1 KORINTUS 5
5
Yesus basicim ipic jursumecas aemef
1Ow atakam aotawfes ara, caramaman, jursumec ow awamces. E Yahudi opok samatam, inim jursumecas awutut bwem amsom opoken. E jursumecas ara, jipic cowok e aricipic arem cen osom aatamemama. 2Ca nat, carma atawsicimamokom. Car bwec opok ucim inimaram? Bare, car e jursumec ipic caramaman bapakapiemey. 3Dor car cowkon memem opok. Do nat, car cowkon aememamin inim cimin ara. Inimas dor e inim aemef ipic adosa, bare atakam emcasakamtiwof. 4Car ajarewsiapcokom ara, doram car akac ajarewsiapcimin inim cimin ara. E Yesus daTuhanam, afakas atetamamarow. 5Car masirin, e ipic, Iblis aotasimemtamey. Iblis masirin, e ipic adam daniwis baemcow. Er e Tuhan aoenawcow jofay, e ipic bajoremas ara.
6E carma atawsicimamokom, bare pwicakut ara. Bibit roti kanimnakas, e daci roti bini epcom, awut aworomtiwcema. Car inimas camsom opoknew? 7Bare, e tarey bibit roti biwosomkurumey. Inimas car ay daci roti bini inim cimin aemapcomokom. Bare, e daBakamsow Pokbwi domba jiwi, Kristus ara. Ow e domba jiwi emcacatiwfes. Inimas ara, car bibit opok roti inim cimin ara. 8Inimas ara, dar e pokbwi aemencom, dar e tarey bibit epcom roti memen arapok. E pwicakasam, e jursumecasam, memen arapok. Da nat, e bibit opok roti aemenmocom. E roti e jursumec opokasam, e atakamnakasam, ara. 9E surat car aeapomtamfin ara, dor, car e jursumec ow dam bakawi arapok, inim atakam car aotawfin. 10E aotawfin atakam nat, dor e Kristus mamkawi opok jursumec owam, e pok basinom owam, e osom owam, e ēco basicim owam, inim ow atakam opok. Dor inim ow atakam aotawfin ayaw, bare car awames capinmi bakan bajios ara. 11E surat car aeapomtamfinas nat, “Ow, ‘Dor Kristus car akac ajamkawimom,’ inim aeces, e nat ar jursumec ow aranew, pok basinom ow aranew, ēco basicim ow aranew, cemew atakam bataw ow aranew, jokmen bwi jayic ow aranew, osom ow aranew, bare car e ow amos akac ban arapok.” Inim aefin. 12-13Dor e cesen ow adosa atakam basakamtiw opok. Bare, Allah, e ow adosa, atakam asakamtiwcema. Ca nat, e Yesus basicim car akac barewsi ow adosa, atakam mamsakamtiwey. Bare car e dosa ipic mamotewerosomey.
Currently Selected:
1 KORINTUS 5: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
