Masalmo 57
57
Kutsana masoni ka Txizimu
Ndando ya Dhavhidha. Ka mthangeli wa vaembeleli - ngu wuembeleli wa “U nga Khundumuse”
Yo bhalwa ngu Dhavhidha, mbimo yi a nga thava ka Sawule, kona phakoni
1Telwa ngu wumbilu ni nani,
awe Txizimu, telwa ngu wumbilu,
nguko moya wangu wu themba awe.
Ni lava kusisala hahatshi ka mabhapi ako,
kala phango yi txi pinda.
2Ni na dila ka Txizimu, Nyatxitimwi,
Txizimu txi txi ni ningako
sotshe si ani ni si lavako.
3Txona txi na rumela txivhuno txa txona ngu nzumani
txi txi ni hanyisa ka vale va lavako ku ni fuvisa;
Txizimu txi na rumela lirando la txona ni ditshuri da txona.
4Moya wangu wu randetwe
ngu tingonyamo, ti ti dyako vathu;
makwasa a tona ma fana ni siholoma ni miseve
se lidimi la tona li fana ni matxhari o lotwa.
5Awe Txizimu, kombisa wuhombe wako nzumani
wudhumo wako wu na fenengete dotshe ditiko!
6Va riyile txikelemu ve txi veka ha nzilani kwangu
moya wangu wu namile;
va kete diphala masoni kwangu,
aniko ngu vona va nga hojomela ka dona.
7Mbilu yangu yi tsani, awe Txizimu,
mbilu yangu yi tsani
ni na embelela tindando ta ku kudhumisa.
8Moya wangu, wuka! Wukani awe txitende ni nawe haripa!
Nyamsi ni lava kuwusa wuronga!
9Ni na ku bonga, hagari ka vathu, awe Mkoma,
ni na kudhumisa ngu tindando hagari ka mifumo.
10Lirando lako nda hombe, li hoka ni tinzumani
ni kuthembeka kwako kumanela marefu.
11Awe Txizimu, kombisa wuhombe wako nzumani,
wudhumo wako wu na fenengete dotshe ditiko!
Currently Selected:
Masalmo 57: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
