ROMA 10
10
1Dojowow akatonokom. Dor e Yahudi ow bajorem, jak aseremomamin. Dor inimasam janim Allah aanimamin. 2E ow, kerja Allah bwemtam, akat aememames. E nat, e kerja bwemtamas amsomnak opok. 3Ar e Allah ow tarowat atakam basakamtiwasam, amsom opok. Aram ow tarowat arma memem aemporfes. Inimas ar, e Allah, ow tarowat atakam basakamtiwas, aotpemfes.
Allah e Kristus asicimames ow, ow tarowat ara, inim atakam asakamtiwcema
4Kristus, bare e Musa tulis aeapomef Jirmec, akarimtiwef. Inimas Allah e Kristus asicimames ow takas, ow tarowat ara, inim atakam asakamtiwma. 5Ow e Jirmec ji aeces, Allah e ow, ow tarowat ara, inim atakam asakamtiwcemarnew? Opoknew? Bare, Musa eras surat aeapomefen. “E Jirmec ji bwekurum ow, jiwne aememcemes.” Inim aeefen. 6E Alkitab nat, Allah e Kristus asicimames ow, ow tarowat ara, inim atakam basakamtiw, bare, inim atakam atawma: “ ‘E onam op ca tometcow?’ inim bi binip bacecerem arapok.” Inim aema. (Inim bi binip, Kristus awames capinmipu batowoney bi binip ara.) 7Wunam: “ ‘E damir ow asan ca neycow?’ inim bi binip bacecerem arapok.” E Alkitab inim aema. (Inim bi binip, e Kristus bajaworomsumutum bi binip ara.) 8E nat, e Alkitab atakam ara: “Allah aratakam, bare or sotop awames. Oram e atakam emeotawfem. Oram e atakam bi binip emececeremfem.” Inim aema. Inim atakam, e Kristus basicim acacapiomamom atakam ara. 9Or atakamnak aotawcem: “Yesus, bare Tuhan ara,” inim aecem, wunam or, Allah, e Yesus aojaworomsumutumef, inim atakam asicimcem, bare Allah or ajortewceman. 10Bare, ow Yesus asicimces, Allah, e ow, ow tarowat ara, inim atakam asakamtiwcema. Wunam, ar inim atakamnak aotawces, Allah e ow ajortewcema. 11E Alkitab atakam: “E aramat ipic asicimames ow takas, namke opok aememcemes.” Inim aema. 12E Yahudi owam, e Yunani owam, bare awcawor ara. E taka aTuhan, bare cowokut ara. Aramat ipic, e janim ar aanimces ow takas, asan akat atetamcema. 13Bare, ow janim Tuhan aanimces, aramat ipic e ow ajortewcema.
14E aramat ipic basicim opok ow nat, janim e aramat ipic bwemanim asan opok. Wunam, e aramat ipic atakam jen baji opok ow, e aramat ipic bwemsicim asan opok. 15Wunam, ow, atakam botaw ow batewosom opok aemces, ow, aramat ipic atakam jen bwemji asan opok. Er e Alkitab atakam jipu ara: “Ow, e Atakam Akat atowotnawces, bare akat cowok ara!” Inim aema.
Israel ow Tuhan basicim opok ara
16Wun ow nat, e Atakam Akat, ji bwe opok. Yesaya atakam ara: “Tuhan. E aotawfom atakam asicimames ow, bare arke opok.” Inim aeefen. 17Bare, ow Kristus atakam aotawces, ow e atakam jen ajicemes. Wunam ar e Kristus asicimcemes. 18Do nat, jonow batowpor ara. E ow, e atakam jen baji opok open? Bare, jen emcajifes. E Alkitab atakam ara:
“Ow, e atakam, e capinmi takas ow emeotawfes. Ow takas e atakam jen emejifes.”
Inim aema. 19Doram jonow botow. E Israel ow e atakam amsom opoknew? Aram amsom araman. E Musa, e ajonow atowminas atep bap ajitefen. Ar Allah atakam aotawefen:
“Dor, dorownak opok ajortewcimin. Car masirin, icim afescomokom. Dor jen ow ajortewcimin. Car masirin, jak amop aememcomokom.”
Allah inim aeefen. 20Yesayaam jak fak epcom, atakam aotawefen:
“Allah inim atakam aotawma: ‘E dor bapowpor opok ow, bare atewfenes. Doram e jonow dor batow opok ow bipu ajisomof.’ ”
Inim aeefen. 21Aramat ipic nat, Israel atakam aotawef. “Allah inim atakam aotawma. ‘Jo ajirowmar, dor e ow batew, ban ajoromamin. E ow nat, atakam bopow ow ara. Aram jen opok ow ara.’ ” Inim aeefen.
Currently Selected:
ROMA 10: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
