Masalmo 84
84
Kuxuva nyumbani ka Txizimu
Disalmo da mtxawa wa Kora. Ka mthangeli wa vaembeleli-ngu mpfumawulo wa “Sigowolo.”
1Ya tsakisa ngutu nyumba yako yo sawuleka,
Mkoma wa Mabutho a Tiyimbi!
2Moya wangu wa navela
ni kuxuva siluvelo sa Mkoma;
yotshe mbilu yangu ya embelela ngu kutsaka
ka Txizimu txi txi hanyako!
3Hambi sindili sa mana ko sisala
ni timbeluvelu ti ni sisaka,
si nga ti akela kasi si zumba ka sona,
ni vanana va sona, hafuhi ka siluvelo sako,
Mkoma wa Mabutho a Tiyimbi,
Mfumeli wangu ni Txizimu txangu.
4Va katekile vale va zumbako nyumbani kwako
va ku dhumisako yotshe mbimo.
5Va katekile vale va manako kuvhunwa ngu ngawe,
avale va navelako kutsimbila
kala mmangoni ka Siyoni.
6Ngako va txi tshawunyeta mkova wa kuoma,
wa hinduka wu maha wukhalo wa milonga,
ngu kunelwa ngu mati o khata a nzuma,
kumaneka sisima so tala.
7Vona va tsimbila na mtamo wu txi engetelwa ditshiku ni ditshiku
kala veya ti kombisa Siyoni masoni ka Txizimu.
8 Mkoma, Txizimu txa Mabutho a Tiyimbi,
engisa mkombelo wangu;
ni engise, awe Txizimu txa Jakobe!
9Awe Txizimu, katekisa mfumeli wathu,
awu a nga sawulwa ngu ngawe.
10Ndinene ngutu kuzumba
ditshiku dimwedo nyumbani kwako,
kupinda kuzumba digumi da mazana a masiku hahanze!
Ni randa kuzumba ha txikeni
ka Nyumba ya Txizimu txangu
kupinda kuzumba matendani ka vabihi.
11Nguko Mkoma liwoningo lathu ni m'vhikeli wathu;
ene wa randa ni kudhunda
avale va hanyako ngu kululama
kha va lambeli ni txa tximwetxo tximaha txa txinene.
12 Mkoma wa mtamo wotshe,
va katekile avale va kuthembako!
Currently Selected:
Masalmo 84: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
