Masalmo 80
80
Awe Txizimu, hi kombe wumbilu wako
Disalmo da Asafe. Wufakazi wokari. Ka mthangeli wa vaembeleli - ngu mpfumawulo wa “Makhoñwa.”
1 # Wona ni ka: Eks. 25:22. Awe m'dyisi wa ka Israyeli, hi engise
u kombisako nzila ka liveleko la ka Josefa
kota mtxambi wako, hi engise,
awe u ku ha txikhaloni txitimwi ka makerubhima, ti wonekise!
2Komba wuhombe wako ka tihunzu ta Efrayime,
Bhenjamini ni Manasi!
Wuka u txi ta hi hanyisa ngu mtamo wako!
3 Awe Txizimu, tshumela u hi wusa,
hi kombe liwoningo la khohe yako, kasi hi na hanya!
4 Mkoma, Txizimu txa mtamo wotshe,
u na henya kala mbimo muni
u txi lamba kuengisa vathu vako va khongelako kani?
5U hi dyisile dipawu da mirongo,
u txi hi seta digombe da kutala ngu mirongo.
6U hi mahile tikhumbi ti mifumo ya vaakelani
yi bangelanako ngu tona,
u lekile valala vathu va txi hi ruketela.
7Awe Txizimu txa Mabutho a Tiyimbi; tshumela u hi wusa,
hi kombe liwoningo la khohe yako, kasi hi na hanya!
8U wuyisile ngu Egipta mndonga wa m'vhinya,
u tutumisile vathu va mahedheni, u txi wu phaya.
9U wu lulamisete mafu,
se wona wu mite mikoloti,
wu txi na va, wu eneta dotshe ditiko.
10Mimango yi fenengetilwe ngu mtsudi wa m'vhinya
se madhavi a wona me pinda
kulapha ka mikedhari ya Txizimu.
11Madhavi a wona ma navile kala lineneni
se mathungedwa a wona me hoka mnamboni ka Ewufrate.
12Ngu kutxani u txi khundumusa
libhiyo la thembwe yako,
u leka avale va pindako ngu nzila
va txi hapha mauvha a wona kani?
13Khumba ya txitinga ya khura ngu wona
mndonga wule wa m'vhinya
ni sihari sa txitinga sa wu dya.
14O awe Txizimu txa Mabutho a Tiyimbi, hi wone na u di nzumani,
hi kukombela wonisisa ta tinene
u xayisa m'vhinya wuwa.
15Xayisa m'vhinya wuwa u nga wu phaya,
tximilwa txi u nga txi kulisa.
16Avale va nga ganga mndonga wuwa, va txi wu hisa,
va fuvise ngu kuhenya kwako.
17Aniko katekisa m'thu wu awe u nga msawula,
awu u nga mkulisa kasiku e kuthumela.
18Kha hi na mbi ngadi hi hambana ni nawe.
Hi hanyise, kasiku hi na dhumisa ditina dako!
19 Mkoma, Txizimu txa Mabutho a Tiyimbi,
tshumela u hi wuyisa,
hi kombe liwoningo la khohe yako,
kasi hi na hanya!
Currently Selected:
Masalmo 80: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
