Masalmo 119
119
Kuguleta mlayo wa Txizimu
1
1Va katekile vale va tsimbilako ngu nzila yo lulama,
ava va hanyako madingano
ni Mlayo wa Mkoma.
2Va katekile avale va xayisako sileleto sakwe,
va mlavako ngu yotshe mbilu,
3Ava va si mahiko kubiha,
va tsimbilako tinzilani ka Mkoma.
4 Mkoma, awe u hi ningile milayo yako,
u txi hi gela ti to hi yi xayisa ngu yotshe mbilu.
5Ani na ti dhunda ngutu kuzumba ni di tsani
nzilani ko thembeka, ni xayisa milayo yako!
6Sekoko kha ni na mbi wa tinganani,
ngako ni txi vekisa sirumo sako.
7Ni na sikota ku kudhumisa
ngu mbilu ya yinene,
ngako ni di gondile mithetho yako yo lulama.
8Ni na xayisa milayo yako!
U nga ni leke ngu nyalehe!
Na veka dipswi dako mbiluni kwangu
2
9Di na sikotisa kutxani dijaha kululamisa
nzila ya wutomi wa dona kani?
Ngu kuva di txi xayisa sileleto sako!
10Ani na ti lava ku kuthumela ngu yotshe mbilu;
u nga ni leke ni txi hambana ni sirumo sako.
11Ni vekile mbiluni kwangu mahungu ako,
kasi ku ni si ku onheli.
12Bongwa, Mkoma!
Ni gondise milayo yako!
13Ni na wuyelela kuhuwelela ngu dipswi do pfala
yotshe mithetho yi u nga yi womba ngu txisofu txako.
14Na tsaka ngutu ngu kulondisa milayo yako
kupinda kumana totshe tithomba.
15Ni na alakanya sirumo sako,
ni txi khatalela tigondo tako.
16Ni na tsaka ngu milayo yako;
kha ni na mbi divala mithetho yako.
Ni lava kuziva kuranda kwako
3
17Ninga txithumi txako wutomi wawungi
se ani ni na vekisa mithetho yako.
18Tula maso angu,
kasiku ni wona sidiwukiso sa mlayo wako.
19Ani ni mpindi ka diya ditiko;
u nga ni sisele sirumo sako.
20Moya wangu wa karateka yotshe mbimo,
ngu kulava kuziva mithetho yako.
21Awe wa kawuka avale va ti guletako;
avale va ti vangelako dikhombo
ngu ku ti hambanisa ni sirumo sako.
22Ni ponise ka siruko sawe ni sinyenyo sawe,
nguko na xayisa sileleto sako.
23Vathu va mtamo va tshangana,
va txi ni mahela txikungo,
aniko ani, txithumi txiya txako,
ni na alakanya milayo yako.
24Milayo yako ya ni tsakisa,
ngu yona yi ni ningako wusungukati.
Ni gondise mlayo wako
4
25Ni gumile mtamo, ni txi wa hahatshi;
wusa kambe mtamo wangu,
madingano ni txithembiso txako.
26Ni ti tshanzile kwako totshe ti ni nga ti maha,
se awe u ni xamute;
ni gondise milayo yako!
27Ni ninge mapimo a kulondeta sileleto sako,
se ani ni na alakanya mithumo yako ya kuxamalisa.
28Moya wangu wa dila ngu kuxaniseka;
ni tsanise, madingano ni txithembiso txako.
29Ni hambukise ka tinzila ta makuhu
u txi ni vhuna kuhanya ngu mlayo wako.
30Ni sawute kulondeta nzila ya ditshuri;
ni xambanyile kulondeta mithetho yako.
31 Mkoma, ni londetile milayo yako;
u nga ni leke niwa tinganani!
32Ni na khutalela kuvekisa sirumo sako,
nguko atiya ti na ni ninga wuzivi wa hombe.
Ni na xayisa mlayo wako ngu yotshe mbilu yangu
5
33 Mkoma, ni gondise kuziva
nzila ya sileleto sako;
kasiku ni na si xayisa kala magwito.
34Ni ninge mapimo, kasiku ni xayisa mlayo wako;
ni na wu vekisa ngu yotshe mbilu yangu.
35Ni ninge kutsimbila ngu nzila ya sirumo sako,
nguko ngu sona si ni tsakisako.
36Ni ninge mbilu ya kuranda sileleto sako
i si nga timbiti ta kuranda tithomba ta ha mafuni.
37Vhikela maso angu ti to ma si woni wukanganyisi,
se ni wuse ni tsimbila ngu nzila yako.
38Tsanisa kwangu, txithumi txako, txithembiso txako,
txithembiso txi u txi mahako ka vale va ku thavako.
39Ni hulukise ka siruko si ni si thavako,
nguko kulamula kwako ku lulamile.
40Wona ti ni randisako tona milayo yako;
ni hanyise, nguko awe u lulamile!
Milayo yako ya ni tisela litsako
6
41 Mkoma Txizimu, wumbilu wako wu nate kwangu;
u txi ni hanyisa madingano ni txithembiso txako.
42Konako ni na sikota kuxamula avale va ni ruketelako,
nguko ni themba dipswi dako.
43Ni ninge kuwomba ditshuri yotshe mbimo,
nguko ani ni themba sileleto sako.
44Otshe masiku ni na xayisa mlayo wako,
ni na wu vekisa yotshe mbimo, kala kupinduka.,
45Kambe ni na hanya ngu kutxhatxheka,
nguko ni londetile sileleto sako.
46Ni na nuwela milayo yako ka vafumeli
kuwalo ni wammweyo a no ni wisa tingana.
47Milayo yako ya ni tsakisa
ngu toneto na yi randa.
48Sirumo sako na si xonipha ni ku si randa;
ni na zumba ni txi alakanyela mlayo wako.
Txithembiso txako ngu txona i ku kuverela kwangu
7
49Alakanya dipswi di u nga ni gela, ani txithumi txako;
dipswi donedo di ni ningile kuthemba.
50Kupandisekani kwangu dona di mahile tximbuwetelo txangu,
nguko txithembiso txako txi ni ningile kuhanya.
51Vathu vo ti guleta va ni poyilete ngutu;
hambi keto kha na hambuka ka mlayo wako.
52 Mkoma, ni khumbute malamulelo ako a kale
se ka ona, ni mani ku ti thavelela.
53Na pandiseka mbiluni kwangu,
ngako ni txi wona vabihi
va si khatali ngu milayo yako.
54Milayo yako ya ni ninga kuthula tindando,
ka diya ditiko ani ni ku mpindi wa nzila.
55Ni wusiku, na kualakanya, Mkoma,
kasiku ni xayisa mlayo wako.
56Ni mahile tiya ani,
nguko ni xayisile mlayo yako.
Na thembisa kulondeta milayo yako
8
57Awe Mkoma, ngawe u kuthomba yangu
ani ni xambanya kuvekisa mithetho yako.
58Na kukombela ngu yotshe mbilu yangu:
Telwa ngu wumbilu ngu ngani
madingano ni ti u nga thembisa.
59Ni manekile ni txi pimisela mahanyelo angu,
ni tshumete ni londisa milayo yako.
60Ni kuluvetile, kha na swela
kuvekisa sirumo sako.
61Vathu vo biha va ni riyete mlawu,
aniko ani kha ni divali mlayo wako.
62Hagari ka wusiku na wuka ni txi kudhumisa
ngu mhaka ya mithetho yako yo lulama.
63Na ti tshanganisa ni vale va kholwako kwako,
ni vale va xayisako sileleto sako.
64 Mkoma, mafu ma tate ngu lirando lako:
Ni gondise milayo yako!
Ni themba milayo yako
9
65 Mkoma, u ni xayisile ta tinene ani txithumi txako:
U mahile madingano ni kuthembisa kwako.
66Ni gondise kululama kha kwati, ni wuzivi,
ina, nguko ni khotwe ka milayo yako.
67Mbimo yiya ni nga sinzi kuxaniseka,
ni ti lekile nzila ya yinene;
aniko konkuwa na londeta dipswi dako.
68Awe u wamnene kambe u mkatekisi;
ni gondise sileleto sako.
69Vathu vo ti kulisa va luka makuhu ve ni lumbeta;
aniko ani ni na vekisa sileleto sako
ngu yotshe mbilu yangu.
70Timbilu tawe ti bangile, kha va engisi,
aniko ani na tsaka ngu mlayo wako.
71Ndinene ni nga mana kutsayiswa,
kasi ku ni gonda silayelo sako.
72Mlayo wu u nga ni ninga, kwangu wu ni lisima ngutu
kupinda#119:72 Vaheb. magumi a mazana a nzalama ni a silivhela. tithomba tatingi ta nzalama mwendo ta silivhela.
Na dhunda kupimisa mlayoni kwako
10
73Ani u ni vangile, u txi ni wumba ngu manza ako;
ni ninge mapimo, kasiku ni gonda sirumo sako!
74Avale va ku dhumisako va na tsaka,
ngako va txi ni wona,
nguko va na themba dipswi dako.
75 Mkoma, ani na tiziva ti to mithetho yako nja yinene
khu hoxisi, ngako u txi ni tsayisa.
76Lirando lako li na ni thavelele,
madingano ni dipswi di u ngadi womba ka txithumi txako!
77Ni kombe wumbilu wako se ni na hanya,
nguko mlayo wako, wa ni tsakisa.
78Vatseketseli va na xowokiswa ngu tingana,
nguko va ni xupha ni si nga ni txionho;
ani ni na pimisela sileleto sako.
79Va nate kwangu avale va ku xoniphako,
avale va zivako sileleto sako.
80Mbilu yangu yi nave ya kuhetiseka ngu kuvekisa milayo yako,
kasiku ni si wi tinganani.
Milayo yako ya dingana kuthembwa
11
81Moya wangu wa navela ngutu kuhanyiswa ngu ngawe;
nguko ani ni themba dipswi dako!
82Maso angu ma rinzela kuwona
kutatiseka ka txithembiso txako
se ani koko ni to khani:
“U na ni thavelela yihi mbimo kani?”
83Ani ni kumbile kufana ni msava
wa kudivalwa txithatheni,
aniko kha na divala milayo yako.
84I mbimo muni ni ku ngadi ni txi na rinzela kani?
U na lamula mbimo muni vale va ni xanisako kani?
85Va kutiguleta, avale va si khataliko ngu milayo yako,
va kete maphala masoni kwangu.
86Yotshe milayo yako nja ditshuri;
ni vhune kulwa ni vale
va ni xanisako ngu ku ni singeta.
87Kudotho va ti lava ku ni fuvisa ha mafuni
niko kha ni zivi kueyisa sileleto sako.
88Ni hanyise ngu wumbilu wako,
se ni na vekisa milayo yi u ni gelako.
Dipswi dako nda kala kupinduka
12
89Dipswi dako di tsani nzumani
awe Mkoma, kala kupinduka.
90Kuthembeka kwako ku tsani ka liveleko ni liveleko,
u mahile mafu me zumba ma di tsani.
91Sotshe si ho kala nyamsi,
ngu kurumwa ngu ngawe,
nguko sotshe si thumela awe.
92Idiku mlayo wako wu ti si ni tsakisi,
nga ni di fite kale kupandisekani kwangu.
93Kha ni na mbi dhuka ni divala sileleto sako,
ina, nguko u ni hanyisile ngu sona.
94Ni hanyise nguko ni wako
ani na londeta sileleto sako!
95Avale va mahetelako kubiha
va lava ku ni fuvisa,
aniko ani ni na alakanyela sileleto sako.
96Ni gondile ti to sotshe si ni magwito,
aniko milayo yako yi anamile ngutu.
Ati ni randisako tona milayo yako
13
97 Mkoma, mlayo wako na wu randa ngutu!
Na wu alakanyela otshe masiku.
98Sirumo sako yotshe mbimo si ni nani,
se sa ni ninga kuziva ngutu
kupinda valala vangu.
99Na pimisa ngutu kupinda votshe vagondisi vangu,
nguko ni zumba ni txi alakanya ngutu sileleto sako.
100Ngu toneto, na engisa ngutu kupinda madhota,
nguko na xayisa sileleto sako.
101Ni hambukile ka totshe tinzila to biha,
kasiku ni xayisa mithetho yako.
102Txima kha ni zivi kueyisa mithetho yako,
nguko ngawe u ni gondisako.
103Mapswi ako ma tshamba ngutu;
ma lombela ngutu kupinda wulombe!
104Ngu sileleto sako ni gondile kupima;
ngu kota yeto, na nyenya totshe tinzila ta makuhu.
Dipswi dako liwoningo
14
105Dipswi dako i liwoningo la mikondo yangu,
dilambu da nzila yangu.
106Ni xambanyile ni tsanisa:#119:106 Mwendo: tsanisile.
Ti to ni na vekisa mithetho yako yo lulama.
107 Mkoma, ni ha kupandisekani ka hombe;
ni hanyise kota kuthembisa kwako!
108 Mkoma, engisa mkombelo wangu wa kubonga,
ni gondise mithetho yako.
109Wutomi wangu wu ha phangoni yotshe mbimo,
aniko kha ni divali mlayo wako.
110Avale va mahetelako kubiha,
va ni riyete ngu mlawu
aniko ani kha ni divali sileleto sako.
111Thomba yangu ya yotshe mbimo ngu sileleto sako,
nguko sa tsakisa mbilu yangu.
112Mbilu yangu yi pimisile kuxayisa milayo yako;
eyo yi na va hakhelo yangu kala kupinduka.
Ani na randa kugondisa kwako
15
113Na nyenya vakanganyisi,
aniko ni randa mlayo wako.
114Awe ngawe wuthavelo wangu ni txitxhavangu txangu,
ani ni themba dipswi dako.
115Tsulani kule anu vabihi,
kasi ni na xayisa sirumo sa Txizimu txangu!
116Ni tsanise, nga ti u nga ni thembisa, se ni na hanya;
u nga ni leke ni txi wa tinganani, nguko ani ni themba awe.
117Ni vhune, se ni na huluka
ni na xonipha milayo yako yotshe mbimo.
118Awe wa va nyenya votshe vale va hambanako ni milayo yako,
nguko mipimiso yawe nja wukanganyisi.
119Votshe vabihi va ha mafuni u va wona kota mabivi,
ngu toneto ani ni randa sileleto sako.
120Mmidi wangu wa dhudhumela ngu dizowa masoni kwako,
ngu txithavo txi ni ku natxo ka mithetho yako!
Ani na londeta kugondisa kwako
16
121Ni xayisile mlayo ni kululama,
u nga ni ningele manzani ka valala vangu.
122Thembisa ti to u na ni vhuna ani txithumi txako;
u nga leke vathu vo ti kulisa va txi ni xanisa.
123Maso angu ma dokovela ngu kurinzela kuhanyisa kwako,
na ni txi verela kuhanyiswa,
nga ti u nga thembisa tona.
124Ni xayise ani txithumi txako,
madingano ni lirando lako;
ni gondise milayo yako!
125Ani ni txithumi txako.
Ni he mapimo, nguko ni lava ku engisisa sileleto sako.
126 Mkoma, njikhati txako txa kuthuma;
vona va nyenyile mlayo wako.
127Ngu toneto, na randa ngutu milayo yako,
kupinda nzalama ya yinene ngutu.
128Ngu toneto, na dhunda sileleto sako
na nyenya totshe tinzila ta makuhu.
Txhamuselo ya dipswi dako ya tisa liwoningo
17
129Sileleto sako sa xamalisa;
ngu toneto na si xayisa ngu yotshe mbilu yangu.
130Txhamuselo ya mapswi ako ya tula maso,
ya ninga mapimo ka sisiwana.
131Na tula txisofu txangu ni txi hefemuteka
nguko ni navela sirumo sako.
132Ni wone, u txi telwa ngu wumbilu ngu ngani,
nga tile u ti mahako ka vale va kurandako.
133Tsanisa mikondo yangu nzilani ka dipswi dako,
u nga tumele ti to wubihi wu txi ni fuma.
134Ni hulukise mu ka kuxuphwa ngu vathu,
kasiku ni na xayisa sileleto sako.
135Khohe yako yi na ni woninge ani txithumi txako;
ni gondise milayo yako.
136Mirongo yangu ya khulunga nga mnambo,
nguko mlayo wako kha wu xoniphwi.
Eto ku nga tsanisa tona kuthembisa kwako
18
137 Mkoma, awe u lulamile
mithetho yako ni yona yi lulamile.
138U hi ningile sileleto sako ngu kululama,
ni kuthembeka ka hombe.
139Txiviti txangu txa ni hisa nga mndilo,
nguko valala vangu kha va khatali ngu mapswi ako.
140Sithembiso sako si tsani ngutu;
ngu toneto ani txithumi txako na si randa.
141Ni m'dotho, kambe va ni kanyisa,
aniko kha ni divali milayo yako.
142Kululama kwako kha ku na magwito
ni mlayo wako, mbwa ditshuri yotshe mbimo.
143Ni taletwe ngu kupandiseka ni sikarato;
aniko milayo yako ya ni ninga kutsaka.
144Sileleto sako nzo lulama yotshe mbimo;
ni he mapimo ni na hanya.
Kuverela kwangu ku mu ka txithembiso txako
19
145 Mkoma, ni khongete ngu yotshe mbilu;
ni xamule, nguko ni lava kuxayisa milayo yako.
146Na kukombela, ni hanyise,
kasiku ni na xayisa sileleto sako.
147Wu sinzi kuhuma wuronga,
na vindukela ni txi kudhana,
ni themba mapswi ako.
148Na pileka wotshe wusiku ni si oteli,
kasiku ni alakanyela milayo yako.
149Engisa, Mkoma, dipswi dangu, ngu wumbilu wako;
ni hanyise, madingano ni txithembiso txako.
150Va tshuketela hafuhi avale va ni xanisako
ngu makungo a kubiha,
ve hambana ni mlayo wako.
151Aniko awe, Mkoma, u hafuhi;
sotshe sirumo sako nza ditshuri.
152Kukhukhela ha wananani kwangu,
na si ziva sileleto sako;
awe u si tsanisile kala kupinduka.
Otshe mapswi ako nga ditshuri
20
153Wona kuxaniseka kwangu, u ni txhatxhisa,
ina nguko kha na divala mlayo wako.
154Vhikela mhaka yangu, u txi ni hanyisa;
ni hanyise kota kuthembisa kwako!
155Kuhanyiswa ku kule ka vabihi,
nguko kha va lavi sileleto sako.
156Wunene wako mbwa hombe, Mkoma;
ni hanyise, madingano ni sithembiso sako.
157Mba vangi valala vangu ni vaxanisi vangu;
aniko ani kha ni hambani ni milayo yako.
158Ngako ni txi wona sindaka-milayo, na pandiseka,
nguko kha si xayisi mithetho yako.
159 Mkoma, wona ti ni dhundisako tona mithetho yako;
ni hanyise, madingano ni lirando lako.
160Mapswi ako ma tsaniswa ngu ditshuri;
mithetho yotshe ya kululama kwako,
ya simama kala kupinduka.
Ani na ninga txithavo ka milayo yako
21
161Vathu va mtamo va ni xanisa ni si nga ni mnandu,
aniko mbilu yangu yi thava mapswi ako.
162Na tsaka ngu sithembiso sako,
ku nga wule a manako thomba yayingi.
163Na nyenya makuhu, kha ni ma lavi,
aniko ni randa mlayo wako.
164Na kudhumisa mtxhanu wa sikhati ni simbidi ngu ditshiku,
ngu mhaka ya mithetho ya kululama kwako.
165Avale va randako mlayo wako va hanya ngu kudikha ka hombe,
kuwalo txilo txi va khuvekisako.
166 Mkoma, ani ni rinzela kuhanyisa kwako,
nguko ni xayisile sirumo sako.
167Na xayisa sileleto sako
na si dhunda ngu yotshe mbilu.
168Na vekisa sirumo sako ni sileleto sako;
awe wa tiziva totshe tinzila tangu!
Na mana litsako mlayoni kwako
22
169Huwa yangu yi na hoke kwako, Mkoma;
Ni he mapimo, madingano ni kuwomba kwako;
170Txikhongelo txangu txi na hoke masoni ka khohe yako;
ni txhatxhise, madingano ni kuwomba kwako!
171Ni na embelela ndando ya ku kudhumisa,
nguko awe u ni gondisile kuziva milayo yako.
172Ni na embelela mahungu ako,
nguko milayo yako yi lulamile.
173Dianza dako di na ni vhune,
nguko ani ni tshatile kulondisa sileleto sako.
174 Mkoma, ani ni vilela kuhanyiswa ngu ngawe,
nguko mlayo wako wu tsakisa mbilu yangu.
175Nihe wutomi, kasiku ni sikota ku kudhumisa,
mithetho yako yi na ni vhune.
176Ni pepesekile kufana ni nvuta yo mwalala;
tsimbita txithumi txiya txako,
nguko ani kha na divala sirumo sako.
Currently Selected:
Masalmo 119: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
