1 Kurint 9
9
Apostel as rahmni balna kidika
1Yang laih rahm pri lani dawak apostel rahmni balna kidika dutayang, bahang Madakiwan Jisas yakat talnayang,#Ap.w 9:3-6; 1 Kor 15:8; Gal 1:11-16. dawak manna kuduh yang Dawan warkni yakat alahwik manayaknayang kidika. 2Sip ki muih ūk balna niningna yakat laih yang adika apostel awas kapat yakulninna; kaunah manna laih yang ampatyang kat kapat yakulnamna ki, kat manna kidika Dawan yakat kulyang muihnimana kat, kidika yakat lāih yayakwi yang laih rahm apostel yang kidika.
3Adika ki yang lawik biri diyulnik yulni balna kidika yang nikingkauh yuyulwa balna yakat: 4Yang laih rahmki bitik dutayang di kasna atnik dawak bik dina atnik, 5dawak mamaridki bik as duna atnik kristian kat, apostel balna ūk, dawak Dawan wanaihni balna duduwa kapat dawak sihm Pita duwa kapat bik. 6¿Kidik awaskat Bernabé dawak yang karak laih rahmkina dis katpah tawan muihni balna yaklau mainyanatalna atninna? 7¿Wais kidika sihm soldado kapat witing alas dini balna minit lauwih? ¿Wais kidika wain yamak as kaupak wain minik yakwi kaswasyah? ¿Wais kidika sīp maintalwi taniwas tiriswa kidika kaupak diwasyah? 8Dawak manna kukulwinih adika laih sau muihni kulnin lani, kat Moses lāni yakat bik sihm yulwi. 9Bahang lā wauhnitaya yakat aput ulna: “Man wark tuniruh almuk plawar minik unitak yakwa kidika yakat tinpas sitwinih.”#Dt 25:4; 1 Tim 5:18. Dawak Papang laih wark tuniruh balna kidika yulnina kulwi kalbauwa laih awas ki, 10kaunah yangna yulkina kulwi kalbauwi. Kat lā kidika laih yangna yulkina ulna, kaput bahang sau tukwa muihni kidika dawak di minik unitak yakwa muihni kidika bik witingna tahanin lani karuk yamninna ki di minik kalahwarang kidika kaupak duna atnin yulni. 11Kaput bahang, yangna lawik manna pasmangna yakat spirit niningkauh minik as dahnayangna kat, manna kaupak di bayakwi kiunin dini balna mahni kalahwarang yulnikna kidika laih sipawas ki.#Rom 15:27. 12Muih ūk balna kidika bik adika rahmni manna mamatna yakat duduwakat, yangna laih baisa rahmkina dutayangna.
Kaunah yangna rahmkina dutayangna kidika kaput di balna kidika yakat yamtasyangna, dawak yangna laih di bitik yakat sip wauhtik aiwayangna Krais yulni yamni kidika yakat dutni yamnikna awas yulni. 13Manna amanglatamana angdika muihni balna makat yulnin ūni warkni balna yayamwa kidika laih, makat yulnin ūni yakat ais bangkidika kaupak sangka ki.#Dt 18:1. Yuldarang kat, angdika muihni balna sakripais yayamwa pāni yakat wark yayamwa kidika laih, didauh balna sakripais yayamna muihni kidika kakaswi. 14Sihm kaput bik, Dawan yaklau yulna angdika muihni balna yul yamni kidika yuyulwa kat kidika kaupak sangka atninna.#Mt 10:10; Lc 10:7. 15Kaunah yang laih adika rahmni balna kaupak dutik di balna kidika yamtasyang, dawak yang lawik aput bik manaultasyang manna lawa di yana atnamna yulni. Daunik kauh yamni kaldakayang yamnik karak dawakat. ¡Muih as bik yadakyakwas karang ki alaskina dutayang adika kaupak!
16Yang nikingkauh laih yul wisam yamni sumalnik kidika yang manah kapat kaldakanik dini laih awas ki, kat kidika laih yang yamnik sipawas dini laih kultasyang. ¡Dawak alakaih yang lawik sumaltasyang laih!#Jr 20:9; Am 3:8. 17Kidika bahang, yang kulnik lani kat yamki kat, yang rahmki duki ki mikit duna atnik; kaunah taihna lani karuk yamki kat, kidika laih Papang yaklau yamnin dini yayulna kidika yamtayang. 18Adika niningkauh laih, yang mikit kidika laih, alasna yul wisam yamni minit daktas sumaltayang kidika ki; yuldarang kat, yul wisam yamni sumalnin warkni dutayang kidika minit kaupak dutik sangka atnik awas yamtayang kidika.
19Yang muih as bik warauni awas yang kaunah, muih bitik waraunina kalnayang, Krais dini muih mahni yakna atnik yulni. 20Ju balna pasyakat sakyang mani sihm Ju muihni as kapat kaltayang, witingna yakat kulninna laihna atnik yulni; yuldarang kat, Moses lāni dinityakat bang muihni balna kidika kulninna laihna atnik yulni, yang kat bik kidika lāni dinityakat āwayang, rahm laih kidika lāni yakat yasitwas kaunah. 21Ūk kidika laih, Moses lāni dinityakat awas muihni balna kidika kulninna laihna atnik yulni, sihm witingna kapat kaltayang, rahm Papang lāni kidika kauh yasitwa karang bik, Krais lāni dinityakat yang kidika yulni. 22Rahm kulnin lani yudutni duduwa muihni balna karak sakyang mani, sihm witingna yudutni kapat kaltayang, witingna yakat bik kulninna laihna atnik yulni. Yuldarang kat, witingna bitik ampat kat sihm kapat kalnayang, amput datik witingna kaupak buas dilaihtik yakna atnik kidika yulni. 23Adika dini balna bitik kidika laihwi yaknin yulni kidika yulni yamtayang, kidika kaupak yang bik diki duna atnik yulni.
24Manna amanglatamana kiri kalsaranin kalyamnin as kidika kirinin muihni balna kidika bitik kikiri, kaunah kidika kaupak aslah minit duwi. Bahang yamni, manna bik sihm kapat ira mamatna dutanauh. 25Yakisdinin dini as yakat kalsaranin muihni balna ridi kakalwa kidika, dutni diyamninna dini balna bitik kidika yakat nanitnadadakwi. Dawak witingna aput yayamwi daukalwa kraunni as karak minitna duna atninna yulni; wirlawakat, mayang laih mamikit daukalwas atnin dini kidika yulni kalbaudi. 26Yang nikingkauh laih, mikpa di talasyang kapat irasyang, dawak wing yakat witkauna bautayang kapat laih kalbautasyang. 27Nawatkauh, muihki nuhni kidika wah kalatayang dawak taihtik kalyamtayang yulki dakana atnin, muih balna yakat disumaltik usnit kat yang alas sau yakat buknik awas yulni.
Currently Selected:
1 Kurint 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
