1 Samuel 4
4
1kidika usnit kat Samuel yaklau Israel muihni balna bitik yakat diyulna dai.
Filisteo muihni balna Papang lani baksni dakyayakna kidika
Kidika mani balna yakat filisteo muihni balna kidika kalbahahana dai Israel muihni balna niningna yakat dikalbauna atnin yulni,#4.1 Kidika mani balna...dikalbauna atnin yulni: grik kau ulna kidika laih kaput yulwi. Hibru kau laih kaput kalahwas ki. kaput dawak Israel muihni balna kidika kalalahna dai filisteo muihni balna niningna yakat kalbauna atnin, dawak Eben-ezer yaihnit yakat wawatna dai. Filisteo muihni balna kidika laih Afec yakat watwi ūnina labanni papakna dai, 2kawi uiwi Israel muihni balna yakat dikalbauna atnin yulni, dawak kalbabauwakat, filisteo muihni balna yaklau Israel muihni balna yakat minit bayayakna dawak witing kalbauyang muihni balna duwa kidika kaupak muih ahal 4,000 dadauna dai. 3Bahang Israel wārni kalbauyang muihni balna kidika ūnina labanni yakat nawatwi uina manikat, Israel muihnibararak balna yaklau yuyulna: “¿Ais yulni warmani Dawan yaklau dawakat filisteo muihni balna yaklau maikalbauwi mamikit bayayaknayah? ¡Silo yakat mawi Dawan karak kalpakwi la yamna lani baksni kidika duaidanang, kaput laih witing kidika mayang mapasking yakat lapakna atnin dawak mayang manikingkauh yaklalauwa balna kaupak bik mailaihwi yakna atnin yulni!”
4Kidika usnit kat Israel muihni balna yaklau Silo yakat kalbauyang muihni balna buas sisihna dai, dawak kidika yakaupak Dawan parasni bitik duwa karak kalpakwi la yamna baksni kidika duahaina dai, querubin balna minitna yakat tronni duwa kidika.#Ex 25:18-22; 1 Re 6:23-28; Sal 80:1; Is 37:16; Ez 1:26-28. Elí walanibis balna Ofni dawi Finees, witingna bik Papang karak kalpakwi la yamna baksni kidika karak kalpakwi uina dai. 5Dawak ū labanni yakat Dawan pranimis lani baksni kidika kiwi kana mani kat, Israel muihni balna kidika alasna manah parasni sararahwa kat sau kat bik isihna dai.
6Bahang kidika sarahna kidika filisteo muihni balna dakakana mani kat, yulwi dakakana dai: “¿Ais yulni hibru balna ūnina labanni yakat di dutni manah sakyah?” Kaunah amanglalawakat Dawan lani baksni kidika ū labanni yakat kiu'kana kat, 7yamaduduna dai dawak yuyulna: “¡Papang laih ū labanni yakat kai'kana ki! ¡Mayang laih mamikun palnih, kat di as bik waradika apat kalahwas dai! 8¡Mayang laih mamikun palnih! ¿Wais yaklau mailaihwi yakwarangyah adika Papang parasni bitik duwa adika tingni yakat bukdakat? ¡Witing kidika kuduh Egipto muihni balna yakat wah satni bitik kau didaukalmukna dai kidika kauhmak wanilang yakat! 9¡Kidika bahang, Filisteo muihni, kalbauyang ahalni balna kulnamna dadasni karuk kalbaunin dini kidika duta ridi alahwanauh, dawak kulnamna daihni karuk kalbautanauh usnit kat hibru balna dinina yamnamna awas yulni, sihm witingna yaklau manna dima yayamwa dai kapat!”
10Kaput laih Filisteo balna yaklau Israel muihni balna niningna yakat kalbauwi minitnatang bayayakna dai, kidika usnit kat witingna kiri ūnina labanni yakat uina dai. Muih ihina kidika laih mahni palni dai, kat Israel muihni balna walabis kaupak dadauna kidika bitik laih 30,000 muih dadauna dai. 11Dawak Papang lani baksni kidika bik dakyayakna, dawak Elí walanibis balna bu Ofni dawi Finees kidika bik ihina dai. 12Kaunah Benjamín sulani kaupak kalbauyang muihni as kiri yaklana dai kalbaunin paskaupak, dawak sihm kidika mani Silo yakat kiri kiuna dai. Prakni kidika iswi bisna dawak tunani kidika bik sau manah kiuna dai. 13Kiu'kana mani kat, Elí laih sini nuhni as kau dūr kung yakat yalahna kat ta kidika maintalwasak dai, kat uba palni kulwa dai Papang lani baksni kidika yulni. Kidika alni kidika tawan nuhni yakat kawi yul balna kidika yulna; kidika usnit kat tawan muihni balna kidika mahka palni sararahna dai. 14Sararahwa kidika Elí dakana mani kat, yulwi dakana dai:
—¿Ais yulniyah kidika di dutni manah kalahwa kidika?
Bahang kidika alni kidika yaklau sirihni palni Elí yakat kiwi yul kidika kalyulna, 15kat uman kurih 98 duwa dai dawak minikpa kidika bik di talwas palni kalna dai. 16Dawak kalyulna:
—Wisam palni war kalbaunin pāni kaupak aiwayang. Warmani war kalbaunin paskaupak irik lawanayang.
Elí yaklau yulwi dakana:
—¿Walakibis, ais kalahnayah?
17Yul duwi kiuna muihni kidika yaklau nangnitlana:
—Israel muihni balna laih filisteo balna niningna kaupak kikirana. Kidika minit yakat, muih mahni palni bik dadauna, kidika pasyakat walamabis balna Ofni dawi Finees kauna dadauna, dawak Papang lani baksni dai kidika bik filisteo muihni balna tingnina yakat bukna.
18Yul duwi kiuna muihni kidika yaklau Papang lani baksni atna mani kat, Elí laih dangsani bukna dai dūr yaihnit yakat, sini kaupak naikau, dawak uman muih al as muihbarak dawak bik tikini dai kidika yulni, dinimak panan kidika bahbukwi dauna dai. Bahang witing kidika kurih 40 pasyakat Israel muihni balna taninatuna dai. 19Witing unisah yal, Finees yalni, muihkaruk sakdai kidika, dawak bik muihbin dunin manah palni dai kidika, witing muihbin dunin dalani kidika kallaihna dai Papang lani baksni dakyayakna kidika dakana kat dawak unisah dawi witing alni kidika bik dauna kidika dakana mani kat; bahang dalani wauhwīnah muihbin duna dai. 20Dawak main kaltatalwa muihni balna kidika tatalwakat muih yal kidika dauwakat, kalyuyulna: “Yamaduwinih, kat muihbin albin as dunaman.” Kaunah witing yaklau laih nangnitna lawasdai dawak yulnina kat bik dakawas dai; 21-22dawak muihbin kidika ayangni pakna dai Icabod,#4.21-22 Hibru kau laih Icabod kidika yulni laih aput yulwa kidika kapat ki ¿Risnipik kidika angkat danayah? aput yulna: “Israel tawanni laih risnipik kidika dis watna, kat Papang lani baksni kidika dakyayakna kidika yulni.” Witingna karak kalpakwi yuyulwa dai la baksni dakyayakna kidika yulni dawak unisah dawi witing alni karak dadauna kidika yulni bik.
Currently Selected:
1 Samuel 4: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
