1 Samuel 9
9
Saúl dawi Samuel karak kalpapakna
1Benjamín sulani balna pasyakat al as likdai ayangni laih Cis, witing laih Abiel walanibis al dai, dawak bik Zeror māni dai; dawak buhni laih Becorat dai, Afía walanibis al. Cis laih rispik alni as dai, 2walanibis al wahma as duwadai kaput bik al pīsni yamni dai, ayangni laih Saúl. Israel pasyakat witing kapat al pīsni yamni ūk disdai, kaput bik naini niningyakat as bik salahni kaupak bayayakwas dai.
3Ma as kat Cis biriniku yayal balna didisna dai. Bahang walanibis al Saúl yakat kalyulna dai:
—Ridi alahwa data biriku yayal balna kidika walna yawah. Madiki yamyang balna kidika kaupak as duyawah.
4Bahang Saúl kiwi, Efraín sauni kidika bayakwi kiuna dawak Salisa sauni munah bik bayakna dai; kaunah biriku yayal balna kidika yakwas danadai. Kaput bik Saalim sauni munah bayakwi kiwi Benjamín sauni kidika bik bayakna dai dawak kidika bik sip yakwas danadai. 5Zuf sauni yakat kiwi kana mani kat, Saúl yaklau dini yamyang al as karak tuludai yakat kalyulna dai:
—Mayang nawatdi mawarangki, kat papangki laih mayang yakauh maikulwi kulnin bukwa kapatki biriku yayal balna kidika karak dawakat.
6Dini yamyang kidika yaklau nangnitlana:
—Adika tawanni nuhni akat prapit as sakki muih bitik yaklau rispik kalyayamwi, kat di balna yulwa kidika bitik rahm yakat kalahwi. Bahang witing yakat mawang, dawak sip karangpa witing yaklau maiyulna atnin angdika tani munah mawinin kidika.
7Bahang Saúl yaklau nangnitlana:
—Mawang, kaunah, ¿kidika alni yakat ais uidi kaladarangyah? Plawar busna kat bik diski bik balna yakat. Kalanin dini as bik dismayang prapit yakat.
8Dini yamyang kidika yaklau nangnitlana:
—Yang tingki yakat lalah dadasni dibindauh as dutayang. Prapit yakat kaladakat ta kidika manikingkana karang.
9(Sara manikau Israel muihni as Papang kau yulbaunin dukih kalawa mani kat, yulwa dai: “Di talyang kau mawang”; kat waralaih “prapit” ayangni duwa kidika, muhnilau laih ayangni kidika “di talyang” duwa dai.)
10Bahang Saúl yaklau yulna
—Yamniki. Bahang kidika yakat mawang.
Witingna albupak kalahwi tawan nuhni kau prapit yalalahwa dai kidika niningyakat uina dai, 11dawak asang labani yakat iluiwa tulu kat, tawan nuhni niningyakat, yayal sirarau buas was butna uiwa bangkat kalpapakna dai dawak diyulwi dakakana:
—¿Adika pāni akat yah di talyang karak kalpaknikna sip kidika?
12Yayal sirarau balna kidika yaklau nangnitnalalana:
—Agha, kaunah baisa tanityakau sakki. Sirihni palni yawanauh, kat tawan nuhni akat kaina kat warmani adika holi pāni yakat sakripais yamwi alasna yamnin mani kidika yulni. 13Manna kidika pāni yakat yawa awa kalwaltanama, holi pāni yakat di kasna kiwas tanitkauh. Muih balna kidika di kakaswas karang witing kiu'kawak kat kakasna karang, kat witing yaklau sakripais kidika blis yamwarang bahang, kidika usnit kat uina muihni balna kidika kakasna karang. Kidika bahang, waradika yawanauh, kat waradika palni yawanamakat sakkat kalpaktanama ki.
14Witingna laih tanitna yakat iluina dai, tawan nuhni niningyakat. Dawak sirihni palni tawan nuhni yakat ui'kawa bangkat, Samuel laih mahka holi pāni yakat kiuna atnin kalahkiwalik dai.
15Baisa Saúl kiwikawas ma as tanitkauh yakat, Dawan yaklau Samuel yakat adika niningkana dai: 16“Yahan mani sihm adika awarni kat, Benjamín sauni kaupak muih al as masihnayang karang, bahang witing kidika Papang dini yamyang karang yang tawanki Israel tanituna as kapat. Witing yaklau filisteo balna tingnina dinit kaupak laihwi yakna karang, kat yang tawanki kidika minikun kaltalnayang bahang witingna yulnina kidika yang tapaki kat kiu'kana mani kat.”
17Samuel witing Saúl yakat talna mani kat, Dawan yaklau kalyulna: “Muih al as yulni mayulnayang dai kidika waralaih tingma yakat sakki. Adika yaklau yang tawanki kidika kingni kana karangki.”
18Tawan kiu'kawa yakat sakkauna, Saúl yaklau Samuel yaihnit yakat kiwi dawi kalyulna:
—Plisma palni, man lawa nikingkatah angkat sakyah di talyang ūni kidika.
19Samuel yaklau nangnitlana:
—Di talyang kidika kuduh yang. Yang muhki yakat ilwah holi pāni yakat dawak kidika pāni yakat yang karak di kastah warmani. Dawak yahan mani ma baisa nangmatlana awaki ais yayulta dakama balna bitik kidika, dawak kidika usnit kat madatingkat mahka lapakna awama. 20Dawak birimaku balna didisna ma bas dawa kidika laih, witingna yulnina kulwi kalbauwinih kat uman yayakna. Kidika minit yakat, Israel tanit dukih kalawa kidika laih man karang dawak walamabis balna bik karang.
21Saúl yaklau nangnitlana:
—¡Kaunah yang kuduh Benjamín sulani kaupakyang, Israel sulani balna pasyakat sulani baisa dibin kidika! Kidika minit yakat, yang walakibis balna laih di dauh as ki Benjamín sulani balna kidika walaninabis karak dawakat. ¿Ais yulni kidika bitik yayultamahn?
22Kaput laih Samuel yaklau Saúl yakat dawak dini yamyang kidika kauna didukiwi ahni panuhni kau muih bangdai kidika pasyakat pa diana dai, kidika laih muih 30 bangdai. 23Kidika usnit kat Samuel yaklau di lahyang al kidika yakat kalyulna:
—Dimuihni daktik matik mayulnayang pa askau laksaknin, bahang waralaih duaitah dini muihni.
24Kidika minit yakat di lahyang al kidika yaklau di barahnimak karauni as yakwidawi Saúl yakat lakwi kalana dai. Dawak Samuel yaklau kalyulna:
—Waryakat sakki man dima yaktik danayang sakdai kidika. Lakta kastah, kat yang lawik man dima yaktik manayang dai adika mani tawan muihni balna yultik duainayang akat.
Kidika mani Saúl dawi Samuel karak di kakasna dai. 25Dawak holi pāni kaupak tawan nuhni yakat yalalahna mani kat, ū tuna yakat pa as ridi yayamna dai Saúl kalangna atnin, 26dawak Saúl laih kalangna dai.#9.26 Ū tuna yakat...Saúl laih kalangna dai: grik kau laih kaput yulwi. Hib. kau laih yulwi dawak Saúl karak yulbauna ū tuna yakat. Kidika payahwakat, Samuel yaklau Saúl yakat ū tuna yakat kalyulwak kiwak aput kalyulna dai:
—Lawa tamatyakat lapaktah.
Dawak Saúl yaklauna dai. Kidika usnit kat Saúl dawi Samuel karak ta yakat kalalahna dai, 27dawak tawan nuhni kidika kaupak ahni yakauh yaklawi uiwak Samuel yaklauwi Saúl yakat kalyulna:
—Dima yamyang kidika tatuna sihtang kat kiwang, dawak man laih apis tahatah, kat mayulnik karangki Papang yaklau yayulna kidika.
Currently Selected:
1 Samuel 9: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
