Masalmo 118
118
Kubonga Txizimu ngu mhaka ya kuxula
1 # Wona ni ka: 1 Vak. 16:34; 2 Vak. 5:13; 7:3; Ezr. 3:11; Mas. 100:5; 106:1; 107:1; 136:1; Jer. 33:11. Bongani Mkoma nguko ene mbwa mnene,
nguko lirando lakwe la simama kala kupinduka.
2Va na wombe vanana va ka Israyeli va txi kha vona:
“Lirando lakwe la simama kala kupinduka.”
3Va na wombe vaphaxeli va Txizimu va txi kha vona:
“Lirando lakwe la simama kala kupinduka.”
4Va na wombe ava va kholwako kwakwe va txi kha vona:
“Lirando lakwe la simama kala kupinduka.”
5Kupandisekani kwangu ni khongete ka Mkoma;
se Mkoma a ni engisile a txi ni hanyisa.
6 Mkoma a ni nani, kha ni thavi txilo;
m'thu a nga ni maha txani kani?
7 Mkoma a ni nani; ngene m'vhikeli wangu
se ni na va wona valala vangu va txi khoziswa.
8Ndinene ngutu kuthemba Mkoma
kupinda kuthemba vathangeli;
9ndinene ngutu kuthemba Mkoma
kupinda kuthemba vathangeli va mtamo.
10Votshe vamatiko va ni randete,
aniko ngu ditina da Mkoma, ni va phatulete
11Vona va ni randete ngu ka otshe madhawa,
aniko ani ni va xute ngu ditina da Mkoma.
12Va ni pomete nga ditshunzulu da tinombe;
va txi tura nga mndilo wu ku hagari ka mipa,
aniko ani ni va xute ngu ditina da Mkoma.
13Va ni susumetile ngu mtamo kasiku ni txi wa,
aniko Mkoma a tile e ta ni vhuna.
14Ani na bonga Mkoma a ni ningako mtamo;
ene i Muhanyisi wangu!
15Matendani ka vale vo lulama
ku ni dipswi da kutsaka ka hombe ka kuhanyisa;
“Dianza da txinene da Mkoma di hi hanyisile,
16dianza da txinene da Mkoma da xamalisa;
dianza da txinene da Mkoma di ni hanyisile!”
17Kha ni na mbi fa, aniko ni na hanya
kasiku ni xawutela mithumo ya Mkoma!
18 Mkoma a ni tsayisile,
aniko kha ni leka ni txi fa.
19Tulelani matimba a Nyumba ya Txizimu,
ni lavako kuwulela ni dhumisa Mkoma!
20Atxiya ngu txona txike txi yisako ka Mkoma;
valulami ngu vona va wulelako ngu ka txona.
21Na ku bonga, Mkoma,
nguko u ni xamute,
awe u Muhanyisi wangu.
22Dirigwi diya vaaki va ngadi nyenya
di mahile dirigwi da hombe do tsanisa.
23Totshe tiya ti mahwa ngu Mkoma;
ndimhaka to xamalisa masoni kwathu!
24Adiya i ditshiku da kuxula ka Mkoma:
He embeleleni hi giya masoni kwakwe!
25 # Wona ni ka: Mat. 21:9; Mar. 11:9; Joh. 12:13. Mkoma, ha kukombela, hi hanyise!
Ha kukombela, Mkoma, hi ninge kuxula!
26 # Wona ni ka: Mat. 21:9; 23:39; Mar. 11:9; Luk. 13:35; 19:38; Joh. 12:13. A na dhumiswe awu a tako
ngu ditina da Mkoma!
Athu ha kudhumisa hi di
Nyumbani ka Mkoma!
27 Mkoma ngene i ku Txizimu, ene ngene a hi woningako!
Khatani kumaha mibuso, mi txi longoloka
mi di ñote matshanzu, kala kuhoka txiluveloni.
28Awe u Txizimu txangu, se ani na ku bonga;
awe u Txizimu txangu,
ani ni na huwelela wuhombe wako.
29Dhumisani Mkoma, nguko ene mbwamnene,
nguko lirando lakwe la simama kala kupinduka.
Currently Selected:
Masalmo 118: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
