1 Samuel 12
12
Samuel yaklau kabamint kidika Saúl tingni yakat kalawi
1Usnit kat Samuel yaklau Israel muihni balna bitik yakat aput diyulna:
—Manna talnamana yang lawik manadakanayang ais yayulnamana bitik yakat, dawak bik king as atik mananayang. 2Kingmana akat sakki, witing yaklau tamatna kawarang kidika. Yang nikingkauh laih, yang uman muihbarak kalnayang dawak baski bik pihlana, dawak walakibis balna bik manna pasmangna yakat bangki. Yang kuduh manna tamanatuna āwanayang kidika wahmabin yang kaupak adika mani kat, 3dawak akat sakyang: Yang lawik turuh almuk kidik awaskat biriku almuk muih dini kat dunayang kat, kidik awaskat muih as kau taihnayangpa kidik awaskat dutni kalyamnayangpa, kidik awaskat kulnik dutni yang manah kapat kaldakanayang kat, manna sipmana Dawan muhni yakat dawak king as witing walwi yakna kidika muhni yakat bik yulki yakna atnamna, dawak yang lawik minit launa awaki ampus minit launik dutayang kat.
4Witingna yaklau yuyulna:
—Wat as bik yanataihtasman dawak dutni bik yanayamtasman dai, dawak kulnam dutni man manah kapat bik kaldakasman dai.
5Samuel yaklau yulna:
—Dawan dawi king as witing walwi yakna kidika bik witingna nuki manna lawa yang dutki as bik talasmana dai kidika.
—Rahm kaputki —atwi yuyulna.
6Kidika minit yakat, Samuel yaklau tawan muihni balna yakat diyulna:
—Dawan yaklau kuduh Moses dawi Aarón#Ex 6:26. munah warkni yamwi, manna muihmanabararak balna yakat Egipto sauni kaupak diyakna dai kidika. 7Kidika bahang manna ridi alahwanauh, Dawan muhni yakat manna karak kalbilkiki witing yaklau di yayamni yamwi manna yakat dawak muihmanabararak balna yakat bik diana kidika yulni. 8Jacob witing sulani balna kauna Egipto yakat uina mani kat Egipto muihni balna yaklau ditataihna dai,#12.8 Egipto muihni balna yaklau ditataihna dai: grik kau ulna kidika laih kaput yulwi. Hib. kau laih adika yulni kalahwaski. dawak muihmanabararak balna laih dutni dakawi Dawan#Ex 2:23. yakat kalyuyulna dai, dawak witing yaklau Moses dawi Aarón karak disihna dai, bahang witingna yaklau Egipto sauni kaupak diyakwi adika pāni akat duaiwi pa diayana. 9Kaunah witingna laih Papangnina Dawan yakat dinitnakahna, dawak witing yaklau Sísara,#Jue 4:2. tingni yakat -awi dana, Hazor kingni Jabín#12.9 kingni Jabín: grik kau ulna kidika laih kaput yulwi. Hib kau laih adika yulni kalahwaski. kalbauyang muihni duwa kidika taninatuna, dawak filisteo balna#Jue 13:1. tingnina yakat dawak Moab#Jue 3:12. kingni tingni yakat bik -awi dana, bahang kidika balna laih bitik yaklau witing niningyakat kalbabauna dai. 10Kaunah kidika usnit kat witingna Dawan muhni yakat laih kalalahna dai witingna dinitnakahwi dawan dauh Baal, dawak Astarté yakat ayangni tanit nuhni yayamna kidika, dawak kalni dinit yakat bukwi yuyulna witingna niningnakauh yaklalauwa balna kidika tingnina dinit kaupak dilaihwi yakna atnin, dawak bik pramis kalalahna witing yakat prinias yamna atnin.#Jue 10:10-15.
11“Usnit kat, Dawan yaklau sihna dai Jerobaal,#Jue 7:1. Barac,#12.11 Barac: grik kau ulna kidika kaput yulwi. Hib kau laih yulwi Bedán.,#Jue 4:6. Jefté#Jue 11:29. dawi Samuel#1 Sam 3:20. kauna manna namangnakauh yaklalauwa balna tingnina dinit kaupak manalaihwi yakna atnin yulni, kaput laihtakat manna kulnamna aslah lani karak yalahnamana dai. 12Kaunah manna laih amonita kingni Nahas yaklau manakalbauwarang kidika talnamana mani kat, king as yayulnamana dai tamanatuna kana atnin,#1 Sam 8:19. manna kingmana laih Papangmana Dawan kidika bik amanglatanauh. 13Kaunah manna king as walyakta dunamna kidika akat sakki. Dawan yakat king as kalyulnamana kidika manana. 14Waralaih manna Dawan yakat rispik kalyamta dawak prinias bik yamnamnaki, witing yulni kidika daka dawak lani balna kidika bayaknin awaski, dawak manna dawi kingmana tamanatuna kawa kidika karak yalahdanama Papangmana Dawan kulnin lani kat. Kaput laih tamatna yakat yamni yawanama. 15Kat yulni dakas data, dukih manawasdai kat, witing yaklau wah manawarang manna yakat dawak kingmana yakat bik.#12.15 Dawak kingmana yakat bik: grik kau ulna kidika laih kaput yulwi. Hibru kau laih yulwi manna muihmana bararak balna yakat.
16“Kaput bahang bangmana kidika kaupak kalititikwinih, dawak Dawan sainni nuhni manna mamaknapa walsah yakat yamwarang kidika talnama. 17Waradika plawar minik bahnin mani adika, was lauwas ki, ¿rahm awasyah? Bahang yang lawik Dawan kalni dinit yakat buktik kalyulki dawak witing yaklau alwana dawi was karak sihna karang, manna amanglata tanka dunamna yulni, kat Dawan talwi manna king as yulnamana kidika uba palni dutni yamnamana.”
18Kidika usnit kat Samuel yaklau Dawan yakat kalni dinit bukwi yulna, dawak kidika minitni yakat witing yaklau alwana dawi was sihna; bahang tawan muihni balna bitik laih uba palni Dawan yakat dawak Samuel yakat bik yamaninaduduna. 19Kidika yulni, bitik yaklau Samuel yakat kalyuyulna:
—Papangma Dawan yakat kalni dinit buktah man dima yamyang balna adika yulni, daudas atnin yulni; kat bitik dutkina yulni king as yulnayangna.
20Samuel yaklau nangnitnalana:
—Manna yamaduduwinih. Rahmki manna uba palni dutni yamnamana; kaunah waralaih Dawan kaupak naikau kalalahwinih, kaunah ismangna bitik palni prinias yamtanauh. 21Dawan dauh balna yakat usnitna uhuiwinih, ilp mananawas dawak bik manalaihwi yayakwas balna yakat kat, witingna laih dawan dauh balna bahang. 22Bahang Dawan laih, witing ayangni yakat risnipik yamwi, manaruhmwi manadawas karang; kat witing dukih kalawi manna kidika witing tawanni atnamna. 23Yang nikingkauh laih, Dawan yaklau yalaihwi yakwang witing nining yakat dutni yamtayang kidika kaupak, manna yulmana witing kalni dinit buktayang kidika kaupak datayang kidika. Tanit yamniki, yang lawik manasumalna awaki amput yamni dawak barangni atnamna kidika. 24Manna laih Dawan yakat manah rispik kalyamnamnaki, rahm karak dawak sangmanaka bitik palni karak bik prinias yamnamnaki, witing yaklau manna yulmana di mahni palni yamna kidika kultinah. 25Kaunah manna dawi kingmana kidika bik dutni yamnamna kultanama laih manadaukalmukna karang.
Currently Selected:
1 Samuel 12: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
