Zakariya 3
3
Txiwoniso txa wumune: Joxuwa Mphaxeli wa Hombe
1Se Txizimu txi to ni komba Joxuwa, mphaxeli wa hombe, awu a nga ti ti masoni ka Ngelozi ya Mkoma, se Sathani a ti ti ka dianza da txinene da Joxuwa, kasi ku mmangala. 2Aniko Mkoma a to khene ka Sathani:
Mkoma wa kukawuka awe Sathani, ina, Mkoma, wu a nga sawula Jerusalema, wa kukawuka; ina hi nga txisoso txo thaviswa ha mndiloni kani?
3Sekoko, Joxuwa, a ti ambate syambalo sa nzambwa, a di emile masoni ka ngelozi. 4Sekoko ngelozi yi txi womba-womba, yi to ruma vale va nga ti ti masoni ka yona, yi txi kha yona: Mthaviseni syambalo siya sa nzabwa. Se yi to kha yona ka Joxuwa:
Wona taku ni thavisile wubihi masoni kwako, ni na kuambeka syambalo sa siphya.
5Ani ni to khani: Muambekeni txigoko txo basa ha msungo kwakwe. Se va to muambeka txigoko txo basa ha msungo kwakwe, ni ku muambeka syambalo; kambe Ngelozi ya Mkoma yi ti ti kona hale. 6Se Ngelozi ya Mkoma yi to tsanisa Joxuwa, yi txi kha yona:
7A womba tiya Mkoma wa Mabutho a Tiyimbi: U txi tsimbila ngu tinzila tangu, u xayisa sileleto sangu, ngawe u no lamula nyumba yangu, ni kuxayisa mitendela yangu, ni na kuninga wukhalo hagari ka awa ma kuho hawa. 8Engisa koko, awe Joxuwa, mphaxeli wa hombe, awe ni vangana vako, vale va nga khalahatsha masoni kwako, nguko mbavamna va mapimo amanene; wona taku ni na tisa txithumi txangu, atxi i ku kuthunga. 9Nguko ndide hawa dirigwi di ni ngadi veka masoni ka Joxuwa; txitimwi ka dirigwi di da dimwedo, ku ni mtxhanu wa maso ni mambidi; wona taku ani ni na kenyela mibhalo ya kona, kuwomba Mkoma wa Mabutho a Tiyimbi, ni na thavisa wubihi wa ditiko diya ngu ditshiku dimwedo. 10#Wona ni ka: Mik. 4:4. Ka ditshiku donedo, kuwomba Mkoma wa Mabutho a Tiyimbi, mmwani ni mmwani kwanu, a na ramba muakelani wakwe, kuya zumba nayo hahatshi ka mivhinya, ni hahatshi ka mikuwu.
Currently Selected:
Zakariya 3: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
