Masalmo 56
56
Txizimu txi ni nani
Ndando ya Dhavhidha. Ka mthangeli wa vaembeleli - ngu wuembeleli aku “Txituvani txo Malala txi di Kule.” Yo bhalwa ngu Dhavhidha, mbimo yi a nga ñolwa ngu Vafilista, didhoropani ka Gate.
1Telwa ngu wumbilu ngu ngani, awe Txizimu,
nguko waho m'thu a lavako ku ni kandetela,
a txi ni xanisa ni ku ni lwisa dotshe ditshiku.
2Valala vangu va ni xanisa yotshe mbimo;
mbavangi, awe Nyatxitimwi,
avale va lwako ni nani.
3Ka ditshiku di ni no thava,
ani ni na themba kwako.
4 Ni themba Txizimu, se ni dhumisa mapswi a txona;
ni themba Txizimu, se kha ni na mbi thava txilo.
M'thu a nga ni mahela kubiha ka txani kani?
5Vona va txitxa mapswi angu yotshe mbimo;
mipimiso yawe njo ni mahela to biha.
6Va ramba sikungo, va txi ni baramela,
va txi wonisisa makando angu,
na va txi rinzela mbimo ya ku ni daya.
Ina vathu vo bihisa tiya va nga huluka kani?
7Awe Txizimu, hi hulukise ka wubihi wawe;
kuhenyani kwako va wise hahatshi evo vathu.
8Awe wa tiziva ti ni nga xanisekisa tona,
u sengeletile mirongo yangu amu ka txiya,
ina totsheto khwa bhala dibhukuni kwako, kani?
9Ka ditshiku di ni no kukombela txivhuno,
se valala vangu va txi tshumelela msana,
ni na va ni tiziva ti to Txizimu txi ni nani.
10Ni themba Txizimu, se ni dhumisa mapswi a txona;
inna, ani ni themba Mkoma, ni txi dhumisa mapswi akwe;
11ni themba Txizimu, se kha ni na mbi va ni dizowa.
M'thu a nga ni mahela kubiha ka txani kani?
12Sithembiso si ni nga ku mahela, awe Txizimu,
ni lava ku si tatisa ngu kubonga,
13nguko u hanyisile moya wangu ka lifo
u hulukisile mikondo yangu ka tiphango,
ti to ni txi hanya masoni kwako, Txizimu,
liwoningoni ka va va hanyako.
Currently Selected:
Masalmo 56: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
