Nehemiya 5
5
Kudyelwa ka sisiwana
1Sekoko vathu va ditiko ni vavasikati va to wukela Vajudha, vanawe. 2Nguko ku ti ni va va nga ti ti kha vona:
Athu ni vanana vathu va majaha, ni vanana vathu vamahorana hi vangi; ngu toneto hi ningeni fulaho, kasi ku hi txi dya hi hanya.
3Kambe ku ti ni va va nga ti ti kha vona:
Tithembwe tathu, mivhinya yathu ni tinyumba tathu hi lombisile, kasi ku hi txi teka fulaho ka nzala yiya.
4Kambe ku ti ni va va nga ti ti kha vona:
Hi tekile male yi hi nga lomba, hambi male ya nduwo ya mfumeli, hi tsanisa ngu tithembwe tathu ni mivhinya yathu. 5Konkuwa koko, nyama yathu yi fana ni nyama ya vanathu, ni vanana vathu va fana ni vanana vawe; se wonani ti to hi tekile vanana vathu va mazambi ni vanana vathu vamahorana hi va maha tikhumbi, hambi vamwani va vanana vathu vamahorana va tekilwe ve yiswa wukhumbini, kha ku na txi hi nga txi mahako, nguko tithembwe tathu ni mivhinya yathu si manzani ka vamwani.
6Sekoko ni di pfite kudila kwakwe ni mapswi aawa, ni to henya ngutu. 7Se ni to alakanya mbiluni kwangu; ngu msana, ni to lwa ni sikhumukani ni valamuli, ni va gela tiya:
Mmwani ni mmwani a nga bhindule ngu ka mwanawe.
Aniko ni to va rambela msengeletano wa hombe. 8Se ni txi khani:
Athu hi hulukisile Vajudha, madingano ni mtamo wathu, i ku vanathu, avale va nga xaviswa ka vamatiko, se anu kambe mi lava kuxavisa vananu, kasi kuveta xaviswa kwathu kani?
Sekoko va to malala, va txi kayee.
9Ni engeta ni txi khani:
Hi nga ta tinene ti mi ti mahako! Ina kha mi faneli kuthava Txizimu txathu, ngu mhaka ya tingana ta vamatiko, i ku valala vathu, kani? 10Hambi ani, ni vanathu ni vafana vangu, hi va lombile male ni fulaho. A hi lekeni dibhindu diya. 11Na mi kombela, va tshumeteleni nyamsi tithembwe tawe, mivhinya yawe, miolivha yawe ni tinyumba tawe, ni male ya mpimo wa dizana, ni fulaho, ni dosi, ni mtona, asile anu mi va vilako.
12Sekoko va to kha vona:
Hi na vatshumetela, kha hi na mbi lava txilo kwawe, hi na maha madingano ni kuwomba kwako.
Aniko ni to dhana vaphaxeli ni ta va xambanyisa to ve maha madingano ni dispwi diya. 13Kambe ni to zuza nguwo yangu, ni txi khani:
Ngu mamahelo awa Txizimu txi na zuze votshe vathu tinyumbani kwawe ni mithumoni kwawe, avale va si londetiko dipswi diya; va na zuzwe ve sala i di maphanga.
Se wotshe msengeletano wu to kha wona:
Amen!
Aniko va to dhumisa Mkoma, se vathu va to maha madingano ni dipswi diya.
Wunene ni wululamo wa Nehemiya
14Kambe kukhukhela ka ditshiku dile ni nga vekwa kuva mfumeli wa ditiko da Judha, khukhela ka dilembe da magumi mambidi kala ka dilembe da magumi mararu ni mambidi a kufuma ka mfumeli Aritasasta, i ku digumi da malembe ni mamabidi, ani ni vanathu kha ha dya sakudya sa mfumeli. 15Aniko vafumeli vo khata, avale va nga fuma masoni kwangu, va ti ti nemelisela vathu, va txi va tekela sakudya ni vhinya, hahanze ka mune wa magumi a maxekele a silivhela; hambi vafana vawe va ti ti xanisa vathu; aniko ani kha na maha eto, ngu mhaka yo thava Txizimu. 16Ni to simama ni maha mthumo wo longisa diguma diya, hi si xavi thembwe, ni vafana vangu votshe va to ti pata mu ka mthumo wuwa. 17Aniko ha mezani kwangu ku ti khalahatsha 150 wa vavamna, va Vajudha ni valamuli, hahanze ka vale va nga ti ta ngu ka matiko ale ma ku hafuhi ni nathu. 18Se sakudya sa ditshiku dimwani ni dimwani i ti homu yimweyo, ni mtxhanu wa tinvuta ni yimweyo to langelwa; ve lulamisa tikhukhu ni vhinya yayingi ya mixowo yo tala kumweko amu ka digumi da masiku; hambi keto kha na lava sakudya sa mfumeli, nguko mithumo ya vathu vava, i ti ya hombe.
19Awe Txizimu txangu, ni alakanye ka totshe ti ni mahelako vathu vava.
Currently Selected:
Nehemiya 5: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
