ROMA 9
9
Allah Israel ow aeremtawefen
1E atawmin atakam, bare atakamnak ara. Dor Kristus aras ara. Inimas dor suw atakam opok. E Roh Kudusam dor aomomaman. Inimas e dojak aman atakam, atakam fak dor aotawman. “E atawmem atakam, bare atakamnak ara.” Inim aeman. 2Bare, dor e Israel ow apormin. Inimas dojak pwicaknakut ara. E dojak bini bakari opok aemama. 3E Israel ow, bare dojowow ara. Ar dosamatnak ara. Dor Allah e ow bajortew jak aseremomamin. Inimas dor Kristus bakorompim, wunam jismak asan dorma bajurusem akat aemin— eras bwem, Allah e ow bajortewas ayaw. 4Allah e Israel ow atewetefen. Aram arakatnakuas e ow aporomefen. Aram e ow atetamcowas atakam aotawefen. Aram aJirmec e ow atatitamefen. E owam Allah basicimnak amsomen. Aram e ow atayi aeefen. 5E Israel ow e ametnak ducur ow, bare arurpis ara. Kristusam asmat ipic aememef ara, aram asamat ara. Aramat ipic, bare takas aomomamar. Ar Allah ara. Ow, aramat ipic basicim bakari opok baemces! Bare, e atakam, atakamnak ara.
6E Allah atayi aeefas nat, suw opok. E wun Israel ow arurpis, bare Allah ajowow opok. 7E wun Abraham arurpisam, aruspisnak opok. Allah, atakam, e Abraham aotawef, “Ishak arurpis cowok, e orurpisnak aememcemes.” Inim aeefen. 8Inimas ara, e Abraham ajimef wun jiwi, Allah atiperes memem opok. E Allah atayi aeef jiwi nat, atiperes aememames. 9E atayi aeefas ara, “Ajiscow tahun inim inim pir ara, aofasicimin. Sara masirin, ower jiwi ajispetiwcema.” Inim aeefen. 10Wunam, e Ribka jak asuapef jiwi kapom ara, bare cemen cowkon. E jiwi ajimef ipic, bare darakut Ishak ara. 11-12Allaham e wun jiwi cowok bweremtew, atakam asakamtiwefen. Inimas e jiwi bajisames opok ara, Allah atakam e jiwi arosowoc aotawefen. “E betiw ipic, e aykun ipic, kerja aemtamcema.” Inim aeefen. E jofay nat, e jiwi kapom, bajisames opok. Inimas e jiwi akatas bwemnew, pwicakas bwemnew, amsom opok. Allah nat, e wun jiwi cowok aeremtewef, wunam e wun jiwi bweremtew opok ara. Ar e wun jiwi cowok ajateef. Inimas e aeremtewefas, e jiwi ajateefas jipu ara. Er e jiwi akatas aemfesnew, pwicakas aemfesnew, inim jipuas opok. 13Er Allah e Alkitab aman atakam jipu ara: “Dor Yakub damos ajiomof. Do nat, Esau bifan afayomof.” Inim aeefen.
14Da nat, ucim atakam aotawcom? Allah fasi aranew? Inim arapok. 15Bare, aramat ipic, atakam Musa aotawefen. “Dor ow serow bajiom akat aporcey, e ow serow ajiomcimin. Dor ow sawes akat bom akat aporcey, e ow sawes akat aomcimin.” Allah inim aeefen. 16Inimas ara, Allah, ow bweremtewnew, bweremtew opoknew, er e ow jak baserememas jipu opok. Eram e ow akatas aemfesnew, pwicakas aemfesnew, inimas jipu opok. Er Allah serow e ow bajiom akat aporcowas jipu ara. 17Allah e Alkitab aman, atakam Firaun aotawefen. “Dor or raja ipic atewemfin, eras e dofakas baporomas ara. Eram e samatin samatin takas dojuwas jen bajias ara.” Inim aeefen. 18Inimas ara, Allah, ow serow bajiom akat aporcow, ar e ow serow ajiomcema. Wunam, ar ow jen fak bemapom akat aporcow, ar e ow jen fak aemapomcema.
Allah jak amopam, jak jirowam, memem ara
19Bare, car inim jonow dor atowporcemenokom ara openow: “Allah inimas aemamarnew, ar asmat ow salah atakam ucimaram? Ow, e Allah akat apormaras, bwemopow asan opok.” Inim aecemenokom ara openow. 20Car ara nat, asmat ow cowok ara. Car Allah atep bajit ucimaram. Pok, jonow, e arakenemapomef ipic inim batowpor open? “Or inim cimin akenemapomfin ucimaram?” Bare, ar inim jonow batowpor opok. 21E an afemar ipic, e cow po aomomamar araman. Ar e cow po, an cowok akatipic bafe akat aporcow, wunam mami an cowok bafe akat aporcow, bare aram abi binip araman.
22E Allah aemefasam inim awcawor ara. Aram e ajak amopasam, e afakasam, baporom aememef. Ow pwicakas aemfes. Inimas Allah jak amop aememef. Aram e ow daniwis bemapom aememef. E nat, ar jak jirow aomef. 23Aram e arakatnakutas baporom aememef. Ar e akatnakutas, e serow ajiomef ow, atetamef. Aram e ow, e akatnakutas batewet, atakam bap asakamtiwef. 24E ow, bare dar ara. Dar wun ow Yahudi ow ara. Dar wun masirin, Yahudi opok ow ara. Bare, Allah dar ajateforow. 25Allah, e Hosea aeapomef buku aman, inim atakamam aotawefen:
“E wun ow dorow opok aememawiris. Asep ara nat, dor atakam e ow aotawcimin. ‘Car dorow ara,’ inim aecimin.
Doram e wun samat damos opok aemawiru. Asep ara nat, dor atakam e samat aotawcimin. ‘Dor damos car ajiomamin,’ inim aecimin.
26E asan ara, Allah atakam, ‘Car dorow opok.’ Inim aeef. E nat, e asan cowok, e tetakay Allah atakam aotawcema. ‘Car dotiperes ara.’ ” Inim aecema.
Hosea inim atakam surat aeapomefen. 27Yesayaam e Israel atakam acacapiomefen: “E Israel, ow samat awutut ara. Ar ow e jopir bisin ek inim arkenakut aemapmes. E nat, e ajoremces ow, bare arke opok aemcemes. 28Bare, Allah, asmat ow siksa bwem atayi aeefen. Aram eras asarimemtiwkurumcema.” Yesaya inim aeefen. 29Er e Yesaya bap atawef atakam jipu ara:
“E faknakut Tuhan, jiwi, dar bweremapom opok ayaw, bare dar e kota Sodom inim cimin emeemapfom. Daram e kota Gomora inim cimin emeemapfom.”
Inim aeefen.
E Atakam Akat e Israel owam aras ara
30Da nat, ucim atakam aotawcom? Bare, e Israel opok ow, Allah, ar ow tarowat ara, inim atakam basakamtiw, jak baseremomkurum opok aemfes. E nat, e ow Allah asicimfes. Inimas Allah, e ow, ow tarowat ara, inim atakam asakamtiwef. 31E Israel ow nat, inim bi binip aceceremfes: “Dar Allah Jirmec ji aekurumcom, Allah dar ow tarowat atakam asakamtiwcemarow.” Inim aefes. E ow nat, e Jirmec ji bwemekurum asan opok. 32Allah, e ow, ow tarowat ara, inim atakam basakamtiw opok nat, ucimaram? Bare, e ow abi binip ara: “Allah e akat pok aemawirumas aporcow, ar dar ow tarowat ara, inim asakamtiwcemarow.” Inim aefes. Inimas ara, e ow Kristus basicim opok ara. Bare, ar e “bweybi bapomot ek,” bweybi aapomotfes inim cimin ara. 33E Alkitabam e ek atakam atawma:
“Jakaperey. Dor ek cowok e Sion atatiwmin. Ow, bweybi e ek, aapomotcemes, wunam aneyjuamescemes.
E nat, e aramat ipic basicim ow, namke opok cowok aememcemes.”
Allah inim aeefen.
Currently Selected:
ROMA 9: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
