1 Kurint 10
10
Yul sumalna dawan dauh niningyakat
1Wirahki balna, yang dukih yawas ki, manna damatna kahna atnamna mayang mamuihkibararak balna mukus dinityakat bangdai kidika,#Ex 13:21-22. dawak witingna bitik Kuma Pauni yakat dakyaklalana dai kidika.#Ex 14:22-29. 2Kaput dawak, witingna bitik Moses karak aslah kalududuhna dai kidika mukus yakat dawak kuma yakat bik was diutuhwi yakna atnin yulni. 3Sihm kaput bik, witingna bitik spirit niningyakat kasnin dini kidika kakasna dai#Ex 16:35. 4dawak spirit niningkauh dinin dini kidika bik didina dai.#Ex 17:6; Nm 20:11. Kat spirit kinipala wasni didiwadai bahang witingna uiwa yakat miniknadawadai kidika, kidika laih Krais dai. 5Kaput kaunah, witingna mahni kauh kidika laih Papang yamni talwa dini kidika yayamwasdai, dawak kidika yulni witingna muihnina nuhni balna kidika kauhmak wanilang yakat wawatna dai.#Nm 14:29-30.
6Adika dini balna bitik kalahna dai mayang talna atnin yulni, di dudutni kidika dukih mayawas atnin yulni, sihm witingna dukih diana dai kapat.#Nm 11:4. 7Kidika bahang, manna dawan dauh balna yakat ayangnina nuhni yayamwinih, sihm witingna kaupak buas yayamnadai kaput, Ulna yakat aput yulwi: “Muih balna kidika laih yalahwi di kakasna dai dawak didina dai, dawak usnit kat yaklauwi alasna dudunadai.”#Ex 32:6. 8Mayang la munah kalduduwas lani kidika yamdas kawang, witingna kaupak buas yayamnadai kaput, kidika yulni ma aslah yakat muih 23,000 dadauna dai kidika.#Nm 25:1-18. 9Krais yakat bik traini taldas kawang, sihm witingna kaupak buas yayamnadai kaput, kidika yulni bil dikakaswakat dadauna dai kidika.#Nm 21:5-6. 10Dawak Papang niningyakat bik sararahwinih, sihm witingna kaupak buas sararahna dai kapat, kidika yulni insal muih iyang yaklau imukna dai kidika.#Nm 16:41-49.
11Adika dini balna bitik mayang mamuihkibararak balna yakat dikalahna dai mayang talna atnin yulni, dawak Ulna balna yakat ulwi dana maisingkatna as yulni adika mani witni balna akat yalahda muihni mayang kidika madiki. 12Kaput bahang, barangni atnin kulwa muihni kidika laih, amung talwang bukwas atnin. 13Manna muih wauhwi sipawas kidika kapat as bik wauhta bayaktasmana. Dawak manna laih Papang yakat yamni kaltalnamna sipmana, manadawakat wauhnin dadasni kidika wauhtas atnamna yulni. Wirlawakat, wauhnin mani kidika kiwi kawarang mani, Papang yaklau amput kalahnin tani kidika manawarang, kaput laih sip wauhna atnamna.#Mt 6:13.
14Kidika bahang, wirahki dalani balna, dawan dauh balna kaupak iranauh. 15Muih di amanglalawa muihni balna kapat yakat manayultayang: manna alas lamana yamtanauh manayultayang dini kidika. 16Sutak kaupak dida mani kat Papang yakat tingkih kaladi, Krais āni karak aslah kaldi; plawar busna bahna kaupak kasda mani kat, Krais muihni yakat aslah kaldi.#Mt 26:26-28; Mk 14:22-24; Lc 22:19-20. 17Mayang laih mahni mayang kaunah, plawar busna aslah kaupak kasdi, dawak kidika bahang muihninuh aslah mayang.
18Israel tawanni yakat yamni talnauh: di dauh balna sakripais yamna yakat kakaswa balna kidika laih, sakripais busnin pāni yakat wark yayamwi.#Lv 7:6. 19Yang lawik dawan dauh kidika laih nuhni kalkulna ki laih yultasyang, dawak di muihni dawan dauh yakat sakripais yamna kidika bik di muihni ūk karak satuk ki bik yultasyang. 20Yang yultayang kidika laih Papang yakat kukulwas muihni balna sakripais yayamwa mani kat, walasa balna yakat sakripais yamwi diayawi, dawak Papang yakat laih yamwi diayawas ki,#Dt 32:17. dawak yang dukih yawas ki manna kidika walasa balna karak di as duta atnamna. 21Manna sip awasmana Dawan sunitak karak di dita dawak walasa balna suninatak karak bik di dina atnamna.#2 Kor 6:15-16.
22¿Kidik awaskat ais Dawan yakat minit annin dukih mayawih?#Ex 20:5; Dt 32:21. ¿Ais witing karak mayang kauh pararasnimayang?
Pri lani dawak kristian dalani lani karak
23Aput yulwi: “Muih as kidika laih pri ki ais yamnin dukih kalawa kidika.” Rahm ki, kaunah bitik laih yamni awas ki.#1 Kor 6:12. Agha, muih as kidika pri ki ais yamnin dukih kalawa kidika, kaunah kidika balna bitik kidika spirit niningyakat ilp kalawakat barakwas ki. 24Mayang alas yamni atnin kidika walnin awas ki, kaunah muih ūk balna kidika bik yamni atnin kidika walnin ki.
25Manna di muihni bakakanwa pāni yakat di muihni bakakanwa kidika bitik kastanauh, kulnin dutni lani as karak bik yulta dakas; 26kat sau bitik yakat di balna bang kidika laih, Dawan dini bahang.#Sal 24:1; 50:12; 89:11.
27Kulwas muihni as yaklau yawa di kasnamna manayulwarang kat, dawak manna laih yawanamna dukih manawarang kat, ais mananawarang kidika kastanauh, kulnin dutni lani as karak bik yulta dakas. 28Waralaih yamni, muih as yaklau aput manayulwarang kat: “Adika di muihni laih sakripais yamna”, bahang kidika laih kakaswinih, yulna muihni kidika amanglana atnin yulni dawak kulnin dutni lani yulni.#10.28 Tingkau ulna balna as as yakat laih aput minitlalakwi: Kat sau akat di balna bitik bang adika laih Dawan kaupak ki. 29Muih ūk kulnin lani kidika yakat yultayang, kaunah manna kulnamna lani yakat laih yultasyang.#1 Kor 8:7-12.
Kauna muih as aput yulwi dakanin sip ki: “¿Ais yulni yang pri lani dutayang kidika muih ūk kulnin lani karak laki yamwarangyah? 30Dawak yang di kastayang kidika yulni Papang yakat tingkih kalatayang kat, ¿ais yulni kastayang kidika yulni yang nikingkauh yuyulwarangyah?” 31Kidika bahang di kastamana kat sihm kapat ki di ditamana kidika, di ūk yamtamana kidika bik, kidika balna bitik kidika Papang alasnina yaksihni kidika dini yamtanauh. 32Muih as yakat bik di dutni yamwi niningkakawinih; Ju muihni balna, Ju muihni balna awas yakat, dawak Papang sutsni muihni balna kidika yakat bik awas. 33Yang nikingkauh laih, muih balna bitik kau di balna bitik yayamna kidika yulni tingkih lani dianik kultayang, yang alas yamni atnik kidika waltas kaunah muih ūk balna kidika bik yamni atnin yulni, dawak laihwi yaknin lani kidika bik duna atninna yulni.
Currently Selected:
1 Kurint 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
