Zakariya 2
2
Txiwoniso txa wuraru: Ngoti yo pima ngu yona
1Ni tshumete kambe ni guleta maso angu, se ni wona wamwamna, a nga ti ti ni ngoti manzani, yo pima ngu yona. 2Se ani ni to khani:
Uya hani kani?
Se ene a to ni xamula a txi khene:
No ya pima Jerusalema, kasi kuwona kuanama ni kulapha ka kona.
3Se wona taku, ngelozi yi yi nga ti ti womba-womba ni nani yi to khukha, kukhukha yimwani ngelozi yi yi hingeta. 4Se yi txi yi gela tiya:
Tutuma, u ya gela dizambi diya u txi khawe: Jerusalema ku na akiswa ku nga mikhokhola yo mbi na maguma, ngu mhaka ya kutala, ka vathu, ni ka sihari. 5Se ani, kuwomba Mkoma kwakwe, ni na va diguma da mndilo do mranganyeta, se ani nipune ni na va wudhumo hagari kwakwe.
Kutxhatxheka ka Vaisrayeli vale va ku wukhumbini
6Yaho! Anu! Tutumani, ngu ditikoni ka Wuphemba, kuwomba Mkoma, nguko ni mi hangalasile ku nga mune wa mimoya ya nzumani, kuwomba Mkoma.
7Awe! Siyoni! Ti txhatxhise awe u zumbako ni mwanana wa dihorana wa Bhabhilona.
8Nguko Mkoma wa Mabutho a Tiyimbi a khene:
Msana ka wudhumo, ene a ni rumete ka matiko ale ma nga mi handa; nguko wule a mi gwesako, a gwesa pfhaka ya diso dakwe. 9Nguko wonani taku, ni na guleta dianza dangu txitimwi kwawe, se vona va nata maha sikarawa, sa va va nga va thumela.
Ngu kumaha keto, mi na tiziva tito, Mkoma wa Mabutho a Tiyimbi a ni rumile.
10Tsaka, u tsakisisa, awe dihorana da Siyoni, nguko wona taku nata, ni nata aka hagari kwako.
Kuwomba Mkoma.
11Se ka ditshiku dile, matiko amangi ma na sengeletana ka Mkoma, meva vathu vangu; ni na aka hagari kwako, kambe u na ziva tito, Mkoma wa Mabutho a Tiyimbi, a ni rumile kwako. 12Sekoko Mkoma a na fumela Judha, eva thomba yakwe ka ditiko do sawuleka, kambe a na sawula Jerusalema.
13Yothse nyama yi na malale masoni ka Mkoma, nguko ene a wukile ka wukhalo wakwe wo sawuleka.
Currently Selected:
Zakariya 2: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
