Masalmo 82
82
Txizimu mlamuli wa votshe
Disalmo da Asafe
1Txizimu txi khalahatshile msengeletanoni ka nzumani;
txi lamula hagari ka sizimu txi txi kha txona:
2“Mi na leka ditshiku muni kulamula ko soholoka
ni kuemela vabihi kani?
3Emelani sikulungu ni va vo felwa ngu vaveleki;
lamulani ngu kululama ava vo xaniswa ni sisiwana!
4Hanyisani ava va xaniswako ni sisiwana,
mi txi va hulukisa manzani ka vabihi!
5Vona vabihi kha va zivi, kambe kha va pimisi;
va hanyela txidemani. Ngu konaho,
asi si tsanisako mafu sa tsekatseka!
6 # Wona ni ka: Joh. 10:34. Ani ni wombile ni txi khani: Anu mi sizimu,
kambe anu vamwani motshe mi vanana va Nyatxitimwi.
7Hambi keto, mi na fa kufana ni votshe vathu;
kambe mi na wa kufana ni wuhi mthangeli.”
8Ngono, Txizimu, u ta lamula mafu,
nguko otshe matiko ma lumba awe!
Currently Selected:
Masalmo 82: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
