Mavingu 12
12
1Awu a randako kukawukwa a randa wuzivi, aniko awule a vengako kulaywa njiphukuphuku.
2M'thu wa wunene a na mana kutsakelwa ngu Mkoma, aniko a na kona m'thu wa mapimo o hambana.
3M'thu kha na mbi tsaniswa ngu ta walo, aniko mitwi ya m'thu wo lulama kha yi na mbi dulwa.
4Wamsikati wamnene m'bhoti ka mwamna wakwe, aniko awule a wisako tingana a fana ni kusina mndani ka marambu akwe.
5Malakanyo a m'thu wo lulama manene, aniko sileleto sa muonhi nzo kanganyisa.
6Mapswi a muonhi ngo riyela kutheketa mnoha, aniko mawombawombelo a vo lulama, ma na va txhatxhisa.
7Vaonhi va na kanganyiswa, kambe va na fuviswa, aniko nyumba ya vo lulama yi na tsana.
8M'mmweyo ni mmweyo a na dhundwa ngu mapimo akwe, aniko awu a ku ni mbilu yo hambana, a na txhipiswa.
9A txhuko wule a ti dhumisako ngu sa sidotho na a di ni sithumi, kupinda wule a ti guletako apune na a txi pwata sakudya.
10M'thu wo lulama a khatalela wutomi wa sifuyo sakwe, aniko wumbilu wa vaonhi mbudayi.
11Awule a dimako mafu akwe a na khura ngu sakudya, aniko awule a londetelako mikara kha nga ni mapimo.
12Muonhi a navela sile si hanyisako vo biha, aniko m'twi wa vo lulama wa ninga mihando ya wona.
13Mlawu wa muonhi wu ka mapswi o hambana a txisofu txakwe, aniko m'thu wo lulama a na huma kuxanisekani kwakwe.
14Mmweyo ni mmweyo a khura ngu mihando ya mapswi a txisofu txakwe, kambe m'thu a na amukela asi si thumwako ngu manza akwe.
15Txiphukuphuku txi ti wona txi di ka nzila ya yinene, aniko awule a engisako sileleto a txharihile.
16Kuhenya ka txiphukuphuku kha ku sweli kuzivaneka, aniko awule wo txhariha wa sisa tingana.
17Awule a wombako ditshuri a kombisa wululamo, aniko fakazi ya makuhu ya kanganyisa.
18Vaho vokari mapswi awe ma ku nga tsoka ya ditxhari, aniko mawombawombelo a txhari mbutomi.
19Mapswi a ditshuri ma na zumba yotshe mbimo, aniko mawombawombelo a makuhu, nga mbimo ya yidotho.
20Wukanganyisi wu mbiluni ka vale va pimiselako to biha, aniko avale va navelelako kuthutha va ni litsako.
21Kha ku na txikarato ni txa tximwetxo txi nota ka wo lulama, aniko vaonhi va taletwe ngu wubihi.
22Txisofu txo womba-womba makuhu, njinyenyeko ka Mkoma, aniko avale va tsimbilako ngu kuthembeka va mtsakisa.
23M'thu wu a ku ni wuzivi wa sisa wuzivi, aniko timbilu ta siphukuphuku ti nuwela wuphukuphuku.
24Manza a vale va wunene ma na thangela vamwani, aniko vakanganyisi va na va sithumi.
25Kuvilela ka mbiluni ka gomisa m'thu, kambe mapswi amanene ma mtsakisa.
26Mlulami mtsimbitisi wa mwakelani, aniko nzila ya vaonhi ya va maha ve timela.
27M'thu wu i ku mkara a tandeka ni kubawula txile a nga daya, aniko thomba ya yinene ya m'thu ngu wunene.
28Ka nzila ya wululamo ku ni wutomi, ni nzilani ka kuthuma, kha ku nga ni lifo.
Currently Selected:
Mavingu 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
