1 KORINTUS 6
6
Bwe atakam mamtaw ow, salah atakam basakamtiw
1Ca wun ow, wun Yesus mamkawi ow bwe atakam aamtawcokom, car e Yesus mamkawi opok salah boworpor ow, e salah atakam basakamtiw janim aanimcomokomnew? Car, ow tarowat, e salah atakam basakamtiw janim manim opoknew? 2Asep jofay ara, e ow tarowat, awames capinmi ow asalah, atakam asakamtiwcemes. Inimas camsom opoknew? Bare, car awames capinmi ow asalah atakam basakamtiw ow araman. Inimas car a bwe atakam kanimas, atakam bwemsakamtiw asan opoknew? 3Bare, daram malaikat asalah, atakam asakamtiwcomom. Inimas camsom opoknew? Inimas ara, dar a awapom asmat ow mami bwe atakamas, atakam basakamtiw asan araman. 4Car e mami bwe atakam aamtawcokomnew, car e Yesus mamkawi opok ow, e atakam basakamtiw janim manim arapen? 5E atawmin atakam, car namke bakamapomas ara. E caramaman, e ajowow salah atakam basakamtiw bi binip umuton ipic cowoknakapam opoknew? 6E nat, car Yesus mamkawi ow caramaman bwe atakam aamtawmokom ara. Caram, e Yesus basicim opok ow, e atakam basakamtiw, janim aanimamokom ara.
7E caramaman bwe atakam aamtawmokom ara, eras car Yesus mamkawi fak opok baporomtamas ara. Ow, salah car aemcannew, desen bemap bare akat ara. Ow e capok osom atewetcesnew, desen bemap bare akat ara. Caramaman bwe atakam mamtaw, bare pwicak ara. 8E nat, caramaman salah aamamokom. Car, e cajowow apok osom atawmokom ara. 9Bare, e fasi ow, e Allah Pemerintah Asan bwemfiw asan opok. Car inimas camsom opoknew? Caram inim bi binip jiwic arapok! E jursumec owam, e ēco basicim owam, e cen cemen osom owam, e fa per owam, 10e osom owam, e pok basinom owam, e jokmen bwi jayic owam, e cemew aatmes owam, e pok ces bwe owam, e Allah Pemerintah Asan bwemfiw asan opok. 11Car wun ow, bare inim ow aememfokom. Tuhan nat, e cadosa akokoromosomtamfan. Aramat ipicam car ow tarowat aemapomfan. E Tuhan Yesus Kristusam, e darAllah e Roham, car ow tarowat, inim atakam asakamtiwfes.
Jursumecas
12Dor e pokin pokin takas bwem, bare karow opok. E nat, e wun pok bwem, asan akatas opok. Dor e pokin pokin takas bwem karow opok. E nat, dor e pok bwem bi binip bacecerem awut opok. 13Ow atakam atawcemes, “Amos, bare jak bapitimapomas ara. Jakam, bare amos bapitimapom asan ara.” Inim aecemes. Allah nat, e jamnuk takas daniwis aemtiwcema. E dadam nat, jursumec bwemas opok. E dadam, bare Tuhan aras ara. E Tuhanam, e dadamas ara. 14Allah, bare fak ara. Inimas ar Tuhan aojaworomsumutumef. Aram dar aojaworomsumutumcemarow.
15Camsom opoknew? E cadam aporsipor, bare Kristus adam anakat pomanas inim cimin ara. Inimas ara, dor Kristus adam anakat pomanas, werey cowoc adam, mamkawimapom arapen? Inim arapok. 16E werey cowoc ajamkawicow ipic, e cowoccin dam cowok aememcemes. Inimas camsom opoknew? Bare, e Alkitab atakam ara: “E ow jamnuk, dam das cowok aememcemes.” Inim aema. 17Bare, e Tuhan ajamkawimes ow, e Tuhancin, Roh cowok aememcemes.
18Bare, car e jursumecas omar mamjisosawarey. Ow e wun dosa takas aemces, ar kawey ow ajurusumcemes. E nat, jursumecas bwem ow, arop dam ajurusumcemes. 19Inimas camsom opoknew? E cadam, bare Roh Kudus acem ara. Allah e Roh Kudus car atetamtotorfan. Car caropas opok. 20Allah, harga awutas car ajititfan. Inimas car e cadam, akatas mamemey. Inimas bwem, bare Allah basicimas ara.
Currently Selected:
1 KORINTUS 6: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
