing yamaduwa dai witing amana kau kapat sahmuhni talna kidika Elí yakat kalyulna atnin, 16kaunah Elí yaklau kalyulwak kiuna dawak kalyulna:
—¡Walakibis Samuel!
Witing yaklau nangnitlana:
—Akat sakyang.
17Dawak Elí yaklau kalyulwi dakana:
—¿Dawan yaklau ais palni kidika mayulnayah? Kalma dinit buktayang di as bik malta yayulwas atnah. ¡Papang yaklau parasni palni wah mana karang witing yaklau di balna bitik mayulna kidika yayultas awama kat!
18Samuel yaklau kidika yulni balna kidika bitik palni kalyulna, di as bik kalmalwas, dawak Elí yaklau sarahwi kalyulna:
—¡Witing kuduh Dawan! ¡Witing niningyakat angdika yamni talwakat kidika yamtah!
19Samuel laih barakna, dawak Dawan yaklau ilp kalawakat pranimis balna bitik kau yamna dai. 20Dawak Israel tawanni bitik kau, Dan kaupak Beerseba kat, muih balna kidika amanglalana dai Samuel kidika rahm palni Dawan pranipit as dai kidika. 21Dawakat Dawan yaklau watwi Silo yakat niningkana dai, kat kidika pāni yakat kuduh witing yulni balna kidika Samuel yakat niningkawa dai kidika;
Currently Selected:
1 Samuel 3: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
