1 KORINTUS 4
4
Kristus atakam botaw batewosom ow
1Ow, dar Kristus kerja bwemtam ow, baporcarowos. Aram, dar Allah amannakut atakam manmok batiw ow baporcarowos. 2Kerja aramat ipic, e akerja bwemtam ow, aratakam ji bwekurum, jirmec ajirimcema. 3Bare, car aranew, wun atakam mamsakam ow aranew, e aemofas, akat aranew, pwicak aranew, inim atakam asakamtiwcokom, bare dor jak bini opok. Doram eras atakam dorma basakamtiw opok ara. 4Dobi binip ara, dor pwicakas bwem opok aemof. E nat, dor eras, atakam dorma basakamtiw arapok. E dor aemofas, akat aranew, pwicak aranew, inim atakam basakamtiw ipic, bare Tuhan ara. 5Inimas ara, car, ow e aemfesas, akat aranew, pwicak aranew, inim atakam basakamtiw bap arapok. Tuhan aenawcow, eras atakam asakamtiwcema. Aramat ipic, ow e jiwic asan curuw aemfesas, umuton aporomtamcema. Aram, ow ajak aman atakam asakamtiwfesas, umuton aotawcema. E jofay ara, Allah, ow aporsipor aemawirisas jipu, asicimcema.
6E atakam atawminas, bare doratakam ara. Eram Apolos atakam ara. E atakam ji aecokom, car asan akat aemapcomokom. Ametnak ara, ow atakam atawfes, “Car e tulis aeapomfes atakam bofe arapok.” Inim aefes. Bare, car e Apoloscin aemamomas jipu acowoycokom, car e atakam jen ajikurumcomokom. Car masirin, wun ow basicim, wunam wun ow bifan bafayom, inimas bwem opok aemcomokom. 7“Car ow akat ara. Wun ow pwicak ara,” inim atakam ca otawfan? E aomomamokomas takas, bare Allah atetamfan. Ca nat, eras carma aomomfokom inim cimin aememamokom. Inimas carma atawsicimamokom. Ucim inimaram?
8Bare, car jak emcapitapfokom. Pok awutut emcatewetfokom. Caram raja ow carop aememfokom. E nat, car eras carop aemfokom. Dar car akac opok. Car raja emcaememfokom ayaw, bare akat ara. Inimas daram raja ow car cowkom memem ara. 9Dobinip ara, Allah, e awapom atakam botaw batewosom ow, juwas opoknakut ow, e wun ow bipu atewemforow. Dar, ow dar bacatiw atakam aamsakamfes ow inim cimin ara. Dar malaikat takasam, asmat ow takasam, banep bafas inim cimin ara. 10Dar Kristus kerja aemtamamom. Inimas ow, “E jen ow,” inim atakam aotawmarowos. E cabinip nat, “Dar Kristus ajamkawimom. Inimas dar bi binip epcom ow ara.” Inim aemokom. Bare, dar kumit ow ara. Ca, nat, fak ow ara. Ow bifan dar afayomamarowos. Ow nat, car asicimaman.
11Wow ajiwaram, dar amostoam, bwitoam, aemapmom. E dapakaianam pwicak ara. Owam omop dar aafmarowos. Daram cem opok ow ara. 12Daram kerja awutut aemamom. Ow cemew aatcemarowosnew, dar Allah, asan akat e ow bom, janim aanimcomom. Ow ajurusumcemarowosnew, dar inim aememcomom. 13Ow atakam pwicak aotawcemarowosnew, dar atakam akat e ow aotawcomom. Daram ow pwicaknak ow inim cimin ara. Daram wow ajiwar, ow e akokoromosomcemes ponowas inim cimin ara.
14Dor a atakam tulis car aetamamin ara, er namke car bakamas opok. E nat, er atjen car aowminas ara. Bare, car dotiperes ara. Dor car damos ajiomamin. 15Car Kristus mamkawi amememtamaman ow, bare arkenakut openow. E nat, carisepes arke opok ara. Dor, e Kristus Yesus atakam akat, car aotawfin. Inimas dor caricipic aememof. 16Bare, dor janim fak car aanimamin. Car e aemaminas jipu mamcowoyey. 17Inimas ara, dor Timotius car atiwinamtamfin. Dor Kristus mamkawi e aramat ipic amememtamof. Ar masirin, dotiw ara. Dor aramat ipic damos ajiomamin. Doram aramat ipic asicimamin. Aramat ipicam e Kristus Yesus ajamkawiminas, binip car acomomtamceman. Er e Yesus basicim barewsiap ow asan takas, atakam amememtamciminas jipu ara.
18Car wun ow, dor car bojinawom opok, inim binip aceceremfokom. Car masirin, carma atawsicimfokom. 19E nat, Tuhan akat aporcow, dor car sarim aojinawomcimin. Dor masirin, e arma batawsicim ow, e aratakam cowok jen baji opok aemcimin. Doram e ow Allah fakas aomomfesnew aporcimin. 20Bare, e Allah Pemerintah Asan bafiw ow, atakam e ewen picin cowok arapok. Ar Allah fakas baomomces. 21Ca nat, ucim akatas aemamokom? Ajinawomcey ara, car dor warim pok batowominaw akatnew? Car dor damos jak epcomam, demesnakapam, car bajinawom akatnew?
Currently Selected:
1 KORINTUS 4: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
