1 Kurint 11
11
1Manna yang di yamtayang balna yakat tala uskit uitanauh,#1 Kor 4:16; Fil 3:17. yang Krais di yamna balna yakat talik usnit uitayang kapat.
Muih yayal balna prias yakat
2Alasmanana yamtayang kat yang yulki ismangnakattamana kidika yulni dawak yang lawik amput manasumalnayang kidika kaput yamtamana kidika yulni.#2 Ts 2:15. 3Kaunah dukih yawi manna amanglana atnamna Krais kidika laih muih balna bitik taninatuna, dawak marid al kidika laih marid yal kidika tanituna, sihm kaput bik Papang laih Krais tanituna kapat. 4Muih al as kidika minityulwa kat kidik awaskat prapit yulni yulwi tunani kidika mukwa kat, witing silp tunani kidika yakat rispik dis kalyamwi. 5Wirlawakat, muih yal as minityulwa kat kidik awaskat prapit yulni yulwi tunani kidika mukwas laih, witing silp tunani kidika yakat rispik dis yamwi. Tunani kidika kahrna karang bik sihm kapat ki. 6Kat muih yal as tunani kidika mukwas laih, baisa yamni karang ki tunani kidika kahrna atnin. Kaunah yal kidika basni daknin kidik awaskat kahrnin yakasalda kat, tunani kidika mukwang. 7Muih al kidika laih tunani kidika mukwas atnin ki, kat witing laih Papang wayani dawak bik Papang alasnina yaksihni kapat duwa bahang.#Gn 1:26-27. Kaunah yal kidika laih muih al alasnina yaksihni kapat duwi, 8bahang muih al kidika laih muih yal kaupak yakwas ki, kaunah muih yal kidika laih muih al kaupak yakna. 9Dawak muih al kidika laih muih yal yulni yamwas ki, kaunah muih yal kidika laih muih al yulni yamna.#Gn 2:18-23. 10Kidika yulni, dawak insal balna yulnina bik, muih yal kidika laih tunan minityakat parasni sainni as dunin ki. 11Kaput bik, kristian sangnika yakat, muih al kidika yal dis laih awas ki, dawak muih yal kidika al dis laih awas ki. 12Bahang muih yal kidika rahm muih al kaupak yamna kaunah, muih al kidika bik rahm muih yal kaupak batahnwi; dawak kidika balna bitik laih Papang kaupak kalalahna.
13Manna silp muih yal kidika yakat lani yamtanauh witing tunan mukwas Papang yakat minityulwa kidika yamni kat. 14Di balna nining ban kidika yaklau manikingkawi muih al basni kidika dawakat nanaiwa laih asalni as ki; 15wirlawakat, muih yal niningyakat laih rispik lani as ki basni dawakat nanaiwa kidika; kat witing yakat laih basni kidika nanaini kalana tunani kidika mukna atnin yulni. 16Kaput karang bik, adika yulni muih as yaklau kalbilnin yamwarang kat, witing amanglana atnin ki mayang dawak Papang sutsni balna kat bik amangladas ki yalahnin lani ūk as.
Masan Dawan kasnin dini yakatdutni lani balna kidika
17Manaulnik dini ūk yakat laih, alasmanana yamnik sip awasyang, kat kaluduhtamana kidika laih di daukaltamana yamni diyamnamna kidika pāni yakat. 18Tatuna kidika laih, yayuyulna tawan muihni balna kidika prias yamnin kalududuhwa mani kat, manna pasmangna yakat sahwi kalahnin lani kidika sakki; dawak pis as kau yang kultayang kidika laih rahm kapat ki. 19¡Amanglawas atnin dini awas ki manna laih kalwayahta alahwanamna kidika, kaput laih muihmana kat amanglana atnin wais balna kidika kristian balnapa! 20Kidika sahwi kalahnin lani balna kidika laih, kaluduhtamana yakat masan kasnin dini balna kastamana kidika, uman rahm masan kasnin dini Dawan dini awas ki. 21Kat kasnin awarni yakat, muih balna kidika laih witingna silp silp masan kasnin dini kidika tatuna kakaswi; dawak buas balna kidika laih yuh dadauwakat, ūk balna kidika laih wasak kat bik dadauwi. 22¿Manna di kasnamna dawak di dinamna ūni dismanah? ¿Ais yulni Papang sutsni kidika sau yakat kultamanah dawak asaldamanah di dis muihni balna kidika niningna yakat? ¿Ais manayulkiyah? ¿Alasmanana yamna atnik? ¡Kidika niningkauh laih awas ki!
Masan kasnin dini Dawan dini kidika
(Mt 26:26-29; Mk 14:22-25; Lk 22:14-20)
23Kat yang laih adika lani adika Dawan yaklau dana kat dunayang, dawak yang lawik mananayang: Sihm kidika puknita Dawan Jisas malni kau pāt yakat āna dai kidika, tingni yakat plawar busna kidika duwi 24dawak Papang yakat tingkih kalana usnit kat, bahwi aput yulna: “Adika ki yang muihki nuhni, manna yulmana dauwa kidika. Manna aput yamtanauh yang ayangki usnit yakat.” 25Sihm kaput bik, masan kasnin dini kidika kaswi dana usnitkat, tingni yakat sutak kidika duwi aput yulna: “Adika sunitak laih pramis#Ex 24:8; Jr 31:31-34. wisam ki yang āki karak barangni yamnayang kidika.#Ex 24:6-8. Ditanama usnit kat, yang ayangki usnit yakat yamtanauh.” 26Kaput bahang, adika planiwar busna kasta dawak adika sunitak kau ditanama mani kat, Dawan dauna kidika laih yultanama watwi nawatwi kaiwarang mani kat.
Masan Dawan kasnin diniamput dunin kidika
27Kaput bahang, angdika muihni barangni awas yakauna plawar busna kidika kaswi dawak sutak kidika kaupak diwarang kat, Dawan muihni nuhni dawak āni kidika niningyakat dutni as yamwi. 28Kaput bahang, muih bitik kidika alas alas kulninna karak kulwi talninna ki plawar busna kidika kaswas dawak sutak kidika kaupak bik diwas tanityakat. 29Kat talwas dawi kaswi dawak diwarang kat Dawan muihni nuhni kidika, witing alas wahni kidika kaswi dawak diwi. 30Kaput bahang, manna kaupak mahni kidika siknis ki dawak bik parasnina dis ki, dawak buas bik dadauna. 31Mayang alas yamni kallakdi kaltaldarang kat, Dawan laih wah mayawas atnin ki, 32Dawan yaklau wah mayawa kidika laih amanglana atnin maiyamwi dawak sau muihni balna karak pāt yakat mahawas atnin yulni.#Dt 8:5; Hib 12:5-11.
33Kaput bahang, wirahki balna, di kasnin yulni kaluduhtanama mani kat, biri biri kaltakatalnauh. 34Dawak muih as yuh kalawa kat, witing alas ūni yakat di kaswang, Papang yaklau kidika satni muihni balna kalududuhna yakat wah diawas atnin yulni. Di ūk balna kidika laih yawik manatalki mani barangni yamnayang karang.
Currently Selected:
1 Kurint 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
