1 Samuel 13
13
Filisteo balna niningna yakat kalbaunin yaklauna
1Saúl laih muihbarak dai#13.1 Muihbarak dai: kaput wirlana kidika yamni kapat ki. Hib. kau ulna kidika laih Saúl ampus kurih king kana kidika ulwas ki. Israel yakat king kana mani kat; dawak king kana kaupak kurih buas#13.1 Kurih buas: kaput wirlana kidika yamni kapat ki. Hib. kau ulna kidika laih Saúl kurih ampus king kana kidika ulwas ki. duwa mani kat, 2Israel muihni balna pasyakat kalbauyang muihni 3,000 walwi yakna dai. Kalbauyang muihni 2,000 kidika laih witing karak wawatna dai Micmas yakat dawak Betel asangnipas yakat bik, dawak kalbauyang muihni balna ūk 1,000 kidika laih Jonatán karak wawatna dai Benjamín sauni Gabaa yakat. Muih ūk balna kidika laih Saúl yaklau dipakna dai ūnina kau nawatwi uina atnin. 3Jonatán laih kalbauwi minit bayakwas dana dai filisteo muihni kalbauyang balna Gabaa kau bangdai kidika karak kalbabauwakat, dawak filisteo muihni balna laih dakakana dai. Kaput laih Saúl muih sihna dai kidika sauni bitik yakat trumpit puhna atnin, hebreo muihni balna yakat isningnapaknin yulni.
4Israel muihni balna bitik dakakana Saúl laih kalbauwi minit bayakwas dana kidika filisteo muihni kalbauyang balna karak dawak kidika yulni filisteo muihni balna yaklau Israel muihni balna yakat dutni diyayamwa dai, kaput laih kalbauyang muihni balna kidika Saúl karak kalbahahana dai Gilgal pāni yakat. 5Filisteo muihni balna laih kalbahahana dai Israel muihni niningna yakat kalbauna atnin. Kalbaunin kārni manah 30,000 duduwa dai, aras kau kalbauyang muihni balna kidika laih 6,000 duduwa dai dawak kalkau lapakwi uiwa kidika laih mahni palni dai sihm kuma kauhnimak kapat. Usnit kat Micmas niningkauh uina dai dawak kidika pāni yakat ui'watwi ūnina labanni yayamna dai, Bet-avén kaupak ma kilwa niningkauh yakat.
6Israel muihni balna laih tatalwak sip awasdai, bahang kaput laih filisteo muihni balna yaklau dikalbabauna dai dawak witingna bik yakmaldininna dai pasulihni balna kau, pakudungni balna kau, kipala nunuhni walsah yakat, sau sahna balna yakat dawak pakudungni was butnin pāni balna kau bik. 7Witingna kaupak mahni#13.7 Witingna kaupak mahni: kaput ulna kidika yamni kapat ki. Hib. kau laih ulna dawak hibru balna. bik Jordán wasni kidika dakyaklalana dai, Gad dawi Galaad sauni niningyakauh; kaunah Saúl laih Gilgal yakat baisa watna kat sakdai, dawak kalbauyang muihni duwalikkidika bitik laih yamaduwi usnit uhuiwadai. 8Kidika pāni yakat Saúl tahana dai ma tiaskaubu, Samuel#1 Sam 10:8. yaklau ma yapak tahama kalyulna dai kaput; kaunah Samuel laih baisa Gilgal yakat kiu'kawas dai, dawak muih balna kidika laih mahka uiyamna dai. 9Bahang Saúl yaklau yamnin dipakna:
—Tinglau balna duaita yatanauh sakripais karauni kauna busnin dawak Papang karak watwi yamni kalahna sakripais busnin kidika balna bik.
10Saúl witing sakripais karauni kauna kidika buswi dawa minitni yakat Samuel kiukana dai. Bahang Saúl laih kalahwi kiunadai kalparasna atnin yulni, 11kaunah Samuel yaklau kalyulna:
—¿Ais yamta kidika yamnamanh?
Saúl yaklau nangnitlana:
—Talingkat muih balna kidika mahka uiyamwakat, man ma anaman yakat yawasman kat, dawak filisteo muihni balna bik Micmas yakat kaluduhna bangkat, 12yang kulnayang Gilgal yakat yaklakwi yakalbabauwarang, baisa Dawan tingni yakat atik datasyang kat; kidika bahang talingkat yang lawik sakripais karauni kauna kidika busnikdai.
13Samuel yaklau nangnitlana:
—¡Adika yamnaman kidika laih sinsma diski! Dawan yaklau yamnin mayulna kidika yakat yamnaman katlaih, Israel yakat king awanaman kidika ban kaput atnin mayulwitdai. 14Kaunah waralaih, man kingma lani kidika ban awas karangki. Dawan yaklau muih al as walwarang witing yamni talwa muihni kidika#Ap.w 13:22. dawak tawanma kidika tanituna ana karang, kat man laih, witing lani mana kidika yakat yamtas danaman bahang.
15Usnit kat Samuel laih Gilgal kaupak mahka kalahwi kiuna dai tanit yakat kiuna atnin. Kalbauyang balna ūk kidika laih Saúl yakat usnit uiwi uina dai kalbauna atnin yulni, dawak Gilgal kaupak ui'kakana dai#13.15 Tanit yakat kiunin atnin...dawak Gilgal kaupak ui'kakana dai: grik kau ulna kidika kaput yulwi. Hib. kau laih adika yulni kalahwaski. Benjamín sauni Gabaa yakat. Kidika pāni yakat Saúl yaklau kulwi talna dai kalbauyang muihni balna witing karak bangkidika, dawak kulwi talna kat muih ahal 600 bangdai. 16Saúl dawak walanibis Jonatán dawi kalbauyang muihni balna witingna karak uiwabangdai kidika kauna, Benjamín sauni Gabaa yakat wawatna dai, dawak filisteo muihni balna laih Micmas yakat watwi ūnina labanni papakna dai, 17filisteo muihni kalbauyang balna ūnina labanni kaupak uduhna bas kalalahna dai karang bik; uduhna as kidika laih Ofra niningyakauh kiuna dai, Sual sauni yakat, 18uduhna ūk kidika laih Bet-horón niningyakauh kiunadai, dawak uduhna bas kidika laih asang ubulni#13.18 Asang ubulni: grik kau laih kaput yulwi. Hib. kau laih yulwi sauni lainni kiwi watwa. niningyakauh kiuna dai Zeboim asangni sar minitkauh kilkiwa yakat, kauhmak wanilang niningkauh.
19Israel sauni bitik yakat muih aslah bik ayan kau di yamyang sakawasdai, kat filisteo balna laih kukulwa dai hebreo muihni balna kidika isparah dawak langsa kapat bik yamwi sip awas ki. 20Israel muihni balna bitik laih filisteo balna yakat uininna dai sau tukninna dini kidika, sau kusnin ū kidika, kinina kidika, kidik awaskat piknina kidika buhwi baina atnin yulni. 21Sau tuknin dini kidika dawi sau kusnin ū kidika karak buhwi bainin karang kat siclo#13.21 Siclo: talah Paun anin, lalah dawak kulwi talwa balna kidika yakat. sahyakna bās kaupak bu kidika didadakwadai, dawak ki balna kidika dawi pik sutni subangni kidika buhwi baina atnin laih lalah sahyakna bas kaupak as kidika didadakwadai. 22Kidika bahang Saúl dawi walanibis Jonatán karak bangdai kidika muihni balna laih as bik isparah kapat kidik awaskat langsa kapat dis bangdai kalbaunin mani yakat. Witingna albulah duwatuludai. 23Kaput laih, filisteo muihni kalbauyang muihni balna kidika Micmas niningyakauh uina dai.
Currently Selected:
1 Samuel 13: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
