1 KORINTUS 7
7
Cepes batewet
1Wunam, dor, e car surat dor atewenamfan atakam, atep ajitmin. Owerow bisatiw inim memem, bare akat ara. 2E nat, jursumec ow arke awamces. Inimas owerow aporsipor, cepes batewettotorces. Cepesam aporsipor ower bajuwuttotorces. 3Armipic e arem akat apormaras jipu baemcow. Aremam e armipic akat apormaras jipu baemcow 4Arem e dam, bare aropas opok. Aram armipicas ara. Armipicam e dam aropas opok. Aram aremas ara. 5Caram jimwec mamotpepem arapok. E nat, atakam aamsakamcokom ara: “Bare, dar inim jofay ajiwar isi cowkon opok aemamoc. Dar masirin janim Allah aanimawarmoc,” inim aecokom, bare akat ara. Wunam, e jofay isi cowkon mamoemamesey. Car jak fak opoknew, Iblis, car jursumecas bwem, bacajijimtawasin.
6E cepes batewetam, ower bajuwutam, atakam atawmin ara, dor jirmec car bajirim opok. E nat, car inimas bwem akat aporcokom, bare inimas mamemey. 7Dor ow takas dor cimin memem, bare akat aemin. E nat, Allah, ow aporsipor, aropas atetamcema. E ow aporsipor atetamcemarasam awcawor opok.
8Bare, dor atakam e petew opok cepesam owam, e fwisma cepesam owam, aotawmin ara: Ar, dor inim cimin baememces. 9E nat, ar jak fak opok aememcesnew, petew bajiwces. Cepes, ower jak basinom awutnakut bare pwicak ara. Owerowam, cepes jak basinom awutnakut pwicak ara. Bare, aram petew bajiwces.
10Dor jirmec e petew owam, e ower epcom cepesam, ajirimamin. E jirmec nat, dor opok. E Tuhan, inim jirmec ajirimama: Arem e armipic bajiwem arapok. 11Arem e armipic ajiwemcow, ar tana cowoc inim baememcow. E nat, ar tana cowoc inim memem pwicak aporcow, ar e armipic akac baoememcow. Armipicam, bare e arem bajiwapom arapok.
12Doram atakam e wun ow aotawmin. Tuhanam inimas jirmec bajirim opok. Do nat, inim atakam, akat apormin: Bare, Yesus mamkawi ipic, e arem Yesus mamkawi opok cowoc aporcow, wunam e cowoc, e ipic cowkon bemap akat aporcow, bare, ar e arem bajiwapom arapok. 13Wunam, cowoc, armipic Yesus mamkawi opok ipic aporcow, wunam e ipic e cowoc cowkon bemap alat aporcow, bare ar e armipic bajiwem arapok. 14Allah nat, cowoc, Yesus mamkawi cowoc aporcow, aramat ipicam e armipic akat aporcema. Wunam, Allah, jipic, Yesus mamkawi ipic aporcow, Allah e ipic arem, akat aporcema. Allah inimas bwem opok ayaw, Allah e cajiwi, Yesus mamkawi opok ow ajiwi inim cimin aporma. E nat, Allah e jiwi akat apormar ara. 15Bare, Yesus mamkawi opok cowoc, e armipic Yesus mamkawi ipic aporcow, wunam ar e ipic bajiwem akat aporcow, bare bajiwemcow. Yesus mamkawi opok ipicam, arem Yesus mamkawi cowoc aporcow, wunam ar e cowoc bajiwapom akat aporcow, bare bajiwapomcow. Inimas aemcow, e Yesus mamkawi ipicnew, cowocnew, e bajiwapom opok jirmec amannew, bajiwem opok jirmec amannew, boemap opok aemcema. Bare, Allah car asan akat bemap ajatefan. 16E ormipic Yesus mamkawi opok ipicnew, o nat, e ormipic ajortewcemem openow. Wunam, e orem Yesus mamkawi opok cowocnew, oram e orem ajortewcemem openow. Car inimas camsom opok.
Ow e Allah ajateef jofay aemaptotorfesas ara, inim cowok baemapawarces
17Bare, ow aporsipor, e Tuhan atewemtotorefas jipu baemawarces. Ar, e Allah e ow ajateef jofay aemaptotorfesas, inim cowok baemapawarces. Doram inim atakam e asanin asanin Yesus basicim barewsi ow aotawcimin. 18Allah, e wun ow ajateef ara, e ow sunat epcom ow aememfesnew, bare ar e sunat opok cimin memem arapok. Allah e wun ow ajateef ara, ar sunat opok ow aememfesnew, bare aram sunat bwem arapok. 19E sunat epcomnew, e sunat opoknew, bare penting opok. E nat, Allah jirmec ji bwekurum, bare penting ara. 20Ow, e Allah ajateef jofay aemaptotorfesas ara, inim cowok baemapawarces. 21E Allah car ajatetotorfan jofay, car mami kerja bwemtam ow aememfokomnew, inimas bi binip jirow arapok. E nat, e cakerja aramat ipic car basurumtam atakam asakamtiwcow, bare car inim afisey. 22Tuhan e wun ow ajatetotoref jofay, ar mami kerja bwemtam ow aemapfes. Tuhan nat, e ow, dosa fakas asurumtamef. E ow masirin, Tuhan aras ara. Tuhan e wun ow ajatetotoref jofay, ar mami kerja bwemtam ow bemap opok. E ow, bare Tuhan mami kerja bwemtam ow aemapmes. 23Tuhan e harga awutas atetamef, wunam ar car ajititfan. Inimas car asmat ow mami kerja bwemtam ow memap arapok. 24Dojowow akatonokom. Ow, e Allah ar ajatetotoref jofay aemapfesas, bare inim cowok baemapawerces. Allaham bajamkawiawarces.
Petew opok ow
25Bare, e petew opok ow aemcesas ara. Tuhan jirmec dor bajirim opok. E nat, Tuhan serow dor ajiomfan. Aram atakamnak ipic aemapomfan. Inimas dor e petew opok ow bi binip aceceremaminas, atakam car aotawmin ara. 26Dar wow asan pwicak emapmom apormin ara. Inimas dobi binip ara, ow wow aemapmesas, inim cowok bemapawar akat ara. 27Cepes epcom ow, e cepes bajiwapom arapok. Cepes epcom opok owam, cepes batewetpor arapok. 28Ca nat, cepes atewetcokom, car dosa bwem opok. E tana cepesam ower ajuwutces, ar dosa bwem opok. E petew aemapmes ow nat, ajurusemcemes. Doram car inim bajurusem pwicak aemin.
29E atakam aotawmin ara, dar Yesus Kristus kerja bwemtam asan, bar jirow opok aemamesma. Inimas e petew epcom ow, cepes batewet opok cimin baememces. 30E bwec abwecmes owam, bwec opok cimin baememces. E jak akat aememames ow, jak akat opok cimin baememces. E pok ajititmes ow, pok opok cimin baememces. 31A wow apormom capinmi, bare aaniamescema. Inimas awames capinmias atakam bataw ow, awames capinmias, bi binip bacecerem awut opok cimin baememces.
32Ca jak bini opok memem, akat aemin. Cepes opok ow, bare Tuhan kerja bwemtam bi binip awut aceceremames. Ar Tuhan jak akat baporemem akat aemes ara. 33E cepes epcom ow nat, acepes jak akat baporemem akat aemes ara. Inimas ar awames capinmias bi binip awut aceceremames. 34Bare, ar bi binip arke ara. E tana cepesam, e Tuhan kerja bwemtam bi binip awut aceceremames. Ar tarowatnakut memem akat aemes. E ower epcom cepes nat, awames capinmias bi binip awut aceceremames. Ar amiwis jak akat boporemem akat aemes.
35E atakam atawminas, car bakekemas opok. Er car asan akat mememas ara. Er car e akatas bwem atjen bowas ara. Er car bi binip arke opok, Tuhan kerja bwemtamas ara.
36Bare, jipic cowoc batewet aememcow, wunam, “Dor e cowoc batewet tarey aememawiru. E nat, do batewet opok. Eras bare pwicak ara. E cowocam aw tareynakut emetapef. Dor e cowoc batewet akat.” Inim bi binip aceceremcow, bare ar e akat aporcowas baemcow. Eras bwem bare dosa opok. 37E nat, e ipic jak fak ememcow, wunam atakam arma asakamtiwcow, “Dor petew bajiw pwicak,” inim aecow, bare eram akat. Ar e cowoc batewet opok aecow, ar dosa bwem opok. 38Ar e cowoc atewetcow, eram dosa opok ara. E nat, ar e cowoc batewet opok aecow, bare ar akatnakutas aemcema.
39Cowoc armipic, damir baf opok aemcow, e cowoc wun ipic bajuwut arapok. E nat, e armipic damir aafcow, e cowoc, e akat aporcow ipic, bajuwutcow. E nat, e ipic Tuhan mamkawi ipic cowoka. 40E dobi binip nat, e cowoc ower bojuwut opok aemcow, ar asan akat aemapcema. Dobi binipam ara, e atawmin atakam, Allah Roh arakat apormaras jipu ara.
Currently Selected:
1 KORINTUS 7: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
