Masalmo 55
55
Mkombelo wa m'thu wu a xaniswako
Txithokozelo txa Dhavhidha. Ka mthangeli wa vaembeleli - ngu wuembeleli wa txiya txa tingoti.
1Engisa, Txizimu, mkombelo wangu;
riya nzeve u txi engisa kudila kwangu!
2Ni engise, u txi ni xamula;
nguko kuxaniseka kwangu
kha ku ni ningi kudikha, na keta.
3Ngu kuengisa diguwa da valala,
ni kuxaniswa ngu vaonhi.
Vona va ni vangela dikhombo
kambe vona va ni xanisa ngu txiviti.
4Mbilu yangu ya bhibhikela khanani kwangu;
dizowa da lifo di wite txitimwi kwangu.
5Dizowa ni kudhudhumela si ni kamile ngutu;
ni fenengetilwe ngu txidema.
6Se ani ni ti khani: I ti ku no mana mabhapi nga txituvani,
ni ndi na puruma ni ya zumba kule ni humula!
7Ni ndi na thava ni txi ya kule ngutu,
ni txi ya hanyela txiwulani.
8Nga ni txi lava wuthavelo ngu kukuluveta
kasi kuhuluka ka diphuho
da mtamo ni da txihuhuri.
9Va hangalase, Mkoma,
u hambanisa tidimi tawe,
nguko ni wona tshofu ni vhilinganya didhoropani.
10Wusiku ni mitshikari va horolokela maguma a didhoropa,
kambe mndani ka dona
ku tate ngu wugevenga ni kuvengelana.
11Mndani ka didhoropa kumaneka wubihi;
magondoni ka dona kha ku gwiti kuxanisana ni kuxengetelana.
12Idiku awule a nga ni onhela i mlala,
ani ni ndi na timisela ngu ngene;
idiku awule a nga ni wukela
ngu wule a ni vengelako,
nga ni txi sikota kusisala.
13Aniko ngawe, m'thu wo fana ni nani,
mngana wangu wo thembeka,
14awule ni sengelako nayo amu ka milayo yo tsakisa,
awule ni nga ti longoloka nayo ngu kutsaka
ni ya Dithepeleni ka Txizimu!
15Lifo li na kanganyise valala vangu!
Va na relele va txi hanya ditikoni ka vafi,
nguko wubihi wu akile timbiluni kwawe.
16Ngu didhawa dangu, na kombela ka Txizimu;
Mkoma a na ni hanyisa.
17Ni minova, ni mixo, ni dhina ni na khongela;
ni na kwangula, se ene a na engisa dipswi dangu.
18Ene a hulukisile ngu kudikha moya wangu
ka vale va nga txi ni lwisa,
nguko i ti vavangi avale va nga ti ni lwisa.
19Txizimu, txi txi fumako kala kupinduka,
txi na ni engisa, txi txi va veka hahatshi.
Nguko vona kha va hunduluki
kambe kha va thavi Txizimu.
20Va guleta manza awe ve wukela vale va nga ti ni kudikha navo;
ve bhenula txitumelelano txawe.
21Va womba-womba mapswi o swililika kupinda bhotela,
aniko mipimiso yawe nja yimbi;
va womba-womba mapswi o tshamba kupinda mtona,
kasi ona matxhari o lotwa.
22“Veka wutomi wako manzani ka Mkoma
se ene a na kuxayisa,
txima kha na mbi leka m'thu wo lulama
e xaniseka yotshe mbimo.”
23Awe, Txizimu, u na va rethela diphalani ka kuhokoma.
Vathu va i ku sigevenga ni va va makuhu
kha va na mbi hanya hafu ya masiku awe.
Aniko ani, ni themba awe.
Currently Selected:
Masalmo 55: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
