Masalmo 31
31
Kuthemba Txizimu
Ka mthangeli wa vaembeleli. Disalmo da Dhavhidha.
1 Mkoma, ani ni themba awe;
u nga ni leke ni txi wiswa tingana.
Ni hulukise, nguko awe u lulamile.
2Ni engise ta tinene u txi kuluveta ku ni hulukisa.
Awe maha dirigwi dangu da wuvhikeli;
awe maha mkhokhola wangu
wa wuthavelo ni kuhanyisa!
3Awe u dirigwi dangu ni mkhokhola wangu!
Ni tsimbitise u txi ni vhikela,
ngu lirando la ditina dako da dinene.
4Ni thavise ka mlawu wu va nga ni riyela ngu wona,
nguko awe u wuthavelo wangu!
5 # Wona ni ka: Luk. 23:46. Na ti veka ngu kuhetiseka manzani kwako;
ni hanyise, Mkoma, nguko awe u wo thembeka!
6Na nyenya avale va khozelako sizimu sa makuhu,
kambe themba yangu ni yi veka ka Mkoma.
7Ani ni na tsaka ni txi giya ngu lirando lako.
Awe u woni kuxaniseka kwangu,
u txi ziva ni kupandiseka kwangu;
8khwa ni leka ni txi wa manzani ka mlala,
u ni mahile ni txi hanya ngu kutxhatxheka!
9Telwa ngu wumbilu ngu ngani, Mkoma, nguko na pandiseka;
maso angu ma dokovela ngu kuxaniseka,
kumweko ni moya wangu ni mmidi wangu.
10Ni hanya wutomi wangu ngu kuxaniseka,
malembe a wutomi wangu ma pinda ni di kuxuphekani.
Kupandiseka ka heta mitamo yangu;
mmidi wangu wa goma.
11Ni m'thu wa kurukwa ngu valala vangu ni va akelani,
na nyenywa ngu vale ni zivanako navo.
Avale va ni wonako hanzila va ni thava.
12Vathu va ni divate timbiluni kwawe,
kufana ni m'thu wu a nga fa.
Ni fana ni txiya txo tshotshwa.
13Ni engisile va txi womba-womba kubiha ngu ngani;
ni taletwe ngu dizowa, nguko valala vangu
va ni rambete txikungo, va lava ku ni daya.
14Aniko themba yangu yi kwako, Mkoma;
se ani ni huwelela ti to awe u Txizimu txangu!
15Wotshe wutomi wangu wu manzani kwako;
ni hulukise ka valala vangu va ni hingako!
16Wona ngu maso a wunene txithumi txiya txako;
ni hulukise ngu lirando lako.
17 Mkoma, u nga ni leke ni txi wiswa tingana,
nguko ani ni dilela kwako.
Vona vabihi va na wiswe tingana
ve tshotshwa diphalani.
18Malata vathu va makuhu,
nguko va womba kubiha ngu Txizimu txo sawuleka,
txa kwa mbi na magwito,
ngu kutiguleta ni kukanyisa.
19Mbwa hombe ngutu wunene wako, Mkoma!
Awu u nga wu lulamisela avale va kuthembako;
awu u mahelako vona vale
va kuthembako, masoni ka votshe.
20Ngu kuvhikelwa masoni kwako,
wa va emela ka sikungo so biha sa vathu;
kota txibhiya txo tsana, awe wa va vhikela
ka siruko sa valala vawe.
21A na dhumiswe Mkoma,
awu a nga ni mahela wumbilu wakwe wo xamalisa,
ni txi nga a to ni veka mkhokholani.
22Mu kukanakanani kwangu ni pimisile
ti to u ni hambukisile masoni kwako;
aniko, mbimo yi ni nga kudhana,
u engisile huwa ya mikombelo yangu.
23Randani Mkoma, anu motshenu mi ku sirandwa sakwe!
Mkoma a vhikela avale va mthembako,
aniko wa tsayisa ngutu avale va mu eyisako.
24Tsanisani, mi tsanisa timbilu,
anu motshenu, mi thembako Mkoma.
Currently Selected:
Masalmo 31: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
