1 Kurint 15
15
Krais watwi yaklauna kidika
1Waralaih, wirahki balna, dukih yawi manna ismangnakatnamna yul wisam yamni manasumalnayang dai kidika. Adika ki yul wisam yamni dunamana kidika, dawak kidika karak manna barangni mana. 2Adika yul wisam yamni munah bik manna laihwi yaknin lani kidika dutanama, manna bik witing yakat barangni mana kat, yang lawik manayulnayang dai kaput; kaput awas laih, dauh kulnamana dai kat awarang.
3Tatuna kidika laih amput atnin lani balna dunayang dai kidika manasumalnayang dai, manna amanglana atnamna, Krais laih mayang madutki balna yulni dauna, Ulna balna yakat yulwa kaput;#Is 53:5-12. 4sau yakat nununa dawak usnit ma bās kat watwi yaklauna, sihm Ulna balna yakat yulwa kaput;#Sal 16:8-10; Mt 12:40; Ap.w 2:24-32. 5dawak Pita yakat kalkalahna kidika,#Lc 24:34. dawak usnit kat 12 balna yakat dikalahna dai kidika.#Mt 28:16-17; Mk 16:14; Lc 24:36; Jn 20:19. 6Usnit kat muih andat singka minityak dikalahna dai, kidika muihni balna mahni kauh kidika baisa sangka ki, buas laih uman dadauna. 7Usnit kat Jims yakat kalkalahna dai, dawak usnit kat apostel balna bitik yakat dikalahna dai.
8Witni kat yang yakat bik yakalahna dai,#Ap.w 9:3-6. yang laih sihm muihbin as dutni batahna kapat yang kidika. 9Bahang yang laih apostel balna pasyakat nuhni yakulwas muihni yang, dawak apostel ayangni dunik bik sip awasyang, kat Papang sutsni yakat usnit uinayang bahang.#Ap.w 8:3. 10Kauna yang ampat yang kidika kapat yang kat Papang laih yang karak yamnidai bahang; dawak witing yang yakat dalani yatalna kidika bik dauh kalwasdai. Wirlawakat, yang laih witingna bitik karak yang kauh wark parasni alahwanayang; yang palni alahwasyang, kaunah Papang kalahna, witing dalani lani duwa kidika karak ilp yana. 11Nuhni kulna kidika laih, yang dawak witingna bik sihm kapat, adika yulni balna sumalnayangna, dawak manna bik adika yulni balna yakat rahm kulnamana.
Muih dadauna balna watwi yaklalauwarang kidika
12Kaunah yangna sumaltayangna kidika laih Krais laih watwi yaklauna, ¿ais yulni manna kaupak buas yuyulwih muih dadauna balna kidika laih watwi yaklalauwaski? 13Kat muih dadauna balna kidika watwi yaklalauwas laih, Krais bik watwi yaklauwas ki; 14dawak Krais watwi yaklauwas dana kat, sumaltayangna yulni balna kidika laih dauh ki, dawak manna rahm kulnin lani dutamana kidika bik dauh ki. 15Adika dini rahm kaput kat laih, yang laih Papang witninis balna dauh awanaki ki, kat yangna laih Papang yaklau Krais yakat watwi dulauna kidika barangni yultayangna bahang, rahm watwi dulauwas ki dai muih dadauna balna kidika rahm watwi yaklalauwas kat laih. 16Kat muih dadauna balna kidika watwi yaklalauwas laih, Krais bik watwi yaklauwas ki; 17dawak Krais watwi yaklauwas kat, manna rahm kulnin lani dutamana kidika laih dauh ki: baisa dutmana balna kidika yamtamana. 18Adika niningkauh laih, Krais yakat kulwi dadauna balna kidika bik didisna. 19Mayang Krais yakat tahanin lani duda kidika sangka mayang mani yakat manah kulda kat, muih balna bitik pasyakat mayang kauh mamikunni ki.
20Kaunah rahm kidika laih Krais laih watwi yaklauna. Witing kuduh di minik tatuna kalahna kidika: watwi yaklaunin niningyakat yakat witing tatuna yaklauna. 21Muih as yulni daunin kidika sau akat kaina kaput, sihm muih as yulni dauwi watwi yaklaunin kidika bik kaina. 22Dawak Adam yakat muih bitik dadauwa kaput, sihm kaput Krais yakat muih bitik sangka karang.#Rom 5:12-18. 23Kaunah muih balna kidika panina kat kat: Krais kidika tatuna; usnit kat, Krais watwi kaiwarang mani, witing dini balna kidika. 24Kaput dawak witni mani kidika kaiwarang, Krais yaklau dawan kakalna balna kidika bitik, la tunan muihni balna kidika dawak parasni duduwa balna kidika bitik yakat minitna bayakwi king kāwa sauni adika Papang tingni yakat āwarang mani kat. 25Kat Krais laih king kawarang ki angkat mani witing niningkauh yaklalauwa balna kidika kalni dinityakat duwarang mani kat;#Sal 110:1. 26dawak witing niningkauh yaklauwa witni yakat minit bayakwarang kidika laih daunin kidika ki. 27Kat Papang yaklau kidika balna bitik kidika Krais kalni dinityakat āna bahang.#Sal 8:6. Kaunah witing tingni dinityakat āwi dana ti yulwa mani kat, Papang laih kidika pasyakat dis ki, kat Papang yaklau di balna bitik kidika Krais tingni dinityakat āna bahang. 28Dawak di balna bitik kidika Krais tingni dinityakat āwi dana karang mani kat, Krais yaklau, Papang tingni dinityakat kawarang ki, witing yaklau di balna bitik Krais tingni dinityakat āna dai kidika. Kaput dawak, Papang laih witing manah karang di balna bitik yakat.
29Kaput awas, muih dadauna balna yulnina was kalsiwi kalalahwa kidika laih, ¿ais yulni kaput yayamwapah? Dadauna balna kidika watwi yaklalauwas kat, ¿ais yulni witingna yulnina was kalsiwi kalahninyah? 30¿Dawak ais yulni mayang awar bitik kidika yamadangni yakat mayang? 31Kat, wirahki balna, yang laih ma balna bitik kidika daunin yamadangni yakat yang. Adika laih rahm ki manna yulmana isinglak kaldakayang kapat Madakiwan Jisas Krais yakat kulyang muihni mana kidika yulni. 32Yang laih di anyang balna karak kalbaunayang Éfeso yakat, kaunah ¿kidika karak ais dunayang? Rahm muih dadauna balna kidika watwi yaklalauwas kat, amput muih buas aput yuyulwih: “¡Kasdang dawak didang, yahan mani daudarang ki!”#Is 22:13.
33Manna datanang kat alas manayuyulwas kawang. Muih as aput yulna kaput: “Kaltalyang dudutni balna kidika karak kalpakdi la yamni duda kidika dadakat diswi.” 34Manna rahm palni la yamni yakat wirlawanauh, dawak dutni yayamwinih, kat manna kaupak buas kidika laih Papang yakat amanglalawas ki. Adika aput yultayang asalmana kalahna atnin yulni.
Amput dadauna balna watwi yaklalauwarang kidika
35Sip karang muih as aput yulwi dakana atnin: “¿Amput watwi yaklalauwarangyah dadauna balna kidika? ¿Muihnina nuhni kidika ampat karangpah?” 36¡Yawa yulta dakah muih yal mutu! Di minik kidika dahwa mani kat, minik kidika laih daunin karang ki pan kidika sangnika duna atnin yulni. 37Di minik as dahwa kidika laih panan kidika ukuswas karang ki, kaunah minik kidika, plawar minik karang kidik awaskat di ūk minik karangpa. 38Usnit kat Papang yaklau ampat yamnin dukih kalawa kidika kaput yamwi, dawak di minik balna muihnina nuhni ampus kat kaput diawi. 39Muihni nuhni balna bitik kidika kapapat laih awas ki; as kidika laih muih muihni nuhni, ūk kidika laih di wain balna muihnina nuhni, ūk kidika laih di lawani balna muihnina nuhni dawak ūk kidika laih waspa dini balna muihnina nuhni. 40Sihm kaput bik, kisang dini balna dawak sau dini balna bik duwi; kaunah as kidika laih kisang dini nuhni yaksihn kidika ki dawak ūk kidika laih sau dini nuhni yaksihn kidika ki. 41Ma yaringni kidika laih waiku yaringni kidika dawak yala yaringni kidika karak kapapat awaski; dawak yala balna pasyakat bik as yaringni kidika ūk yaringni kidika karak satuk ki.
42Sihm kapat ki dadauna balna watwi yaklalauwarang kidika bik. Sau yakat nuwa kidika laih daukalnin dini; watwi yaklauwa kidika laih daukalnin dini awas ki. 43Sau yakat nuwa kidika laih yamni talnin dini awas ki; watwi yaklauwa kidika laih alasna yaksihni ki. Sau yakat nuwa kidika laih parasni diski; watwi yaklauwa kidika laih parasni ki. 44Sau yakat nuwa kidika laih muihni nuhni bayakwi kiunin dini as ki; watwi yaklauwa kidika laih spirit muihni nuhni as ki. Muihni nuhni bayakwi kiunin dini duwa kapat, spirit muihni nuhni bik duwi.
45Ulna yakat aput yulwi: “Muih al tatuna Adam kidika laih, di sangnika duyang as kalna”; kaunah Adam witni kidika laih sangnika kalawa spiritni kalna. 46Kaput bik, spirit kidika laih tatuna awas ki, kaunah bayakwi kiunin dini kidika kauh tatuna ki; usnit kat spirit kidika. 47Muih tatuna sau kau yamnadai kidika laih, sau kaupak dai;#Gn 2:7. usnit muih kidika laih kisang kaupak dai. 48Sau dini balna kidika laih sihm sau kaupak muih yamnadai kidika kapat ki; dawak kisang dini balna kidika laih sihm kisang kaupak kidika kapat ki. 49Sau kaupak muih yamnadai kidika karak kapapat mayang kidika, sihm kapapat mawarang ki kisang kaupak kidika karak bik. 50Wirahki balna manayulnik dukih yawi, muihni dawak wakalni#15.50 Muihni dawak wakalni: Y.y. muihni dawak ā. duwa kidika laih Papang king kāwa lani yakat witing dini as bik dis ki, dawak daukalwa dini kidika laih daukalwas pāni yakat witing dini as bik diski.
51Kaunah Papang di malni yakat duwa kidika manna amanglana atnamna dukih yawi: Mayang bitik laih daudas karang ki, kaunah bitik laih satuk kaldarang ki 52minit as kat, sipikdi sahmuhda kapat kat, witni trumpit puhwarang kidika yakat. Kat trumpit kidika laih puhwarang ki dawak dadauna balna kidika laih watwi yaklalauwarang ki watwi dauwas atnin. Dawak mayang laih satuk kalna mawarang ki.#1 Ts 4:15-17. 53Bahang madiki balna daukalnin dini kidika laih daukalwas atnin dini kalwarang ki, dawak mamuihki nuhni daunin kidika laih dauwas atnin kalwarang ki. 54Dawak madiki daukalnin dini balna kidika daukalwas atnin kakalwarang mani kat, dawak mamuihki nuhni daunin kidika daunin awas kalwarang mani kat, Ulna yakat aput yulwa kidika kat kalahna karang ki: “Daunin kidika laih minit bayaknin kidika yaklau kasna ki.#Is 25:8. 55¿Daunin, angkat sakyah man minit bayaknam kidika? ¿Daunin tumima kidika angkat sakyah?”#Os 13:14. 56Daunin tumini subangni kidika laih dutni lani kidika ki, dawak dutni lani kidika laih parasni duwi lā munah. 57¡Kaunah Papang yakat tingkih kalatayang, witing yaklau minit bayaknin kidika Madakiwan Jisas Krais munah mayawa kidika yulni!
58Kaput bahang, wirahki dalani balna, barangni awanauh pamana kat, ma bitik Dawan warkni balna kidika yakat yamta; kat manna amanglatamana Dawan karak aslah wark yamtamana kidika laih dauh awaski.
Currently Selected:
1 Kurint 15: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
