1 Samuel 2
2
Ana unbauna
1Dawak Ana aput minityulna:
“Dawan, yang uba palni kulnik kau alasna makultayang.#Sal 113:5-9; Lc 1:46-55.
kat man lawa yang kau parasni wisasamni kidika yataman bahang.
Nikingkauh yaklalauwa balna niningnakauh sip yang yulbauna atnik
kat man lawa ilp yanaman kidika yulni.
¡Yang alasnayang!
2¡Dawan muih as bik holi awaski man kapat!
¡Yangna Papangkina man lawa nakitna daktaman kapat muih as bik diski!
¡Man kaupak muih ūk laih diski!
3Muih as bik witing manah kapat laih kaldakawi yulbaunin awaski,
muih as bik witing manah uba nuhni kaldakanin awaski,
kat Dawan laih Papang, witing di bitik amanglawi,
dawak witing yaklauwi muih al di yamwa kidika paun awi la kidika yamwi.
4Witing yaklau muih pararasni balna lasnina kidika bahwi,
dawak muih parasnina dis balna kidika yakat parasnina diawi;
5muhnilau kau minit bayak duduwa muihni balna dai kidika,
waradika laih plawar busna bahna as minit kalbakakanwi;
kaunah muhnilaukau yuh dadauwa dai kidika laih,
waradika laih yuh dadauwas ki.
Muih yal sip walabis duwasdai kidika,
waradika laih wat tiaskaubu praisni walabis duna ki;
kaunah walabis mahni palni duwa muihni dai kidika,
waradika laih dis palni kalna ki.
6Dawan yaklau sangnika kidika dakyakwi dawak bik watwi kalawi;
witing yaklau maiyamwakat sau ū yakat mahawi
dawak bik witing yaklau maiyakwi.
7Dawan yaklau mamikunni maiyamwi kidika awas bik di duyang maiyamwi;
witing yaklau maiyamwakat sau yakat bukdi dawak witing yaklau bik maidulauwi.
8Papang yaklau muih minikunni yakat laihwi dulauwi
dawak di yulyang muihni kidika di bubuh kaupak yakwi,
muih nunuhni balna karak yalahna atnin yulni
dawak bik kalawakat rispik pāni as duna atnin yulni;
kat Dawan kuduh witing didawan kidika
sau rahni balna kidika,
dawak kidika balna minityakat sau adika pāni kalana.
9Witing yaklau maintalwi witing usnit uiyang balna lapapakwa kidika,
kaunah dutni muihni balna kidika laih puksani pasyakat dadauwi,
kat parasni kidika niningyakat muih as bik minit bayakwas kidika yulni.
10Dawan yaklau witing niningkauh yaklalauwa balna yakat didaukalmukna karang,
dawak kisang kaupak alwana sihna karang witingna niningnayakat.
Dawan yaklau sau adika bitik yakat lani yamna karang;
dawak witing yaklau king walwi yakna yakat parasni kalana karang
dawak witing yaklau yamwakat parasni kidika bik nuhni kalnakarang.”
11Usnit kat Elcana laih mahka ūni kau kiunadai Ramá yakat, kaunah muihbin kidika laih Dawan dini yamwi watnadai sumalyang Elí ais yamnin kalyulna kidika karak.
Elí walanibis balna dutnina
12Elí walanibis balna kidika dutni muihni balna dai, dawak bik Dawan kidika yakat kukulwas dai 13dawak sumalyang balna dawi tawan muihni balna karak yamnin dini kidika bik kaput yayamwas dai; kat muih as yamwarang mani kat, sumalyang dini yamyang kidika tingni yakat park as duwi kiwadai dawak dimuihni kidika lahwa sakkat, 14park kidika kau suba pasyakat uhrawi dimuihni kidika yakwadai dawak park kau yakwa balna bitik kidika laih sumalyang dini dai. Israel muihni balna Silo yakat uiwa balna bitik kau kaput diyayamwa dai. 15Baisa kaput bik salani kidika sakripais busnin pāni yakat duwi uiwi bubuswas tanit yakat, sumalyang dini yamyang kidika kiwi dawi sakripais yamwarang muihni yakat kalyulwa dai: “Dimuihni apis yatangkat sumalyang yakat bustik kalakuh; kat dimuihni lahna kidika laih want awaski, kaunah sangka laihtakat.” 16Dawak sakripais yamwarang muihni kidika yaklau nangnitlawarang kat salani kidika tatuna busninna ki bahang kidika usnit kat witing ampus dunin kulwakat kaput duwarang kaltarang kat, sumalyang dini yamyang kidika yaklau nangnitlawadai: “¡Kaput awaski, waradika minitni yanam karangki! Kaput awaskarang kat, mataihtik namang yaknayang karang.” 17Kaput laih, adika wawahnima balna Dawan niningyakat dutni yayamwa dai kidika laih uba palni dutni dai, kat Dawan yakat minitdis kalanin dini balna yakat dauh yayamwa dai kidika yulni.
18Kaput laih, wahma Samuel kidika, linin asnina kana kidika yakat, Dawan warkni balna kidika tanitkat yamwi kiwadai. 19Dawak kurih kaiwa bitik yakat, nanangni kidika alni karak makat yulnin ūni yakat uiwa mani kat kurih as pasyakat sakripais as yamna atnin yulni, kalmuknin dini dibindauh as yamna kat uiwi kalawadai. 20Kaput laih Elí yaklau Elcana dawi yalni kidika karak blisdiyamwadai, aput yulwi: “Dawan yaklau baisa walamabis mawi mamat manakarang adika yalni kaupak, kat adika yal yaklau Papang yakat walabis as kalana kidika yulni.” Adika bayakna usnit kat ūnina yakat mahka nawatwi aina dai, 21dawak Dawan yaklau Ana yakat blis kalyamna dai, kaput laih witing kidika muihkaruk danadai. Kaput dawakat Ana kidika walabis ahal bas dawak yayal bu duna dai, dawak muihbin Samuel kidika laih tanit yakat barakwi kiwadai Dawan muhni yakat.
22Elí niningkauh laih uman muihbarak palni kalnadai, kaunah witing uman di balna bitik dakana dai walanibis balna yaklau Israel muihni balna yakat ais diyayamwa dai kidika, dawak Papang karak kalpaknin ūni kiukawa kau yayal wark kalalahwa balna kidika karak kalalangwa kidika bik dakana dai. 23Kaput bik manayultayang: “Muih bitik kau yayuyulwi manna dutni yamtamana kidika yulni. ¿Ais yulni kapat yamtamanah? 24Kaput awaski, walakibis balna, yang di as amanglatayang kidika yamni awaski Dawan tawanni muihni balna kidika yaklau manna yulmana yulwi awawaihwa kidika. 25Muih as yaklau ūk yakat dutni kalyamwarangkat, sip karangki Dawan yaklau ilpni kana atnin; kaunah muih as yaklau Dawan niningkauh dutni kalyulwarangkat, ¿wais yaklau tanit dakwarangyah?” Kaunah witing laih papangnina yaklau yul diyulna kidika kat dakakawas dadana, kat Dawan yaklau uman kulwi lanadai bahang sangnika kidika dakna dai.
26Kaput laih wahma Samuel kidika tanitkat barakwi kiwadai, dawak witing kulnin lani yamna kidika Dawan muhni yakat dawak muih balna muhnina yakat bik yamni palni tatalwa dai.
27Kidika mani balna yakat Prapit as Elí yakat kaltalna kiunadai, dawak kalyulwa: “Dawan yaklau adika yulni yulna: ‘Man muihmabararak balna Egipto sauni yakat bangkauna fero dini yayamwa dai kidika mani, laih palni yang lawik witingna yakat diyulnayang dai. 28Dawak Israel sulani balna paskaupak bitik yang lawik waltik yaknayang yang sumalkiyang balna atninna yulni, dawak bik sakripais yamnin pāni yang diki yakat sakripais karauni kauna busna atninna yulni, dawak busnin dini walapni yamni kidika bik busna atninna, dawak sumalyang prakni nuhni kidika bik yang muhki yakat duwi uininna yulni.#Ex 28:1-4. Kidika minit yakat man muihmabararak balna yakat dianayang Israel muihni balna minitdis kalanin dini Dawan risnipik kau bubuswa balna kidika bitik kau.#Lv 7:35-36. 29¿Ais yulni dauh tatalnayah sakripais balna kidika dawak minitdis kalanin dini balna kidika bik yang lawik yamnin yulnayang kidika? ¿Ais yulni walamabis balna kidika kauh tanit kultamanh yang karak dawakat, yang tawanki Israel yaklau minitdis kalanin dini baisa yamni yawa kidika kau salataman kidika?’ 30Kaput bahang, Dawan, Israel Papangni kidika yaklau yulna dai kidika man dawak sulama bik witing dini yamtanamaki atnadai kidika ban kaput atnin, waradika laih yulwi: ‘Manna yakat di as bik manatingkat yamtas awanamaki, kaunah angdika muihni balna yang akat rispik lani yayawa kidika balna yakat risninapik diana awakiki, dawak dauh yatatalwarang muihni balna kidika laih niningkarinin yakat bubukna karang. Yang Dawan yang adika lawik yultayang. 31Uman mani balna kidika kaiwi uliswi man parasma kidika dawak muihmabararak balna parasnina kidika bik daukalmukna atnik, dawak bik man sulama balna kidika kaupak as bik muihbarak kalwas karangki. 32Kulnam kidika kaidinin karuk dawak tumnin lani karuk bik talma yang lawik Israel tawanni yakat di yayamni balna bitik yamki kidika, dawak sulama balna kaupak as bik laih muihbarak kakalwas karangki. 33Kaunah man wanaihma balna kaupak as as laih dana awaki sakripais busnin pāni yang diki yaihnit yakat, witingna miniknapa kaupak tumnin lani kidika disna atnin yulni dawak sangninaka kaupak bik dalani kidika disna atnin, dawak sulama ūk balna kidika bitik kau bik ihina karang. 34Man yakat namangkanin dini as karang walamabis balna bu kidika yakat di as kalahwarang kidika, Ofni dawi Finees kidika balna yakat: witingna albupak ma aslah dadauna karang. 35Kidika usnit kat yang lawik sumalyang as yamni yakulwa muihni kidika ana awaki dawak bik yang kulnik lani kat yamna atnin muihni kidika, kidika muihni yakat sulani balna kidika tanitkat kalatingkat kiuna karang dawak yang lawik kalyamtingkat king as waltik yaknayang kidika dini yamna karang ban kaput atnin. 36Kaput bahang, man sulama balna kaupak sangka wawatna kidika balna aiwi witing muhni yakat abubukwarang lalah dadasni as minit kidik awaskat plawar busna as minit, kalni dinit bukwarang wark as kalana atnin yulni sumalyang balna pasyakat kaput karak witing kasnin dini kidika duna atnin yulni.’ ”
Currently Selected:
1 Samuel 2: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
