1 Samuel 11
11
Saúl yaklau amonita balna yakat minitna bayakna
1Amón kingni Nahas kidika Jabes Galaad yakat kiuna dai dawak kalbauyang muihni balna kidika ridi yamna dai tawan nuhni yakat kawi kalbauna atnin. Kaunah Jabes muihni balna yaklau kalyuyulna:
—Yangna karak pramis as yamtah, dawak yangna laih man kalma dinit buktanaki.
2Amonita muihni Nahas kidika yaklau nangnitlana:
—Manna karak pramis as yamki, kaunah kulnin lani as kidika agha tinamakat, yang lawik manna bitik kau mamaknapa tingpal niningkauh kidika yakna atnik, kaput karak Israel muihni balna yakat niningna karana atnin.
3Kaput laih Jabes muihnibararak balna yaklau nangnitlalana:
—Bahang ma tiaskaubu praisni yatah kaput laih yangna lawik yul duwi uiyang muihni balna yaktik sihtanaki Israel sauni bitik yakat; dawak yangna ilpkina muih as bik kaiwas karang kat, man kalma dinit yakat buktanaki.
4Yul duwi uiyang muihni balna kidika Gabaa sauni yakat uiwi kakana dai, Saúl yalahwa dai kidika pāni yakat, dawak yul kidika muih balna yakat diyuyulna dai. Bitik laih dalani karuk kakaidana dai. 5Kidika minitni yakat, Saúl laih turuh ahalmuk balna karak asangpas kaupak nawatwi kaiwalikdai, dawi yulwi dakana:
—¿Ais dilaihnayah muih balna yakat? ¿Ais yulni kakaidih?
Muih balna yaklau kalyuyulna Jabes kaupak muih ahal yul duahaina dai kidika. 6Kidika yulni Saúl dakana kat, Papang spiritni kidika witing muihni yakat kawi laihwi duna dai; dawak Saúl laih kulnin daukalna dai. 7Bahang turuh ahalmuk bu duwi ina dai, dawak dimuihni dakna balna kidika yul duwi uiyang balna tingnina munah sihna dai Israel sauni bitik yakat. Dawak yul duwi uiyang balna kidika yuyulwa dai: “Sihm adika aput yamwarangki Saúl dawi Samuel yakat aslah kalahwi usnit uhuiwas muihni balna tuninaruh ahalmuk balna yakat.”
Kaput laih muih balna yakat yamadunin nuhni dilaihna dai, dawak sihm muih al aslah kapat kalahwi aslah kalalahna dai. 8Dawak Saúl yaklau muih balna kidika kulwi talna mani kat Bezec sauni yakat, Israel kaupak 300,000 muih kalududuhna dai dawak Judá kaupak laih 30,000 muih kalududuhna dai. 9Kidika usnit kat yul duwi uiyang muihni balna uina dai yakat diyulna:
—Jabes muihni balna yakat diyultanauh yahan mani matunak kat dilaihtik yakna awanaki.
Yul duwi uiyang muihni balna kidika uiwi Jabes muihni balna yakat adika yulni diyuyulna, kaput laih witingna alasna palni kalalahna dai. 10Dawak Nahas yaklau kalyulna:
—Yahan mani man tingma yakat āwanayangna karang, yangna yakat ais yanayamnam yamni talma kidika yakat yamnam yulni.
11Kidika payahwakat, Saúl yaklau kalbauyang muihni balna kidika uduhna nunuhni bas sahyakna dai, dawak baisa payahlawas kau witingna niningnakauh yaklalauwa balna ūnina labanni yakat ui'kawi amonita muihni balna yakat kasak palni ihina dai, kalbabauna kidika matunak kat dadana dai. Sangka wawatna balna kidika laih pini ruhwi dislalana as kat bik muih bu karak laih wawatwas dai. 12Usnit kat tawan muihni balna as as yaklau Samuel yakat kalyuyulna:
—¿Wais balna kidika rahm kulwas dadanayah Saúl laih mayang makingki atnin dai kidika? Kidika ahalni balna kidika yangna tingkina yakat yanatangkat imuktanakuh.
13Kaunah Saúl laih ilpnina kawi yulna:
—Adika mani akat muih as bik dauwas karang, kat Dawan yaklau warmani adika Israel yakat laihwi yakna kidika yulni.
14Dawak Samuel yaklau bitik yakat diyulna:
—Gilgal yakat mawanang king lani kidika dulauna atnin.
15Kaput laih tawan muihni bitik kau Gilgal yakat uina dai, dawak kidika pāni yakat, Saúl laih king ahana dai Dawan muhni yakat. Usnit kat Dawan yakat sakripais yayamna dai, Papang karak watwi yamni kalahna atnin yulni, dawak Saúl dawi Israel muihni balna bitik bik alasna palni kalalahna dai.
Currently Selected:
1 Samuel 11: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
