1 Kurint 1
1
Kalparasnin yulni
1Pal, yang laih Papang kulnin lani alahwanayang Jisas Krais aposnitel atnik yulni. Wanaihki Sóstenes karak albu kalpaktik, 2adika wauhnitaya ultayang Papang sutsni Kurint tawanni nuhni kau bangyakat,#Ap.w 18:1. Jisas Krais munah Papang dini kakalna kidika dawak bik diyulna kidika witing tawanni muihni balna kalna atninna, pa balna bitik yakat mayang Madakiwan Jisas Krais ayangni yuyulwa balna kidika karak kalpakwi, mayang dawak witingna bik Daninawan. 3Mayang Mapapangki Dawan Jisas Krais karak yaklau manna mamatna yakat witingna minikun talnin lani dawak kulnin aslah lani duduwa kidika bik manasisihwarang.
Krais munah blisin lani
4Yang laih Papang yakat ban tingkih kalatayang manna yulmana, witing minikun talnin lani manna mamatna yakat sihna kidika yulni Jisas Krais munah. 5Jisas Krais munah Papang yaklau spirit ritsni balna kidika manana, yul balna kau bik dawak sins lani balna yakat bik, 6kat Krais yulni kidika laih manna pasmangna yakat barangni watna kidika yulni. 7Aput laih manna Papang prisantni kidika as bik dis awas mana dawak manna laih Madakiwan Jisas Krais kaiwakat talna atnamna tahatamana. 8Papang yaklau witni kat barangni manaduwa karang, mayang Madakiwan Jisas Krais kaiwarang mani muih as bik manabilwas atnin yulni. 9Papang laih witing pranimis balna kidika ban kaput yamwi, dawak witing yaklau manayulwakat aiwanamana witing Walanibis Madakiwan Jisas Krais karak aslah yalahna atnamna yulni.
Suts yakat sahwi kalahnin lani
10Wirah balna, mayang Madakiwan Jisas Krais ayangni usnit yakat kalmana dinit buktayang manna bitik kulnamna aslah dutanauh dawak pasmangna yakat sahwi kalahnin lani dis atnin. Aslah yalahtanauh, kulnin lani kapapat duta. 11Wirahki balna, adika yultayang, kat amanglanayang Cloé sulani balna munah manna pasyakat sahwi kalahnin lani sakkidika. 12Yulnik dukih yawi, manna kaupak buas aput yuyulwi: “Yang laih Pal diniyang”; ūk balna laih: “Yang laih Apolos#Ap.w 18:24. diniyang”; ūk balna laih: “Yang laih Pita diniyang”; dawak ūk balna laih: “Yang laih Krais diniyang.” 13¿Ais Krais laih sahwi kalahna katpah? ¿Ais Pal laih manna yulmana pan prihni yakat ilwi pana katpah? ¿Kidik awaskat ais manna laih Pal ayangni kau was manautuhwi yakna katpah? 14¡Papang yakat tingkih yultayang manna yakat as bik was manautuhtik yaktasyang dai kidika yulni, Crispo#Ap.w 18:8. dawak Gayo#Ap.w 19:29; Rom 16:23. kidika balna yakat laih yultasyang! 15Kaput laih muih as bik yulwas karangki yang ayangki kau was utuhwi yakna. 16Estéfanas#1 Kor 16:15. sulani balna yakat bik was utuhtik yaknayang, kaunah muih ūk was utuhtik yaknayangpa isingkattasyang, 17bahang Krais laih muih was utuhwi yaknin yasihwas ki, kaunah yul wisam yamni kidika yulnin yasihna, dawak sins lani yulni balna karak bik awas, kaput yultik Krais pan prihni yakat dauna kidika dauh yamnik awas yulni.
Krais parasni dawak sins laniPapang kaupak
18Krais pan prihni yakat dauna yulni kidika laih yul dauh as ki disnin tani yakat uiwa muihni balna niningna yakat laih; kaunah adika yulni laih Papang parasni ki laihwi yaknin niningyakat mawamayang kidika laih.#Rom 1:16. 19Ulna yakat yulwa kaput:
“Yang lawik yamting sins duyangmuihni balna kidikasinsnina diswarang
dawak sinsnina sirihnimuihni balna kidikabik diswarang.”#Is 29:14.
20¿Ais kat uiwi wawatnayah sins duyang muihni, maestro,#Job 12:17; Is 19:12; 33:18. dawak adika sauni dini balna yulni yulbauwi sip muihni kidika? ¡Papang yaklau dauh yamna adika sauni sinsni lani balna kidika!#Is 44:25. 21Papang yaklau witing sinsni lani yakat yamna, sau muihni balna kidika muih sinsni munah duwi witing yakat amangnilawas atninna; kaput kaunah yamni talna witing yulni munah laihwi yakna atnin witing yakat yamni kaltatalwa muihni balna kidika, adika yulni laih di as dauh kapat karangbik.
22Ju muihni balna laih di taldas sainni balna talnin dukih diawi, dawak grik muihni balna laih sins lani wawalwi; 23kaunah mayang laih Mesías pan prihni yakat ilwi papana yulni kidika sumaldi. Adika yulni laih Ju muihni balna kidika dutni kaldakakawi, dawak Ju muihni balna awas kidika laih di as dauh kukulwi; 24kaunah Papang yaklau diyulwak aina muihni balna kidika niningna yakat laih, Ju muihni balna kidik awaskat grik muihni balna karangpa, adika Mesías laih Papang parasni dawak bik witing sinsni. 25Bahang Papang niningyakat di as dauh kapat kidika laih, kidika laih baisa sins duwi muih sinsni bitik karak dawakat; dawak Papang niningyakat parasni dis kapat kidika laih, kidika laih baisa parasni ki muih parasni bitik karak dawakat. 26Wirahki balna, manna amanglanamna ki Papang yaklau manayulwakat aiwanamana kidika muih balna yaklau sins dibindauh dutamana atwa karang bik, dawak manna kaupak bulah mana kidika parasmana dutamana kidik awasbik sulani nuhni dikulna balna kidika pasyakat mana. 27Dawak sins duyang balna yakat asalnina yakna atnin yulni, Papang yaklau sau muihni mutu balna kidika walwi yakna ki; dawak pararasni balna yakat asalnina yakna atnin yulni, sau muihni parasnina dis balna yakat walwi yakna ki. 28Papang yaklau adika sauni muihni balna miniknakunni dauh dikukulna balna kidika walwi duna, yuldarang kat, di dis muihni balna kidika, kaput laih nuhni kaldakakawa muihni balna yakat dauh diyamna atninna yulni. 29Kaput laih muih as bik nuhni kaldakawas karang Papang muhni yakat. 30Kaunah Papang yaklau witing palni manna kidika Jisas Krais karak manalibitna, dawak bik Krais kidika mayang masinski yamna dawak Krais munah mayang madutki balna dawakat disna atnin, Papang dini maiyakna atnin dawak bik mailaihwi yakna atnin yamna. 31Aput laih, Ulna yakat yulwa kaput: “Angdika muihni witing manah kapat kaldakanin dukih kalawa kat, Dawan kaupak nuhni kaldakawang.”#Jr 9:23-24.
Currently Selected:
1 Kurint 1: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
