1 Kurint 16
16
Mawanaihki balna dinina di yulwiuduhnin kidika
1Rahm kulnin lani niningyakat wanaih balna dinina di yulwi uduhnin kidika niningkauh laih,#Rom 15:25-26; 2 Kor 8-9. Galacia sauni sahyakna sutsni balna yakat disumalnayang kaput yamtanauh. 2Sandi balna kidika yakat, manna muihmana kat kat di as yaknamna ki, di ampus dunamana kidika kaput, dawak apaknamna ki yang yawaki mani kat di yulta uduhtas atnamna yulni. 3Dawak yang yawaki mani, manna lawa muih walyaktanama kidika Jerusalén yakat sihki ki, wauhtaya ultik diatik dawak di yulta uduhnamana kidika bik mawanaihki balna yakat sihting kat duwi uiwarang ki. 4Dawak yang bik yawinik sip karang kat, witingna laih yang karak uiwarang ki.
Pal pa ūk kau kiunin kulwi talna
5Yang yawaki kidika Macedonia sauni munah bayaknik karang ki; dawak Macedonia kaupak laih Corinto yakat yawik āwinik karang ki.#Ap.w 19:21. 6Sip karang ki manna karak ma buas watna atnik, kidik awasbik sip karang ki wasma mani kidika bitik manna karak bayakna atnik; bahang sip karang kidika usnit kat angkat yawinik karang kat manna lawa ilp yana atnamna. 7Yang sirihni bayaktik yawinik kidika dukih yawas ki, kaunah yang dukih yawi wattik manna karak ma buas atnik, Dawan yaklau kaput dawarang kat; 8kaunah Éfeso sauni yakat watki ki Pentecos mani kat,#Lv 23:15-21; Dt 16:9-11. 9kat Dawan warkni yakat wark nuhni yamnik dutayang dawak kidika kaupak di yayamni yakna atnik ki, yang nikingkauh muih mahni yaklalauwa karang bik.#Ap.w 19:8-10.
10Timoti#1 Kor 4:17. kiwarang kat, manna pasmangna yakat yamni kalyamtanang kat yamni kaldakawarang, kat witing laih Dawan warkni yamwi sihm yang yamtayang kapat. 11Kaput bahang manna kaupak muih as bik dutni kalyamnin awas ki; nawatkauh, ilp kalatanang kat tanityakat kiwarang kulnin aslah lani karak, dawak yang yakat kiwi yatalwarang, kat yang laih wanaih ūk balna karak aslah tahatabangyangna.
12Wanaih Apolos niningkauh laih, kalni dinit buknayang dai wanaih balna karak kalpakwi manna yakat uiwi manatalna atnin, kaunah waralaih kiunin yulwas ki. Kiwarang ki sans duwarang mani kat.
Parasnin lani witni
13Manna sahmuhni awanauh dawak bik barangni awanauh rahm kulnin lani yakat. Kulnamna dadasni dutanauh dawak barangni awanauh. 14Dawak ais yamtanama kidika, dalani lani karuk yamtanauh.
15Wirahki balna, manna amanglatamanah Estéfanas#1 Kor 1:16. sulani balna kidika tatuna Acaya sutsni yul wisam yamni yakat wiryaklalana kidika, dawak witingna yaklau rahm kulnin lani niningkauh wirah balna yakat dinina yayamna kidika. 16Yang dukih yawi manna bik kidika muihni balna dawak adika warkni yayamwa balna tingnina dinityakat āwana atnamna.
17Yang alasnayang Estéfanas, Fortunato dawak Acaico kidika balna aina kidika yulni, bahang manna muhmana yakat 18witing yaklau yang spiritki kidika dulalauna, dawak manna yakat bik sihm kapat. Muih balna witingna kapapat kidika dikulta dakanauh.
19Asia sauni sahyakna sutsni muihni balna manna yakat parasnin lani manasisihna. Aquila dawak Prisca,#Ap.w 18:2. dawak sutsni muihni balna kidika bik manna yakat parasnin lani manasisihwi Dawan ayangni usnit yakat. 20Wanaih balna parasnin lani mananawa kidika dutanauh. Biri biri kalparasta kalumtanauh.
21Yang, Pal lawik manna yakat adika parasnin lani tingki kau ultik manasihtayang.
22Muih as Dawan Jisas Krais yakat dalani talwas laih, la kaltuhnin karang ki. ¡Yangna Dakinawan, aiwah!#16.22 ¡Yangna Dakiwan, aiwah!: wirlana ūk yakat laih aput yulwi: Dawan laih kaiwi.
23Dawan Jisas yaklau manna mamatna yakat minikun talnin lani kidika manawang. 24Yang dalani lani dutayang kidika laih manna yakat ban kaput atnin dutayang Jisas Krais ayangni usnit yakat.
Currently Selected:
1 Kurint 16: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
