Masalmo 58
58
Txitsayiso ka vobiha
Ndando ya Dhavhidha. Ka mthangeli wa vaembeleli ngu wuembeleli waku “U nga Khundumuse”
1Anu vafumeli, ina ma lamula timhaka
ngu nzila yo lulama kani?
Ni kuthethisa vathu ngu nzila yo lulama kani?
2Aniko, mi luka makuhu mbiluni,
mi wusa mazunga ha ditikoni ngu manza anu.
3Vobiha va ti hambukisile
kukhukhela kuvelekwani kwawe;
avale va wombako makuhu va phazamile
kukhukhela ha wananani kwawe.
4Wuxungu wawe wu fana ni wa minyoka;
va fana ni mamba ya diphanzeve, yi ti tsivako tinzeve.
5Kasiku yi si engisi tindando ta va masalamuso,
ni wutxhari wa vanyamsoro.
6Awe Txizimu, va kunulele makwasa mkanani kwawe,
Mkoma, dula titshaya ta singonyamoana.
7Va na mwalale nga mati ale ma phwako;
ngako va txi khwinza tingove tawe,
ti na maneke ti di komokete.
8Vona va na nyeke kufana ni khutumba;
kufana ni txirumbu txo txhiswa, va nga wone ditambo.
9Tikhadi tawe ti sanzi kuhala
ngu kupfa mndilo wa tikhuni
to nakana mwendo to oma,
ti na hangalaswe ngu txihuhuri ti tshotshwa kule.
10Mlulami a na tsaka, ngako a txi wona kuphotelwa
a na samba mikondo yakwe
ngu mnoha wa vabihi!
11Se vathu va na womba va txi kha vona:
“Kha dikhuri mlulami ana ni hakhelo!
Ngu ditshuri txi ho Txizimu
txi txi lamulako ha mafuni!”
Currently Selected:
Masalmo 58: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
