Masalmo 66
66
Kudhumisa ni kubonga Txizimu
Disalmo. Ndando. Ka mthangeli wa vaembeleli.
1Dhumisani Txizimu ngu kudhinda ka litsako la hombe,
anu motshenu matiko!
2Embelelani wundhumo wa ditina da Txizimu;
ningani wudhumo ka wundhundo wa Txizimu.
3Wombani mi txi khanu ka Txizimu:
“Mithumo yako ya diwukisa, Txizimu!
Mtamo wako mbwa hombe ngutu
aha koza valala vako ve nama
ve dhudhumela masoni kwako.
4Ditiko dotshe da kukhozela
di txi kudhumisa ngu tindando;
votshe va embelela tindando ka ditina dako.”
5Ngonani mi ta wona mithumo ya Txizimu,
sidiwukiso si txona txi nga si maha masoni ka vathu.
6 # Wona ni ka: Eks. 14:21; Jox. 3:14-17. Txi hindute linene li maha mafu a kuoma;
vakale vathu va tshawunyetile mnambo ngu mikondo.
Ngu toneto, a hi tsakeni!
7Ngu mtamo wa txona txa fuma yotshe mbimo;
ngu maso a txona txa xayisa mifumo,
ti to sigevenga si si txi wukeli.
8Vathu, bongani Txizimu txathu!
Embelelani tindando ta ku txi dhumisa!
9Ngu Njizimu txi hanyisako wutomi wathu
kha txi tumeli ti to mikondo yathu yi rithimuka.
10Txizimu, u hi dukile;
u hi basisile ku nga ti ti mahwako ka silivhela!
11U hi lekile hi txi wa ha mlawuni;
u hi rwekile mrwalo wo nemela ngutu.
12U mahile ti to hi txi welwa ngu mtungu;
hi pindile ngu hagari ka mndilo ni ka mati,
aniko, ngu magwito, u hi humutile.
13Ni na phaxa mhamba ya sihari,
amu nyumbani kwako
ni tatisa sixambanyo si ni nga si maha,
14sithembiso si ani nipune ni nga ku mahela,
mbimo yi ni nga ti kuxuphekani.
15Ni na hisa txiluveloni kwako sihari so nona;
ni na ku luva ngu tihamba, marole ni tiphongo.
16Ngonani mi ta engisa,
motshenu mi kholwako ka Txizimu!
Ni nata mi xawutela atile txona txi nga ni mahela!
17Ni txi dhani ni txi txi kombela txivhuno;
ni txi dhumisile ngu tindando.
18Idiku ani ni ti mahile kubiha kokari,
Mkoma nga a sa engisa dipswi dangu.
19Aniko Txizimu txi ni engisile
txi engisile mkombelo wangu.
20Txi na bongwe Txizimu,
txi nga mbi tsukula mkombelo wangu,
txi nga mbi ni lambela lirando la txona.
Currently Selected:
Masalmo 66: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
