1 Kurint 4
4
Apostel balna warknina
1Manna laih Krais tingnisut laihyang balna dawak Papang yamnin dini balna malni yakat bangkidika sumalyang muihni yangna kapat manah yanakulnamna ki. 2Waralaih yamni, wais kat tingni yakat wark as duwa kidika, witing laih barangni kidika muih balna yakat yamwi niningna kanin ki. 3Yang nikingkauh laih, manna lawa laki yamtanamapa kidik awaskat muih lani yamyang as yaklau laki yamwarangpa, kidika yulni uba bik kultik kalbautasyang. Yang kat bik alas laki yamtasyang. 4Kaput bik, yang kulnik lani kidika yaklau di as bik yang yulki yakwas kat, kidika yulni yang laih di yamtasyang laih awas ki. Bahang yang laki yamwa kidika laih Dawan kidika ki.#1 Jn 3:19-21. 5Kaput bahang, manna baisa kau muih lani yayamwinih; tahatanang Dawan kaiwi puksani yakat sakkidika yaringni yakat yakwang dawak isning yakat ais kulnin lani balna duwa kidika lāih yakwi yulwang. Kaput laih Papang yaklau muihnina kat kat diana karang ayangnina nuhni yamnin kidika.
6Wirahki balna, adika dini balna manayultayang manna yamni atnamna kidika yulni dawak Apolos dawi yang muihki kidika kauna libittik namangnakatayang. Adika dini yultayang yangna yamtayangna yakat tala lan alahwa ulna kidika kaupak baisa tanityakat yawas atnamna yulni, dawak muih as bik witing manah kapat kaldakanin awas ki wanaihni yakat rahmni kalawas dawada kidika yulni. 7Bahang, ¿wais yaklau tanit yamni kulna dini kidika mawih muih ūk balna minitna yakat? ¿Dawak ais as dutamahn Papang yaklau mawas dini kidika? Dawak witing yaklau mana kat, ¿ais yulni man alas yakta dunaman kapat kaldakamahn?
8Taldas laih, manna kidika uman di duyang kalnamana, dawak ais dukih manawa kidika bitik dutamana, dawak manna laih king kapat kaldakamana yangna kaupak di as bik dukih manawas ki. ¡Rahm palni manna kidika king mana kat laih, yangna bik manna king āwamana sauni yakat dikina duta awana ki! 9Bahang yangna apostel balna yangna nikingna kauh laih, Papang yaklau pa witni yakat yanana, sihm yangna laih dauna muihni yangna kapat. Yangna laih sihm karinin dini as kapat alahwanayangna sau, insal balna dawak muih balna niningna yakat. 10Yangna laih, Krais yulni, mutu kapat yangna; kaunah manna laih, Krais minikun talnin kidika karak, sinsmana sirihni ki. Yangna laih paraskina dis ki, kaunah manna laih pararasni mana. Yangna yakat laih dauh yanakukulwi kaunah manna yakat laih rispik manayayamwi. 11Warmani kat bik yangna ban yuh wauhtayangna, was dikih yanawi dawak bik asna disyangna; muih balna yaklau dutni yanayayamwi, yangna silp ūkina disyangna 12dawak yangna silp tingkina kau wark alahwana manah yanasuhna.#Ap.w 18:3. La yanatutuhwa balna yakat laih biri wirlatik blis diyamtayangna; yanauhuiwi, kaunah sip wauhtayangna. 13Yangna yakat dutni yanayuyulwi, dawak biri laih dalani lani karuk nangnitnalatayangna. Bubuh kapat yanayayamwi, sihm di dauh as kapat. Dawak kapat manah warmani kat.
14Yang adika wauhnitaya manna yakat manaultasyang asalmana yakna atnik yulni, kaunah yul as manasumalna atnik yulni, sihm yang walakibis balna kapat, bahang dalani manadakayang. 15Bahang manna maestro balna manah 10,000 dutanang Krais yulni manayuyulwa karang bik, papangmana laih mahni dismana. Manna rahm kulnin lani dutamana kidika niningkauh papangmana kidika laih yang, kat laihwi yaknin yulni kidika manayulnayang bahang. 16Kaput bahang, kalmanadinit buktayang yang ais yamtayang kaput uskit uitanauh.#1 Kor 11:1; Fil 3:17.
17Kidika yulni Timoti yang walakibis dalani dawak Dawan yakat barangni kidika manasihnayang dai. Witing yaklau manayulna karang yang di balna amput yamtayang kidika Jisas Krais yakat kulyang muihni yang kapat, suts balna bitik yakat bayaktik sumaltayang kaput. 18Manna kaupak buas mana kidika laih uman nuhni kaldakamana yawik manatalas awaki kapat kulta; 19kaunah, Dawan dukih kalawarang kat, sirihni yawik manatalnik kultayang. Bahang kidika yakat manatalki manna manah kapat kaldakanamna sipmana kidika, dawak yulnamna sipmana kidika manah bik laih awas ki. 20Kat Papang king kāwa lani kidika laih yul balna kapat awas ki, kaunah parasni duwi. 21¿Manna ais kidika kauh dukih manawih: yawik wah manana atnik, kidik awaskat yawik dalani manatalna atnik?
Currently Selected:
1 Kurint 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
