Mavingu 11
11
1Txikalo txo dyelela wa txi venga Mkoma, aniko mpimo wo lulama wa mtsakisa.
2Ku txi ta kutikulisa, ti nata ni tona tingana; aniko avale vo ti veka hahatshi, va ni wutxhari.
3Kuthembeka ka vale vo lulama ku na va tsimbitisa, aniko wuhambunyeti wa sindaka-milayo wu na si haxula.
4Thomba kha yi na txivhuno ka ditshiku da kuhenya ka Mkoma, aniko kululama ka txhatxhisa kufani.
5Kululama ka m'thu wa ditshuri ku na lulamisa nzila yakwe, aniko awule wo biha a na wiswa ngu wubihi wakwe.
6Kululama ka vale vo kateka ku na va txhatxhisa, aniko avale i ku vabihi va na manwa ka wubihi wawe.
7A txi fa m'thu wule i ku muonhi, ni themba yakwe yi fite, ni themba ya wubihi ya mwalala.
8M'thu wo lulama wa txhatxhiswa kuxanisekani kwakwe, se muonhi e sala wukhaloni kwakwe.
9Mkanganyisi a haxula mwakelani wakwe ngu txisofu, aniko vo lulama va txhatxhiswa ngu wuzivi wawe.
10Didhoropa di tsakisa ku ti ni vo lulama; se ku txi lova vaonhi ku ni kutsaka ka hombe.
11Ngu kukatekiswa ngu vo lulama, da tsaka didhoropa, aniko da haxulwa ngu txisofu txa vaonhi.
12Awule a txhipisako mwakelani wakwe mbwo pwata wutxhari, aniko awule a ku ni mapimo o malala.
13M'thu wa txibwebwe wa humisa txihunja, aniko awule a ku ni moya wo thembeka wa fenengeta mahungu.
14Ku si nga ni wuthangeli wo txhariha, vathu va wa, aniko ku di ni valayeli vavangi, ku ni kutsana.
15Kha ditshuri a na xaniseka wule a ti rwekako mnandu wa mkwawe, aniko awule a nyenyako maguwa, a na tsana.
16Wamsikati wo tsakisa wa xayisa kudhundeka, kufana ni vale i ku tindena va xayisako tithomba tawe.
17M'thu wa wunene wa mahela wunene moya wakwe apune, aniko awule i ku txigevenga wa xanisa nyama yakwe apune.
18Muonhi a amukela hakhelo ya wukanganyisi, aniko ka wule a phayako wululamo, ku nava ni hakhelo ya yinene.
19Nga kule wululamo wu yisako kuhanyani, ngu toneto awule a londisako to biha wa ti yisa kufani.
20Avale va timbilu to biha njinyenyeko ka Mkoma, aniko avale tinzila tawe i ku tinene, va mtsakisa.
21Wo biha hambi a txo pata dianza ka dianza, kha na mbi huluka kutsayiswa, aniko liveleko la vo luluma li na huluka.
22Kufana ni disinda da nzalama thonvuni ka khumba, ngu nga toneto wamsikati wo tshura a txi hambana ni ditshuri.
23Vathu vo lulama va navela wunene dwe, aniko themba ya vaonhi ngu kuhenya.
24Vaho vale va hangaliselako, aniko ve engetelwa kambe; ni vamwani va sengeletelako kupinda fanelo, aniko ve luzekelwa ngutu.
25Moya wa wuha wu na ena, ni wule a theletelako mati, nene a na theletelwa.
26Awule a sengeletako fulaho wa ruketelwa ngu vathu, aniko kukateka ku nava ha msungo ka mxavisi.
27Awule a xotako wunene i di ngadi mixo wa ti lavela kusizeka, aniko ka wule a lavako wubihi wu nata txitimwi kwakwe.
28Awule a thembako ka tithomba takwe a na wa, aniko vo lulama va na fana ni mwasi wo nakana.
29Awule a khulumetelako mwaya wakwe, thomba yakwe ngu moya, se txiphukuphuku txi na thumela wule wa mbilu yo txhariha.
30Mihando ya m'thu wo lulama mndonga wa wutomi, se wule a manako mihefemulo a txharihile.
31 # Wona ni ka: 1 Ped. 4:18. Wona taku m'thu wo lulama wa tsayiswa ha mafuni; ngutu-ngutu m'thu wo biha, ni muonhi.
Currently Selected:
Mavingu 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
