1 Samuel 10
10
Samuel yaklau Papang dini yakna Saúl kidika Israel kingni atnin
1Kaput bahang Samuel yaklau salani kidika batal as duwi Saúl tunan yakat utuhwi dawi kalyulna dai:
—Dawan yaklau warmani witing dini mayakwi witing tawanni Israel kidika kingni. Bahang man lawa king awa data dilaihta yakma witingna niningnakauh yaklalauwa muihni balna awaihdak duduwa kidika kaupak. Dawak traimatalnin kidika laih adika karang#10.1 Dawak traimatalnin...kidika laih adika karang: grik kau ulna kidika laih kaput yulwi. Hib. kau ulwas diski adika yulni. Dawan yaklau mayulna kidika witing tawanni kingni: 2Waradika yang kaupak dakta alahwama kidika yakat, Raquel sauni ūni yaihnit yakat muih ahal bu kalpakma, Selsa pāni, Benjamín sauni yakat. Witingna yaklau mayuyulwarang biriku yayal balna waltaman dai kidika uman yayakna, dawak papangma laih biriku balna yulnina kulwi kalbauwaski kaunah manna yulmana laihtakat kulwi kalbauwi, dawak yulwi dakawi ais yamninpa man yulma. 3Baisa tamatyakat, Tabor kirahni panan yakat yawa awama mani kat, muih ahal bas kalpakma kidika balna laih Betel asangni yakat kilwi Papang kau ayangni tanit nuhni yayamwi. As kidika kuts ahalmuk bas dukiwalikkarang, ūk kidika laih plawar busna bas dawak bas kidika laih di utak uni as kau wain puna kat dukiwalikkarang. 4Mapararaswarang dawi plawar busna bu mamawarang. Bahang mamawarang kidika duma. 5Kidika usnit kat Papang tawanni nuhni Gabaa yakat yawa awama, filisteo muihni balna kalbauyang muihni uduhna as sakkidika yakat. Tawan nuhni yakat awama mani kat, prapit uduhna as karak kalpakma, muihnina yakat spirit kana kat, holi pāni kaupak lakaiwabangkat. Witingna tanitna yakat muih aiwabangkarang paswi yakisdinin dini satni balna kidika yakisdīnah. 6Bahang kaput laih Dawan spiritni kidika man sangmaka yakat kawi laihwi duna karang, dawak man bik Papang yulni kidika yulma sihm witingna yuyulwa kapat, dawak bik al satuk kalnaman karang. 7Adika dini balna makalahwarang mani kat, ais yamnin kulnam yakat kaiwarang kidika yamma, bahang Papang yaklau parasni mana karang. 8Dawak Gilgal yakat bayakta yawah, man karak kalpaktik sakripais karauni kauna dawak bik Papang karak watwi yamni kalahna atnin yulni sakripais balna yamki kidika pāni yakat. Kidika pāni yakat ma tiaskaubu tahama angkat yang yawik datik ais yamnam dini balna kidika mayulki kat.
9Saúl witing sirihni palni Samuel kaupak kiuna yulni, Papang yaklau kulnin satuk wirlana dai; dawak kidika yamnin mani ana dai kidika yakat sain balna kidika bitik kalahna dai. 10Usnit kat, Saúl dawi dini yamyang al kidika karak Gabaa sauni yakat uiwi kakana mani kat, prapit uduhna as Papang yulni yulyang balna dai kidika karak kalpapakna dai. Bahang kaput laih Papang spiritni kidika Saúl sangnika yakat kawi duna dai, dawak witing laih Papang pranipit kalna dai sihm ūk balna kapat. 11Kaunah muhnilau kau kaltatalwa balna dai kidika, tatalwak Papang yulni yulyang kalna kat prapit ūk balna karak kalpakwi, biri biri yulwi dakakana dai: “¿Ais kallaihnayah Cis walanibis kidika? ¿Saúl bik sihm prapit as yah?”
12Dawak kidika muihni balna kaupak as minitlakwi yulna: “¿Dawak witingna papangnina kidika waisyah?” Kidika kaupak yulni as kidika kaiwi: “¿Saúl bik sihm prapit as yah?”#1 Sam 19:23-24.
13Prapit balna Papang yulni yulwi bayayakna usnit kat, Saúl laih ūni yakat#10.13 Ūni yakat: Kaput ulna kidika yamni kapatki. Hib. kau laih yulwi: holi pani yakat. kiuna dai. 14Dawak papangni wirahni al kidika yaklau diyulwi dakana witing yakat dawak dini yamyang al kidika yakat bik:
—¿Angkat yawanamanadaih?
Saúl yaklau nangnitlana:
—Biriku yayal balna dai kidika walna yawanayangna dai. Kaunah yaktas datik Samuel yakat talna yawanayangna dai.
15Saúl papangni wirahni al dai kidika yaklau nangnitlana:
—¿Dawak Samuel yaklau ais mayulnayah? Plisma palni yayultah.
16Saúl yaklau papangni wirahni al yakat nangnitlana:
—Laih palni yanayulna dai biriku yayal balna yayakna kidika.
Kaunah Saúl king kanin yulni Samuel yaklau kalyulna kidika laih kalyulwas dai. 17Usnit kat Samuel yaklau Israel muihni balna yakat yulwi uduhna dai, Mizpa sauni yakat kiwi Dawan ayangni tanit nuhni yamna atnin yulni; 18kidika pāni yakat diyulna dai:
—Dawan, Israel Papangni yaklau yulwi: ‘Israel muihni balna, yang lawik Egipto sauni kaupak manayaknayang, dawak Egipto muihni balna tingnina dinit kaupak dawak king ūk balna bik mataihwi manaduduwadai kaupak bik manalaihtik yaknayang.’ 19Kaunah waralaih manna Papangmana yakat dauh kaltalamana, tramanabil balna kaupak dawak kulta kalbautamana kaupak bik manalaihwi yakna kidika yakat, dawak bik yamni talas data king ūk awi mananin yultamana. Kidika yulni, waralaih Dawan muhni yakat sulamana balna kauna lawanauh.
20Usnit kat Samuel yaklau diyulna Israel sulani balna bitik kau kaluduhna atnin, dawak suerte kidika Benjamín sulani pasyakat bukna dai. 21Kidika tanit yakat diyulna Benjamín sulani balna kidika kaluduhna atnin, dawak suerte kidika Matri sulani pasyakat bukna dai, kidika kaupak suerte kidika Cis walanibis Saúl yakat kalbukna dai. Kaunah wawalna dawi sip yakwas dadana, 22kidika yulni watwi Dawan yakat yulwi dakakana, Saúl kidika muih bangkidika pasyakat sakpa. Dawak Dawan yaklau nangnitlana Saúl laih uman muih balna pasyakat sakdai, dawak di walsah yakat yakmaldana sakdai. 23Bahang kiri uiwi yakmamaldana sakkidika kaupak yayakna dai. dawak Saúl witing tawan muihni balna muhnina yakat yaklauna mani kat, witingna tatalna Israel muihni as bik salahni kaupak bayayakwas dai. 24Samuel yaklau bitik yakat diyulwi dakana:
—¿Manna uman talnamanah Dawan yaklau king as walwi yakna kidika? ¡Israel muihni as bik diski witing karak libitna atnin!
Israel muihni balna yaklau nangnitlalana:
—¡King kidika laih sangka ban kaput karang!
25Usnit kat Samuel yaklau king lani balna kidika tawan muihni balna yakat diyulna dai, dawak wauhtaya nuhni as kau ulwi Dawan pāni holi yakat atusna dai. Usnit kat Samuel yaklau bitik yakat diyulna mahka ūnina kau nawatwi uina atnin. 26Saúl bik sihm ūni mahka kiuna dai, Gabaa sauni yakat, dawak Papang yaklau muih kulninna dadasni duduwa balna yakat kulninna dulauwakat kalpakwi uina dai. 27Kaunah tunina dutni yuyulwas laih awasdai, bang yuyulna dai: “¿Dawak adika muihni yah mailaihwi yakwarang kidika?” Dawak kuihwas kalkulwi ayangni tanit nuhni yayamwas dai; kaunah Saúl laih amanglawas kapat yamna dai.
Currently Selected:
1 Samuel 10: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
