Masalmo 59
59
Kuvhikelwa ka nzumani masoni ka valala
Ndando ya Dhavhidha. Ka mthangeli vaembeleli - ngu wuembeleli wa “U nga Khundumuse.” Yo bhalwa ngu Dhavhidha mbimo yile Sawule a nga ruma tixoli nyumbani ka Dhavhidha kasi kuya m'daya
1Txizimu txangu, ni hulukise ka valala vangu;
ni vhikele ka vale va ni wukelako.
2Ni hulukise ka vo biha
u txi ni hanyisa ka vathu va sigevenga,
3nguko a va va ni riyelako,
va wukela muhefemulo wangu,
vathu va mtamo va maha sikungo so ni wukela,
ni sa hambunyeta txilo hambi kuve ni mnandu, awe Mkoma.
4Vona va tutumela ku ni xomela, ni si nga ni mnandu.
Wuka, Mkoma u txi wona u ta ni vhuna!
5Awe koko Mkoma, Txizimu txa Mabutho a Tiyimbi,
Txizimu txa Israyeli, wuka u tsayisa otshe matiko:
U ngave ni wumbilu ka ni wihi
wa votshe vale va mahako kubiha.
6Va wuya ni minova; va txi dilisa ku nga timbwa,
na va txi horolokela didhoropani.
7Sisofu sawe sa maha likwaha;
mapswi awe ma fana ni matxhari o hinda;
nguko va kha vona: “I mani a hi engisako kani?”
8Aniko awe, Mkoma, u na vaseka;
u na va tseketsela votshe vamatiko.
9Ni na va ni txi vhikelwa ngu ngawe, Txizimu txangu,
nguko awe u m'vhikeli wangu wa hombe.
10Txizimu, txi txi ni randako, txi nata kwangu,
txi txi ni ninga kuwona kuxulwa ka valala vangu.
11 Mkoma, u nga va daye,
kasiku vathu vangu va si divali;
va hangalase u txi va xowokisa ngu mtamo wako.
Mkoma, awe u m'vhikeli wathu!
12Ngu txionho txa txisofu txawe,
ni dipswi da txisofu txawe,
va sungwa ngu kutikulisa;
kumweko ni wubihi ni makuhu va ma humisako.
13Va daye, va fuvise kuhenyani kwako,
kasi ku va si swi ve hanya!
Va na ti zive tito, Txizimu txa fuma ka va ka Israyeli,
ni ti to txona txa fuma, ka dotshe ditiko!
14Va tshumela ve wuya ni minova
na va txi dilisa ku nga timbwa,
ni kuhorolokela didhoropani.
15Va peperukela va txi lava sakudya
ngako va si khuri, va tenderukela wotshe wusiku.
16Aniko, ani ni na embelela mtamo wako;
ni mixo, ni na dhumisa ngu litsako wumbilu wako,
ngu ku uve wuthavelo wangu wo guleka ngutu,
ni m'vhikeli wa da ditshiku da kuxaniseka kwangu.
17Kwako, Txizimu txangu,
ni na embelela tindando ta ku kudhumisa,
nguko awe u mkhokhola wangu wa hombe,
awe u Txizimu txi txi ni randako!
Currently Selected:
Masalmo 59: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
