1 Kurint 14
14
Muih tuni sat balna kau yulbaunin kidika
1Bahang traitalnauh, dalani lani duna atnin, dawak bik kultanauh Papang yaklau spirit prisantni balna manana atnin, witing yulni balna yulna atnin prisantni kidika. 2Angdika muihni amangladas yulni balna yulwa kidika laih, Papang yakat yulkalbauwi dawak muih balna yakat laih awaski. Yulwa kidika laih spirit, kaunah muih as bik sip amanglawas ki.#14.2 Yulwa kidika laih spirit, kaunah muih as bik amanglawas ki: wirlana ūk yakat laih aput yulwi: witing alas (Y.y. spirit kau) malni dini balna yulwi. 3Wirlawakat, Papang yulni balna yulwa muihni kidika laih, kidika yamwakat muih ūk balna kidika spiritnina barakwi, dawak kulninna dulauwi dawak bik walanina āwi. 4Angdika muihni kat amangladas yulni as yulwa kidika laih, witing alas spirit niningyakat barakwi; kaunah Papang yulni balna duna kidika kaupak yulwa muihni kidika laih, suts muihni balna yakat diawakat spiritnina barakwi.
5Yang dukih yawi manna bitik amangladas yulni balna kidika yulna atnamna; kaunah yamni talayang Papang yulni balna dunamana kidika yulna atnamna; adika kauh yamni ki yulni ūk balna kau yulnin karak dawakat, ais tannika balna kidika lāih yakta diyultanama laih takat suts muihni balna kidika spiritnina barakwarang. 6Kidika bahang, wirahki balna, di as bik yamni yaktas awanama ki yang yawik manatalik amangladas yulni balna karak yulmanabauki kat, Papang manikingkawa balna yulni kidika manayulnik pāni yakat, kidik awas bik rahm amanglanin yulni kidika, kidik awas bik Papang yulni balna kidik awaskat sumalnin as manayulna atnik pāni yakat.
7Paswi yakisdinin dini balna kidika, puhnin dini kapat, wahni karuk paswi yakisdinin dini kapat, kidika balna yulnina kidika satuk satuk duduwas kat laih, sip amangladas karang ūk kidika ais satni yulni duwapa. 8Dawak war kalbaunin yakat, trumpit kidika lāih puhwas karang kat, muih as bik ridi kalwas karangki kalbauna atnin. 9Manna karak bik sihm kapat ki: manna yulmana amanglanin sip balna kidika yultas mana laih, ¿amput amanglaninyah yultamana dini kidika? ¡Kidika laih wing yakat yulkalbautanama! 10Maldaski sau yakat tuni mahni yuyulwa bangki, dawak kidika balna bitik laih sinsni lani duduwi. 11Kaunah yulni balna kidika yang amanglatasyang laih, pa ūk muihni awaki ki yayulbauwa muihni kidika niningyakat, dawak witing bik pa ūk muihni karang ki yang nikingyakat. 12Kidika bahang, manna spirit prisantni dunin kultamana kidika, minitbayak dunin kultanauh angdika muihni balna lawa suts muihni balna yakat spiritnina diatanang kat bararakwa kidika.
13Kaput bahang, angdika muihni amangladas yulni yulwa kat, Papang yakat kalyultangkat lāih amanglanin parasni kidika mawang. 14Bahang yang amangladas yulni as kau mikit yulki kat, kidika laih rahm yang spiritki karak mikityultayang, kaunah yang amanglanik kidika laih minik yakwas ki. 15¿Bahang ais yamnikyah? Bahang spirit karak mikityulnik ki, kaunah amanglanin kidika karak bik. 16Kat man Papang yakat spirit kidika karak manah ayangnina nuhni yamtaman kat, dawak muih as madakawarang kat, kidika muihni sip man yaihmat yakat kaiwas karang ki tingkih lani yultasakman kidika awarni yakat, yulbautaman kidika amanglawas karang bahang. 17Tingkih lani yultaman kidika laih yamni atnin sipki, kaunah muih ūk kidika niningyakat laih di as bik yamni awas karangki. 18Papang yakat tingkih kalatayang kat yang dawi manna bitik karak yang kauh amangladas yulni balna yultayang kidika yulni; 19kaunah suts yakat laih sip amanglana atninna yulni balna singka yulnik dukih yawi, kaput karak muih ūk balna yakat disumalna atnik yulni, amangladas yulni balna 10,000 yulnik karak dawakat.
20Wirahki balna, manna muihbinina kapat laih yul kukulwinih. Sihm muihbinina kapat awanauh di dutni kidika niningyakat; kaunah muihbararak awanauh yul balna kultamana yakat laih. 21Lā wauhnitaya yakat aput ulna ki: “Adika nisan akat amangladas yulni kau dawak pa ūk muihni balna tininapas kau bik yuldibauki ki, kaunah kaput karak bik yulki dakakawas karang ki, Dawan yaklau yulwi.”#Is 28:11-12. 22Kaput bahang tuni ūk yulnin kidika laih kukulwas muihni balna kidika niningna yakat sain as ki, kulyang balna kidika niningna yakat laih awas ki. Kaunah Papang yulni balna yulnin kidika laih kulyang balna niningna yakat sain as ki, kaunah kukulwas muihni balna niningna yakat laih awas ki. 23Kat manna bitik kaluduhta, bitik yulni ūk kau yulbautamana mani kat, muih as kiwi kawarang kidik awaskat kulwas muihni as kiwi kawarang mani kat, kidika muihni laih manna kidika tunamana dutni kalna kulwarang ki. 24Wirlawakat, bitik kau Papang yulni dunamana kidika yultabangmana kat, kulwas muihni as kidik awaskat muih pini as kiwi kawarang mani kat, witing alas dutni kaupak kulnin wirlawarang ki, dawak witing alas kallakwi kaldakawarang ki manna bitik yultamana yulni kidika dakawi. 25Witing isning paskau kidika kaput ahni watwarang ki, dawak limbabahwi Papang yakat ayangni nuhni yamwarang ki, dawak amanglawarang ki Papang laih rahm manna mamatna yakat sakkidika.
Di bitik kidika yamni karuk yamtanauhpāni kat kat
26Wirahki balna, manna kaluduhtanama mani kat, buas kidika laih salmo unbauninna sip karang, ūk balna kidika laih sumalninna kidik awasbik Papang yaklau niningnakana dini kidika yulninna sip karang, kidik awaskat amangladas yulni kau yulbauninna sip karang, kidik awaskat kidika tannika balna lāih yakwi yulna atninna sip karang. Kaunah kidika balna bitik kidika spirit niningyakat barakna atnin karang. 27Amangladas yulni balna yulnin mani kat, muih bu yulbabauwang, kidik awaskat muih bās, dawak bik awar kau; baisa kidika minityakat, muih as yaklau kidika yulni balna tanka lāih yakwi yulnin karang ki. 28Kaunah kidika yulni balna tanka lāih yakwi yulnin muihni dis laih, adika muihni balna amangladas yulni yuyulwas kawang muih balna muhnina yakat, kaunah witingna alas alas Papang karak yulbabauwang. 29Sihm kaput bik, Papang yulni balna yulnin karang kat, muih bu kidik awaskat muih bās yuyulwang, dawak muih ūk balna kidika laih kallakwi kaldakakawang kidika yulni balna yuyulna kidika karak. 30Kaunah Papang yaklau muih ūk yalahna sakkidika yakat di ūk niningkawarang kat, tatuna yaklauna yulwa sak kidika laih yulbauwas atnin ki. 31Aput laih muih balna bitik, awarnina kat kat Papang yulni balna kidika yulninna karang ki, kaput laih muih balna bitik amanglana atninna dawak bik kulninna dulauna atninna. 32Papang yulni yulnin kidika laih yulwa muihni kidika tingni dinityakat sak atnin karang ki, 33kat Papang laih kulnin aslah Papangni dawak muih yakat tunan balaknin Papangni laih awaski.
Papang tawanni yamnin kaput usnit uiwi, 34yayal balna kidika laih suts prinias yakat ap atninna ki, kat yayal balna kidika laih yulbauwas atninna bahang. Witingna laih maridnina balna tingnina dinityakat atninna ki, lā yakat yamnin yulwa kaput. 35Di as amanglanin dukih manawakat, maridmana yakat yulta dakanauh ū yakat; kat yamni awas ki yal as prias yakat yulbauna atnin kidika. 36Manna yamni amanglatanauh Papang yulni kidika manna yakat tatuna tunan bahwas ki, dawak manna manah bik dutas mana.
37Muih as witing prapit kaldakawakat, kidik awaskat Spirit yaklau kalbangna kaldakawakat, witing amanglawarang adika wauhnitaya manaultayang adika laih Dawan lani as ki. 38Dawak witing amanglawas laih, Dawan yaklau bik witing yakat amangnilawas karang ki.
39Kaput bahang, wirahki balna, Papang yulni yulnin kultanauh, dawak muih balna yulni ūk yulnin kukulwa kat laihwawatwinih; 40kaunah di balna bitik barangni lani karuk dawak pāni kat kat yamtanauh.
Currently Selected:
1 Kurint 14: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
