1 Kurint 3
3
Wark muihni kaltalyang yayamni balnaPapang warkni yayamna kidika
1Yang, wirahki balna, kidika mani yang sip yulmanabautasyang dai spirit duyang muihni balna yakat kapat, kaunah muih kulninna lani duduwa kapat, dawak walabis balna yakat kapat yulmanabaunayang Krais yulni balna kidika. 2Sumalnin lani as isi mananayang, sihm muihbin ta suwa yakat kasnin dini dadasni kalanin pāni yakat tāwas kauh kalawa kapat,#Hib 5:12-13. kat manna laih baisa kasnin dini dadasni kidika sip kastasmana dai bahang. ¡Dawak waradika kat bik sip kastasmana, 3kat baisa parasmana dis kidika yulni! Manna pasmangna yakat tumnin lani dawak sahwi kalahnin lani kidika baisa sakkat, kidika laih baisa parasmana diski dawak di balna yamtamana kidika bik sihm muih balna kulninna lani kapat ki. 4Kat muih as yaklau aput yulwakat: “Yang laih Pal diniyang”, dawak ūk laih: “Yang laih Apolos diniyang”,#1 Kor 1:12. kidika balna laih muih balna kulninna lani duduwi.
5Witni kat, ¿Apolos kidika aisyah?, ¿Pal kidika aisyah? Witingna laih di yamyang balna manah ki, witingna munah manna laih rahm kulnin lani yakat yawa āwanamana. Mayang mamuihki kat kat yamnamayang Dawan yaklau yamnin maiyulna kidika: 6yang dahnayang#Ap.w 18:4-11. dawak Apolos laih was utuhna,#Ap.w 18:24-28. kaunah di dahna kidika laih Papang yaklau kalawakat barakna. 7Kaput bahang dahwa muihni kidika dawak was utuhwa muihni kidika balna laih di diski, kaunah Papang laih di bitik yakat ki, bahang di dahna kidika laih witing yaklau kalawakat barakwi. 8Dadahwa muihni balna dawak was ututuhwa muihni balna kidika laih kapapat ki, Papang yaklau witingna muihnina kat kat warknina minit lauwi diawarang kaunah. 9Mayang laih wark muihni kaltalyang yayamni mayang Papang warkni yakat, dawak manna laih di dahna as mana dawak bik Papang ūni yamna as mana. 10Yang kuduh simint ūni yamyang maesnitro as yang dawak Papang yaklau rahni balna kidika ukna, dawak muih ūk kidika laih ū kidika laihwi yamwi. Kaunah muih balna kidika laih muihnina kat kat amung talninna ki amput yayamwa kidika, 11bahang muih as bik uman rahni ukna kidika kaupak rahni ūk uknin sip awas ki, kidika laih Jisas Krais. 12Adika rahni minityakat, muih as yaklau gol, lalah dawak kipala minit nunuhni kau, kidik awaskat tat, dibasta dawak dapa panan kau bik ū yamnin sip ki; 13kaunah muih balna warknina kidika laih la yamnin mani yakat lāih karang ki; kat kidika mani laih kuh karak kaiwarang ki, dawak kuh kidika laih muih balna warknina yayamna kidika kat kat buswi talwarang ki. 14Angdika muihni ū yamna kidika dadasni karang laih, warkni minit duwarang ki; 15kaunah ū yamna kidika busyamwarang laih, bitik laih diswarang ki, witing palni kiri yaklawarang bik muih as kuh pau kaupak kiri yaklawa kapat.
16¿Ais manna amanglatasmana katpah Papang ūni balna kidika, dawak Papang Spirit kidika laih manna yakat yalahwa kidika?#1 Kor 6:19; 2 Kor 6:16. 17Muih as yaklau Papang ūni kidika daukalwarang kat, Papang yaklau witing yakat kaldaukalwarang ki, kat Papang ūni kidika laih holi bahang, dawak kidika makat yulnin ūni kidika kuduh manna.
18Muih as bik alas kalyulwas kawang: manna paskaupak wais kidika sins duyang kaldakawa kat adika sauni sinsni lani karak, di amanglatasman kapat wirlawah, kaput karak rahm sins duyang kalna atnam. 19Bahang adika sauni sinsni lani kidika laih Papang niningyakat di as dauh ki. Ulna yakat aput yulwi: “Papang yaklau sins duyang balna yakat dilaihwi witingna silp sinsnina lani kidika yakat.”#Job 5:13. 20Dawak aput bik yulwi: “Dawan laih amanglawi sins duyang balna kulninna lani kidika laih di as dauh manah kidika.”#Sal 94:11. 21Kidika bahang, muih as bik witing manah kapat kaldakanin awas ki muih balna dinina kidika yakat; bahang di balna bitik kidika laih manna dimana: 22Pal, Apolos, Pita, sau, sangka atnin, daunin, warmani dawak ma balna kaiwarang kidika; kidika balna bitik laih manna dimana, dawak 23manna laih Krais dini mana, dawak Krais laih Papang dini.
Currently Selected:
1 Kurint 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
