Masalmo 83
83
Awe Txizimu, xula valala!
Disalmo da Asafe. Ndando.
1Txizimu, u nga malale!
U nga khutarele mawoko
u txi wonetela, awe Txizimu!
2Wona valala vako
va maha pfilu-pfilu;
ni vale va ku vengako va kuwukela.
3Va lukile marindi
o wukela vathu vako,
ve maha txikungo txo daya
vale u va vhikelako.
4Vona va kha vona:
“He va fuviseni hagari ka vathu,
kasiku di si swi di txi khumbulwa
ditina da Israyeli.”
5Votshe va mahile txikungo ngu mbilu yimweyo
txo kuwukela;
ve pfana kasi kulwa ni nawe.
6Ava va mahako tiya ngu Vaedhomi ni Vaismayeli,
liveleko la Mowabhi ni la Agari,
7ngu Vagedhali, Vaamoni ni Vaamaleki,
Vafilista ni vaaki va Tiro
8hambi ni Vasiriya va patanile navo
ve tshanganisa mtamo wawe
ni wa va ka Loti.
9Awe Txizimu, va mahe nga ti
u nga mahisa tona vathu va Midhiyani ni Vasisera,
mwendo ku nga ti u nga mahisa tona
ka Jobhini mlongani ka Kixoni.
10Va mbambamisilwe ditikoni ka Endori
sirumbi sawe si sina mafuni!
11Maha ka manganakana awe
nga ti u nga maha ka Orebhi ni Zehebhi;
maha ka tinduna tawe
nga ti u nga maha ka Zebha ni Tshalimuna,
12avale va nga ti xambanyile
kuteka ditiko da Txizimu.
13Awe Txizimu txangu,
va hangalase nga lithulu,
va txi nga mwasi
wu wu huhiswako ngu diphuho.
14Nga ti mndilo wu hisako txitinga,
nga ti wuhya wu hisako mimango,
15va tutumise nawe
ngu txihuhuri txako,
u txi va hinga ngu txingulu txako!
16Va thele tingana, Mkoma,
kasiku va txi kulava!
17Va na zive ti to ngawe wekha
u wombwako taku u Mkoma,
18Kasiku va na tiziva
awu di lumbako kwakwe ditina daku Mkoma,
U Nyatxitimwi ka otshe mafuni!
Currently Selected:
Masalmo 83: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
