1 Samuel 14
14
Jonatán kalbauwi minit yakna tanit yamni as kidika
1Ma as kat Jonatán Saúl walanibis kidika yaklau, tingnisut laihyang yakat kalyulna:
—Aiwang was nakas yakat madaklawi dadi filisteo muihni kalbauyang uduhna as bangkidika yakat kalbaudang.
Kaunah Jonatán witing adika dini papangni yakat di as bik kalyulwas dai, 2asang ubulni as kau#14.2 Asang ubulni as kau: aput bik wirlanin sipki: Gabaa sauni kiwi watwa yakat. ūni labanni yamna dai kidika, granado panan as dinitkau, kidika pāni yakat kidika plawar minik unitak yayakwa dai, bahang kidika yakat kalbauyang muihni manah 600 karak kalpakna bangdai. 3Sumalyang prakni nuhni kidika duwi kiunin muihni laih Ahitob walanibis Ahías dai, Silo kau Dawan sumalniyang Elí walanibis Finees walanibis Icabod walasni.
Muih balna laih amanglalawasdai Jonatán kiuna dai kidika. 4Kaput bik witing kulwadai filisteo muihni kalbauyang balna uduhna as sakdai kidika yakat kiwi kana atnin. Witing kiunin tani kidika laih kipala nunuhni bu walsah yakat kiunin dai, kidika kinipala balna ayangnina laih Boses dawi Sene, 5as kidika laih ma kilwa niningyakauh sakdai Micmas muhnityakat, dawak ūk kidika laih ma kawa niningyakauh sakdai, Gabaa muhnityakat. 6Dawak Jonatán tingnisut laihwa muihni yakat kalyulna:
—Nakas yakat madakmawang, kalbauyang muihni Papang yakat kukulwas balna bangkidika kat. Dawan yaklau di as yamwarang bik awasyah mayang mayulki, kat witing niningkauh laih dadasni awaski minitbayaknin parasni kidika mayana atnin muih mahni karak karang kidik awaskat muih bulah karak karangbik.
7Tingnisut laihyang muihni kidika yaklau nangnitlana:
—Kulnam yakat ais yamnam kultaman kat bitik yaktah, kat yang laih kulnik aslah dulaunayang yamnin kultaman balna kidika yakat tingmasut laihna atnik.
8Bahang Jonatán yaklau kalyulna:
—Talah, nakas yakat madakmawarangki, muih ahal bangkidika yakat, dawak bik dadakat maitatalwarangki. 9Watta tahatanauh maiyulwarang kat, mayang raumayang akat yaklakwi aidadawak kau atwarang kat, mayang kidika yakat watdarangki dawak witingna bangkidika yakat laih mahilmawas karangki. 10Kaunah mahilmawinin maiatwarangkat, kaput yamdarangki, kat kidika laih sain as karang Dawan yaklau minit bayaknin mayawarang kidika.
11Bahang kaput laih, albupak dadawakat filisteo muihni kalbauyang balna ditatalna dai. Dawak talwi aput yuyulna dai: “Talnauh, hebreo muihni balna pasulihni paskau yakmamaldana dai kidika uman kalahwabangki.” 12Usnit kat sarahwi diyuyulna dai Jonatán yakat dawak tingnisut laihyang yakat bik:
—¡Yangna bangyangna akat ilaiwanauh, di as manayultanakiki!
Bahang Jonatán yaklau tingnisut laihwa muihni yakat kalyulna:
—Uskit uitah, kat Dawan yaklau Israel muihni balna tingnina yakat awarangki.
13Jonatán laih asang yakat kalkau, tingkau laihwi kilkiuna dai, witing usnit yakat tingnisut laihyang muihni kidika kilkiuna dai. Jonatán yaklau yamwakat sau yakat bukwi pipirhwa balna kidika laih, usnit kat tingnisut laihwa muihni kidika yaklau iwadai. 14Adika tuna kalbabauna akat, Jonatán dawi tingnisut laihyang muihni kidika karak kalpakwi sirihni palni muih ahal 20 ihina dai. 15Ū labanni yakat bangdai kidika dawak yaihnitkau bangdai kidika bitik palni laih yamaduduna dai. Kalbauyang muihni balna bik sihm yamaduduna dai. Kidika minitni yakat sau bik isihna dai, dawak muihsakdaunin bik nuhni palni kalahna dai.
16Mayakat kilwi Saúl mainkaltalyang balna, Benjamín sauni Gabaa yakat bangdai kidika, witingna tatalna dai filisteo muihni balna kidika pini awaih awaih kikirakat. 17Bahang Saúl yaklau kalbauyang muihni balna duwalikdai yakat diyulna:
—Walta talnauh mayang kaupak wais kidika dispa.
Walwi tatalna usnit kat Jonatán dawi tingnisut laihyang muihni kidika karak disdai. 18Dawak kidika mani sumalyang prakni nuhni kidika#14.18 Sumalyang prakni nuhni kidika: kidika awaskat: prak tingni kakahlni minitkau kawa: grik kau kaput ulna. Hib. kau laih yulwi lá baksni. Papang dini, Israel muihni balna pasyakat pakdai bahang, Saúl yaklau Ahías yakat kalyulna:
—Prak tingni kakahlni minitkau kawa Papang dini kidika akat duaitah.
19Kaunah Saúl dawi sumalyang karak yulbauwarau kat, filisteo balna ūnina labanni yakat laih sinsnina kidika baisa diswi nuhwi kiuna dai. Bahang Saúl yaklau sumalyang yakat kalyulna:
—Waralaih duaiwinih.
20Usnit kat Saúl dawi kalbauyang balna bitik kaluduhwi dawi kalbaunin pasyakat kawi uina dai. Filisteo balna pasyakat sinsnina disna kidika aput dai, biri biri kaliwi dislalana dai. 21Kidika minit yakat, hebreo muihni balna ma mahni filisteo balna karak bangdai kidika dawak bik witingna karak kalpakwi kalbauyang muihni kalalahna dai kidika, Israel balna pasningna yakauh bayayakna dai Saúl dawi jonatán karak kalpakna bangdai yakat. 22Dawak Israel muihni balna Efraín asangni balna kau pa duduna bangdai mani witingna dakakana dai filisteo muihni balna mahka kikira kidika, bahang witingna uiwi uina dai dikalbauna atnin. 23Kalbaunin kidika naiwi kiuna dai Bet-avén sauni kat, dawak Dawan yaklau Israel yakat laihwi yakna dai kidika mani.
Saúl pranimis
24Kaput bik, kidika mani Israel muihni balna disuhlakna bangdai, bahang muih as bik kasnin dini kaswi dakawas dai kat Saúl yaklau tawan muihni balna yakat pramis diyamna dai, aput yulwinah: “Yang nikingkauh yaklalauwa balna yakat baisa biritik diyamtasyang kat, angdika muihni baisa ma ulahwas yakat di as kaswarang kat, la kaltuhna karang.” 25Dawak kalbauyang muihni balna kidika asangpas as kau sau yakat amak sakdai yakat ui'wawatna dai. 26Muih balna kidika asangpas yakat kakana mani kat, amak kidika laih sihm was kapat kira dai; kaunah muih as bik diwi dakakawas dai, Saúl pranimis yamna kidika yakat yamaduduwa yulni. 27Kaunah Jonatán, witing papangni yaklau kalbauyang balna yakat pramis as yamna dai kidika dakawas yulni, tingni yakat pan as dukiwalik dai kidika kau sau yakat wauhlakwi sutni kidika kau amak uni as yakat sukyakwi datna dai, usnit kat alasna kalahna dai. 28Bahang Israel muihni kalbauyang balna yakaupak as yaklau kalyulna:
—Papangma yaklau kalbauyang muihni balna yakat pramis as diyamna, dawi yulna angdika muihni warmani di as kaswarang kat, la kaltuhna karangki. Kidika yulni muih balna kidika uba palni disuhlakna.
29Jonatán yaklau nangnitlana:
—Papangki yaklau nisan yakat kaldaukalna ki. Talah ampus kulnik alasna sakyang adik amakni kaupak apis ditik dakanayang usnit kat, 30dawak muih balna kidika laih kau baisa alasna kitdai warmani kakasna katlaih witingna niningnakauh yaklalauwa balna yakat didakyayakna dini kidika. ¡Dawak filisteo balna bubukna kidika laih ampus nuhni kitdaih!
31Kidika mani yakat Israel muihni balna yaklau filisteo muihni balna yakat kalbauwi minitnatang bayayakna dai, Micmas kaupak kalbauwi Ajalón kat uina dai. Kaunah Israel muihni kalbauyang balna kidika laih uba palni dilunglakna dai, 32kaput laih witni kat witing niningkauh yaklauwa muihni yakat dakyakna dini balna kidika laihwi duna dai, dawak sīp yayal balna kidika, turuh yayal balna kidika dawi turuh ahalmuk wawahma balna kidika bik laihwi, sau yakat lakwi dininamak dadakna dai dawak bik muihni ā manah yakauna kakasna dai. 33Kaunah as as yaklau Saúl yakat uiwi kalyuyulna dai:
—Muih balna kidika Dawan niningyakat dutni yamwabangki, kat dimuihni -ā duwa kidika yakauna kaswabangki.#Gn 9:4; Lv 7:26-27; 17:10-14; 19:26; Dt 12:16,23; 15:23.
Bahang Saúl yaklau yulna:
—¡Manna laih malni kau iyangmana! Kipala nuhni as piramta akat duaitanauh. 34Kidika minit yakat, muih balna karak yulbauta diyultanauh muihnina kat kat duaiwi yayawang tuninaruh almuk kidika kidik awaskat sīpnina yal kidika, manna lawa dininamak dakta kasna atnamna yulni, dawak manna dimuihni ā duwa kat kaswi Dawan niningkauh dutni yayamwinih.
Sihm kidika puknita yakat, muihnina kat kat tuninaruh almuk kidika duwi uina, dawak kidika pāni yakat dininamak dadakna dai. 35Saúl niningkauh laih, sakripais busnin pāni as Dawan yakat yamwi kalana dai, kidika tatuna yamwi kalana dai. 36Usnit kat Saúl yaklau yulna dai:
—Adika pukta malakwi filisteo muihni balna yakat uidanang dawak dinina maldi bitik imukdanang payahlawarah kat.
Bitik yaklau nangnitlalana:
—Angdika man namangyakat yamni talma kidika yamtah.
Kaunah sumalyang kidika yaklau yulna:
—Di as yamtasman tanitkauh, Papang yakat yuldi dakadanang.
37Bahang Saúl yaklau Papang yakat yulwi dakana dai:
—¿Filisteo muihni balna yakat uitik yawinik karangyah? ¿Israel balna tingnina yakat āmayah?
Kaunah kidika mani Dawan yaklau nangnitlawasdai. 38Kaput bahang Saúl yaklau yulna:
—Kalbauyang muihni balna taninatuna balna bitik akat aiwa walta talnauh angdika muihni yaklau warmani adika dutni adika yamnapa. 39¡Dawan ayangni kau pramis alahwayang, Israel laihwi yakyang muihni kau, yang walakibis Jonatán yamna karang bik, dauna atnin karangki!
Kalbauyang muihni balna pasyakat muih as bik nangnitlawasdai; 40kidika yulni Saúl yaklau Israel muihni balna bitik yakat diyulna:
—Adika nining-akauh akat manna lawanauh dawak nahas niningkauh kidika walakibis Jonatán dawi yang karak lāwanaki.
Kalbauyang muihni balna kidika yaklau nangnitlalana:
—Man namangyakat angdika yamni talaman kat kidika yamtah.
41Bahang Saúl yaklau parasni sarahwi yulna:
—Dawan dawak Israel Papangni, ¿ais yulni warmani man dima yamyang yakat nangnitlatasmahn? Dutni kidika yang yamnayang karang kat, kidik awaskat walakibis Jonatán kauh dutni yamna karang kat, suerte kidika ruhmtingkat Urim kidika kalahwarang; kaunah dutni kidika man tawanma Israel yamna karang kat, suerte kidika ruhmtingkat Tumim kidika kalahwarang.#14.41 Dawan dawak Israel Papangni...Tumin kidika kalahwarang: kaput ulna kidika yamni kapatki grik kau. Hib. kau laih S.d. adika yulni balna bitik ulwas ki.,#Nm 27:21; 1 Sam 28:6.
Suerte kidika Saúl dawi Jonatán minitna yakat bukna dai, dawak tawan laih dutni kaupak pri kalahna dai. 42Usnit kat Saúl yaklau yulna:
—Walakibis Jonatán dawi yang karak yayakta suerte kidika ruhmta talnauh.
Dawak suerte kidika Jonatán minityakat bukna dai, 43bahang Saúl yaklau Jonatán yakat kalyulna:
—Ais yamnaman kidika yulma yaktah.
Jonatán laih yulni yakna dai:
—Rahm kidika laih amak apis dattik dakanayang dai pan as tingki yakat duyawalikyang dai kidika sutnikau suktik. Kaunah akat sakyang, dauna atnik.
44Saúl laih parasni sarahwi yulna dai:
—¡Jonatán man dautas awamakat, Papang yaklau parasni wah yawarang!
45Kaunah tawan muihni balna laih Saúl yakat nangnitlalana:
—¡Ampadawakat Jonatán adika dauwarangyah, kat Israel yakat kalbaunin nuhni as minittang bayakwi kalana adika! ¡Kaput awaski! ¡Dawan ilpni kau, basni as bik tunani kaupak sau yakat bukwas karang! Kat warmani di yamna adika, Papang ilpni kau yamna.
Aput karak tawan yaklau Jonatán daunin kaupak laihwi yakna dai. 46Kidika mani Saúl witing filisteo muihni balna yakat uiwas dana dai, bahang witing watwi saunina yakat nawatwi uina dai.
47Kaput bahang, Saúl witing Israel kingni kana dai, dawak pa bitik yakat witing niningkauh yaklalauwa balna karak kalbauna dai, kidika balna laih adika dai Moab, Amón, Edom, Soba kingni kidika dawak filisteo muihni balna kauna. Dawak angkat angkat kiwarang bik, minitnatang bayakwa dai. 48Kalbauyang muihni uduhwi#14.48 Kalbauyang muihni uduhwi: satuk wirlanin kat: uba parasni diyamna. dawi Amalec niningyakat kalbauwi minittang bayakna dai, kaput karak Israel muihni balna yakat dilaihwi yakna dai dimalyang muihni balna tingnina kaupak.
49Saúl walanibis balna laih adika dai: Jonatán, Isúi dawi Malquisúa. Walanibis yayal balna laih adika dai: barakni kidika laih Merab dawak bin kidika laih Mical. 50Saúl yalni ayangni laih Ahinoam kaltadai, Ahimaas walanibis yal. Witing kalbauyang muihni balna duwa kidika taninatuna ayangni laih Abner kaltadai, Saúl papangni wirahni al Ner walanibis. 51Cis laih, Saúl papangni dawak Ner laih, Abner papangni, kidika balna laih Abiel walanibis balna ahal dai.
52Filisteo balna niningna yakat kalbaunin kidika laih dadasni palni dai Saúl sangnika bitik yakat; kidika yulni Saúl yaklau kalbaunin muihni balna dadasni dawak bik kulninna dadasni balna kidika manah yakwadai.
Currently Selected:
1 Samuel 14: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
