Nehemiya 6
6
Makungo o wukela Nehemiya
1Ku to maheka kambe ti taku, Sambalati, Tobhiya, Geseni, muarabhi, ni vamwani valala vathu, va di pfite ti to ani ni akile diguma, ni ti to ka dona kha ku na lisoko lo kari, hambi ku ka mbimo eyo ni sanzi kuvekela matimba ha sikeni. 2Sambalati ni Geseni va to rumela m'biko, va txi kha vona: Ngono hi ta tshangana sidhoropanani ka mkova wa Ono. Aniko vona va ti ti lava kuya ni maha ta walo. 3Se ni to rumela mitumi ni txi khani:
Kha ni na mbi ta, nguko ni ni mthumo wa hombe ni wu mahako. Ni nga emisela txani mthumo wuwa, ngu kuwuleka ni txi ta kwanu kani?
4Se ngu mamahelo eyo va to ruma vathu ve ta kwangu mune wa makhambi, ngu kumaha keto ni to va xamula.
5Sekoko ngu mamahelo oneyo, ngu mbimo ya wutxhanu, Sambalati a to ni rumela mfana wakwe, ni dipapilo di ti tutwe, manzani kwakwe. 6Se ka dona ku ti bhatwe tiya:
Ku pfate hagari ka vathu ni ka Geseni kuwombwa tito, awe ni Vajudha mi lava kumaha txigirimuka, nguko mi akako diguma; niku awe u ti maha mfumeli wawe, madingano ni kuwomba ka mapswiyo; 7ni ku u vekile vaprofeti kasiku ve womba-womba ngu ngawe kona Jerusalema va txi kha vona: Awuwa ngene mfumeli wa Judha. Sekoko mhaka yiya yi na pfiwa ngu mfumeli, madingano ni mapswi awa; ngono koko, konkuwa, hi ta bhula kumweko.
8Sekoko ni to rumela mtumi kuya m'gela tiya:
Kha ka humelela txilo ka totshe ti u ti wombako, aniko awe, wo ti pimisa mbiluni kwako.
9Nguko votshe va ti lava ku ni dhukisela, va txi kha vona: Manza awe ma na leka mthumo, se mthumo kha wu na mbi tsimbila.
Konkuwa koko, awe Txizimu, tsanisa manza angu.
10Se mbimo yile ni nga wulela m'tini ka Semaya, mwana Dhelaya, mwana Meyetabheli (a nga ti khotetwe), a to khene:
A hi tsimbile hotshe Nyumbani ka Txizimu, hagari ka dithepele, hi ya vhala matimba a dithepele; nguko va lava ku ta ku daya: Ngu ditshuri, va nata ni wusiku ve ta kudaya.
11Aniko ni to khani:
M'thu wo fana ni nani a nga tutuma kani? I mani a kuho wo fana ni nani, a wulelako dithepeleni e hanya kani? Ngu mamahelo eyo, kha ni na mbi wulela.
12Se ni to pimisa ni wona ti taku, kha rumwa ngu Txizimu; aniko a to womba wuprofeti wo ni wukela, nguko a ti xavilwe ngu Tobhiya ni Sambalati. 13Ngu toneto, va to mxava, kasi ku e ni dhukisela, ni maha toneto, ni ku ni onha, ve mana mhaka yo ni tokometa ngu yona, ni ku ni xanisa.
14Awe Txizimu txangu, alakanya Tobhiya ni Sambalati, madingano ni mithumo yiya, ni mprofeti wa txisikati Nowadhiya, ni vamwani vaprofeti, va nga ti lava ku ni dhukisela.
Ka gwita kuakwa ka maguma
15Sekoko diguma di to guma ngu ditshiku da magumi mambidi ni mtxhanu, ka mtxima wa Eluli, ngu mtxhanu wa magumi a masiku ni mambidi. 16Se ku to maheka tito, va di ti pfite valala vathu votshe, ni votshe vamatiko, vale va nga ti hi ranganyetile, va to dhuka, ve godhola ngutu masoni kwawe; nguko va ti zivile ti to Txizimu txathu ngu txona txi nga maha mthumo wuwa.
17Kambe, ka oneyo masiku, sikhumukani sokari sa ka Judha, si to bhala mapapilo amangi, o ya ka Tobhiya: Se mapapilo a Tobhiya ni ona, ma ti tiya kwawe. 18Nguko vavangi va ka Judha, va ti mxambanyete, nguko i ti ti mwane wa Sekaniya, mwana Arahi; se mwanana wa kona Jowanani, a ti ti tekile mwana Mesulami wa dihorana, mwana Bherekiya. 19Kambe wunene wakwe, va ti wutshanza masoni kwangu, se mapswi angu va txi ma yisa kwakwe; ngu kumaha keto, Tobhiya, a ti bhala mapapilo kasi ku ni dhukisela.
Currently Selected:
Nehemiya 6: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
