ROMA 11
11
Allah, Israel ow botpem opok ara
1Dor jonow batowmin. Allah, e arow aotpemefnew? Ar inimas opok! Doram Israel ipic ara. Dor Abraham urpis ara. Dor Benyamin samat ipic ara. 2Allah, arow botpem opok. Ametnak ara, Allah, e ow aeremtawefen. Ca nat, e Alkitab aman e Elia atakam camsom opoknew? Aramat ipic, e Israel e atakam fak Allah aotawefen: 3“Tuhan. E ow, e oratakam botaw ow, acatiwfes. Aram, e opok jis bafamtam jowse arke afakamfes. Dor cowok aeketemof ara. E nat, aram do bacatiw aempormenes.” Inim aeefen. 4Allah nat, ucimas atep ajitef? “Dor ow tujuh ribu ajiwar aereremapomof. E ow, e ēco juwas Baal bipu jine onok baneyotap opok cowok.” Allah inim aeefen. 5Wowam inim cowok ara. Ow bimis awamces. Allah e ow asan akat mami batetam aemef. Inimas ar e ow aereremtawef. 6Aramat ipic, e ow pok akat aemfes aporef, wunam aereremtawef, inim aranew? Inimas opok. Ar asan akat e ow mami batetam aemef. Inimas ar e ow aereremtawef. Allah, ow, pok akat bwem epen batakampor, wunam e ow bwereremtaw, inimas aemef ayaw, bare ar asan akat e ow mami bwemtetam opok.
7Inimas ara, e ow ucim inimaram? E Israel ow, e apowporfesas batew opok aemfes. E Allah aeremtawef ow bimis nat, eras atawfes. Allaham, e wun ow jen fak aemapomef. 8E Alkitab atakam ara, “Allah e ow bi binip sumu aemapomef. Aram e ow manmok jiwic cimin aemapomef. Aram e ow jen biri cimin aemapomef. Wow ajiwaram, e ow inim inim aemapmes.” Inim aema. 9Daudam atakam aotawefen:
“E ow pokbwi aances, Allah e ow jerat bakemop inim cimin baemcow. Aram e ow siso baneykomop inim cimin baemcow. E ow baneykarawuamesces. Allah e ow pomatam baemcow.
10E ow manmok jiwic baemapces. Ar pok bwemporasin. Ow pok jutur batew jimas bajiriney inim cimin, asan pwicak baemapces.”
Daud inim aeefen.
11Dor jonow batowmin. E Israel ow pok bwey aapomotfes, ar aneykarawuamesfes. Inimas ar bwemosit asan opoknew? Aram aositcemes araman. Ar dosa aemfes. Inimas Alla, e Israel opok ow, ajortewma. Er e Israel ow icim bafesemapomas ara. 12E Israel ow dosa aemfes. Inimas a capinmi samatin samatin asan akat aemapmes. E Israel ow asan pwicak aemapfes. Inimas e Israel opok ow asan akat aemapmes. E nat, e Israel ow takas Kristus ajamkawikurumces, bare e Israel opok owam asan akatnakut aemapcemes.
Allah e Israel opok ow bajortew ara
13Bare, dor atakam e car Israel opok ow aotawmin ara. Tuhan dor atakam e Israel opok ow botaw atewosomfan. Doram e tugas akat cowok apormin ara. 14Er e dosamat icim bafesemapomas ara. Inimas dor e dosamat wun ow, ajortewcimin openow. 15Allah e Israel ow aotpemef ara, aramat ipic e wun samatin samatin takas ajowow atewemef. Aramat ipic, e Israel ow aotewetcow, er e ow aojaworsitces inim cimin akatnakutas ara!
16Ow, e bap amos daci, Allah atetamces, bare e amosbwey epcomam, Allah aras ara. Wunam, ow, os bimi Allah atetamces, bare e os oam Allah aras ara. 17E Israel ow, saitun os o anakat inim cimin ara. Car Yahudi opok ow masirin, wasan saitun os o inim cimin ara. Bare, Allah e wun saitun os o anakat ajakamef, wunam wasan saitun os o, e anakat os cawipu aatamapomef inim cimin ara. E os cawi capi, e os o anakatam, e aatamapomef os oam, e takas ajiwuwutometef. Inimas e wasan saitun os o, akatipic aemapef. Bare, car Yahudi opok ow, Allah e Israel ow asan akat atetamamaras, akac aomomamokom ara. 18Inimas ara, “Dar akat ara. E ajakamef os o, bare pwicak ara,” inim bi binip arapok. Car carma batawsicim arapok. Ca nat, os o cowok ara. Car e os bimi fak botop opok. E os bimi nat, car fak aotopman. 19Car wun ow nat, “Allah e os o anakat ajakamef, er dor e cawi bartamapomas ara,” inim aetotorcomokom openow. 20E atakam, bare atakamnak ara. E Israel ow Kristus basicim opok aemfes. Inimas Allah, e ow, ajakamef inim cimin ara. Ca nat, Kristus asicimamokom ara. Inimas car inim akajiremamokom. Ca nat, eras carma batawsicim arapok. Caram pimicima. 21Allah, e os o anakat bweremapom opok aemef. Bare, aram car bweremapom opok aemceman. 22Jakaperey. Allah, ow, asan akat atetamcemar ipic ara. E nat, aram jokmen aememcemar ipic ara. Ar e dosa ow, jokmen aomcema. Ar nat, asan akat car atetamceman— car Kristus amesomawarcokom ara. Ca nat, Kristus bamesomawar opok aemcokom, Allaham car asakamosomcema. 23E Israel owam ajarewemces, wunam ar Kristus asicimces, bare Allah e ow aoartamapomcema inim cimin ara. Allah, bare fak ara. Inimas ar e ow boartamapom asan araman. 24E car Yahudi opok ow, wasan saitun os o inim cimin ara. Allah, car ajakamfan, wunam car, saitun os anakat cawi aartamapomfan inim cimin ara. E nat, wasan saitun osam, saitun os anakatam, bare awcawor opok. Inimas e Allah aemefas, bare amanut ara. E Israel ow nat, saitun os anakat inim cimin ara. Inimas Allah e bap ajakamef saitun anakat os o, e acawi boartamapom, bare ton cowok ara.
Allah serow Israel owam, Israel opok owam, bajiom ara
25Dojowow akatonokom. Dor, car, amannakut atakam jen baji akat aemamin. Car, “Namsom takas,” inim bi binip baceceremasin. E aman atakam inim ara: E wun Israel ow jen fak aememfes. E jen fak nat, batamemawaras opok. E Allah aereremtawef Israel opok ow takas, Allahpu aenawomces, bare e Israel ow jen fak boemem opok aemcemes. 26Allah masirin, e Israel ow takas ajortewcema. E Alkitab atakam ara:
“E Bajortew ipic Sion ewenawcema. Ar, e Yakub arurpis afasias aemosomcema.
27Dor e ow dosa akokoromosomcimin. Eras e atayi aeofas jipu ara.”
Allah inim aeefen. 28Bare, e Israel ow, e Atakam Akat aotpemfes. Inimas ar Allah ajewew aememfes. Eras nat, car asan akat batetamas ara. Bare, ametnak ara, Allah, e ow aeremtawefen. Ar masirin, wow e ow damos ajiomama. Allaham inimas bwem, atayi e Israel ow arafasut aeefen. Inimas ara, ar e ow damos ajiomama. 29Bare, Allah ay bi binip bacecerem opok aemama. Ar e ajateef ow, botpem opok aemama. Aram e atetamefas botew opok aemama. 30Bap ara, e car Yahudi opok ow, Allah atakam aopowfokom. E Yahudi ow masirin, Allah atakam aopowfes. Inimas wow, Allah, ow serow car ajiomaman. 31E Israel ow, Allah atakam aopowfes. Inimas Allah serow car ajiomfan. Inimasan ara, ar e Israel ow serow aojiomcema. 32Allah, ow takas aratakam bopow atetamef. Er e ow asep jofay serow bajiomas ara.
Allah basicimawar
33Allah, bare asan akatnakut, ow atetamama. Abi binip umutonnakut ara. Aram amsom takasut. E Allah aratakam basakamtiwas, bare amannakut ara. Ow eras amsom bwemem asan opok. Owam, e Allah aemamaras amsom bwemem asan opok. 34E Alkitab atakam ara:
“Allah abi binip amsom ow cam? E atjen Allah bow ow cam?
35‘Dar pok Allah batakamtetam. Inimas aramat ipic wun pok dar amatam atetamcemarow.’ Inim bi binip ow cam?”
Inim aema. 36Bare, Allah pok takas akenemapomefen. E pok takas, aramat ipic ban ton awamses. Er takas aras ara. Bare, dar Allah basicimawarmoc. A atakam, atakamnak ara.
Currently Selected:
ROMA 11: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
