Masalmo 30
30
Kubonga ka wu a nga hulukiswa ka lifo
Disalmo da Dhavhidha. Ndando ya kutulwa ka Dithepele
1Ni na dhumisa wuhombe wako, Mkoma,
nguko awe u ni hulukisile
kambe khwa tumela ti to valala vangu va txi ni seka.
2 Mkoma, Txizimu txangu,
ni ku kombete txivhuno, se awe u ni hanyisile.
3 Mkoma, awe u ni hulukisile ka lifo;
u ni hanyisile, ani se ni nga ti relete diphalani.
4Embelelani, mi txi dhumisa Mkoma, anu motshe mi mthembako;
m'bongeni mi txi huwelela tito, a sawulekile!
5Kuhenya kwakwe nga mbimo yayidotho dwe,
aniko wunene wakwe mbwa yotshe mbimo.
Ni wusiku hi otela hi txi dila,
kambe ni mixo ha peka mikulungwani ya litsako.
6Ani ni ti tipfa ni di tsani ni txi pimisa nokha
ni txi khani: “Kha ni na mbi va ni kuxulwa.”
7Awe u wamnene kwangu, Mkoma,
kambe u ni ningile kutsana,
aniko, ngako u txi ni tshuralela, na tala ngu dizowa.
8Na kwangula kwako, Mkoma;
na ku kombela u ni pfela wusiwana.
9Dibhindu muni di no maneka ngu kufa kwangu,
ni kurelela kwangu diphalani ka vafi kani?
Ina lithulu li nga kudhumisa kani?
Mwendo li nga womba-womba ngu ditshuri kani?
10Ni engise, Mkoma, telwa ngu wumbilu ngu ngani;
Mkoma, ngono u ta ni vhuna!
11Hindula kudila kwangu ku txi maha kusinya ka litsako;
ni thavise mkhwasi u txi ni ambeka si ambalo sa litsako.
12Ti di ngeto, Mkoma, Txizimu txangu,
ni na embelela ngu ngawe ni si gwiti,
ni na kudhumisa kala kupinduka.
Currently Selected:
Masalmo 30: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
