1 Kurint 2
2
Krais pan prihni yakat ilwi papana yulni
1Kaunah wirahki balna, Papang yulni rahm malni kau kidika manayulna yawanayang mani, sins yulni balna tuhni karuk yamtasyang dai. 2Dawak manna pasmangna yakat sakkauna, yang di ūk yulni manayulnik dukih yāwasdai kaunah Jisas Krais yulni manayulnik dukih yana dai dawak, baisa palni kidika laih, Jisas Krais pan prihni yakat ilwi papana kidika yulni manayulnayang dai. 3Manna muhmana yakat paraski dis dawak yamaduting yayukwinah lawanayang dai,#Ap.w 18:9. 4dawak yulni kidika yultik manasumalnayang dai mani, sins yulni balna karak dutik yulbautasyang dai kulnamna laihna atnik yulni. Nawatkauh laih, Spirit dawak Papang parasni munah dutik kulnamna laihnayang dai, 5kaput laih manna rahm kulnin lani dutamana kidika Papang paraski kaupak atnin yulni dawak muih balna sinsnina kaupak atnin laih awas.
Papang laih witing Spirit munahlāih kalahna kidika
6Kaput bik, rahm kulnin lani yakat baraknamana pasyakat laih rahm sins lani yulni balna kidika yulbaudi. Kaunah adika sauni dawak kabamint kayang balna sinsnina lani laih yuldaski, kidika balna laih sirihni palni dislalawarang ki. 7Papang sinsni lani malni kau sakkidika yulni yuldi, Papang yaklau di as malni kau, sau yamwas tanitkauh, mayang maalaskina yaksihni yakwi danadai kidika. 8Adika dini laih warmani sau akat kabamint kayang balna kidika baisa amanglalawas ki, bahang amanglalana kat laih Dawan ayangni yaksihni yamnin kidika pan prihni yakat ilwi pawas atninna dai. 9Kaunah Ulna yakat aput yulwi:
“Papang yaklau ridi yamnawiting yakat dalani kalkukulwabalna kidika dinina
muih as bik talwas dawak dakawasdini balna kidika,
dawak bik baisa kulwi talwas kidika.”#Is 64:4.
10Adika dini balna ki Papang yaklau manikingkana kidika Spirit munah, bahang Spirit laih di balna bitik lakwi talwi, Papang dini balna tuhni kau bangkidika kat bik.
11¿Muih balna pasyakat wais kidika sipyah muih isning yakat di sakkidika amanglana atnin, kaunah muih sangnika yakat spirit sakkidika manah laih sip awasyah? Sihm kaput bik, Papang Spirit kidika manah amanglawi Papang yakat di sakkidika. 12Dawak mayang laih sau spiritni kidika dudas ki, kaunah Papang kaupak Spirit kaiwa kidika dunamayang, Papang witing dalani lani duwa kidika kau di balna mayana kidika yakat amanglana atnin yulni. 13Mayang adika dini balna yul karak yuldi Papang Spiritni yaklau maisumalna dini kidika, dawak mayang silp masinski lani karak laih lan malahwi yuldas ki. Mayang laih spirit dini balna kidika kaput lāih yakdi yuldi spirit dini balna yakat.
14Angdika muihni spirit dis kidika laih Papang Spiritni dini balna kidika yakat duwas ki, kat witing niningyakat laih di as dauh ki. Dawak bik sip amanglawas ki, kat adika dini balna laihwi lani yamnin laih spirit kau manah ki. 15Kaunah angdika muihni Spirit duwa kidika laih di balna bitik laihwi lani yamnin sip ki, dawak witing yakat laih sip muih as bik lani yamwas ki. 16Bahang Ulna yakat aput yulwi: “¿Dawan sinsni kidika wais amanglawih? ¿Wais yaklau kalsumalnin sip karangyah?”#Is 40:13; Rom 11:34. Kaput bik, mayang laih Krais sinsni kidika dudi.
Currently Selected:
1 Kurint 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
