Nehemiya 4
4
Valala va Nehemiya
1Se ku to maheka tito, Sambalati a di ti pfite to ha aka diguma, a to tura ngu txiviti, e henya ngutu, aniko a to tseketsela Vajudha. 2Se a to womba masoni ka vanawe, ni ka dibutho da yimbi da Samariya, a txi khene:
Va maha txani Vajudha va vo pwata mtamo kani? Va nga tumelelwa tona eto kani? Va na maha mhamba kani? Ina va heta kuaka ngu ditshiku dimwedo kani? Ina va na wusa amu ka simbwindinga sa lithulu, marigwi ale ma nga hiswa kani?
3Tobhiya, Muamoni a ti kumweko ni Sambalati, se a txi khene:
Hambi ku va akako, kambe ku txo pinda nyampwe ngu txitimwi ka dona, a na khundumusa diguma dawe do hambwa ngu marigwi.
4Engisa, awe Txizimu txathu, nguko athu va hi eyisa, wisa tingana tawe ha msungo kwawe, u va ningela ti to ve handwa, ditikoni ka wukhumbi. 5U nga fenengete wubihi wawe, kambe si nga pfhutwe masoni kwako sionho sawe, nguko va ku henyisile masoni ka vaaki.
6Ngu kumaha keto, hi akile diguma, ka dotshe diguma, ku to bhiywa hafu ya diguma; nguko timbilu ta vathu ti ti ningetete amu ko thuma.
7Se mbimo yile Sambalati, ni Tobhiya, ni Vaarabhi, ni va ka Amoni, ni va ka Asidhodhe va nga tiengisa taku mthumo wo longisa maguma a Jerusalema wu ya masoni, va to henya ngutu.
8Votshe vava, va to patana ve wukela Jerusalema, ni kuwusa vhilinganya. 9Athu koko hi to kombela ka Txizimu txathu, hi veka muwoneleli, wusiku ni mitshikari, ngu mhaka yawe.
10Sekoko Judha a to khene:
Varwali va gumile mtamo,
kambe lithulu nda lingi,
se athu kha hi na mbi sikota kuaka diguma.
11Valala vathu koko, va to kha vona: Kha va na mbi ziva txilo ngu tiya, hambi kuwona txilo, an'ze kuza hi wulela hagari kwawe, hi va dayela; ngu kumaha keto, hi na maha ti to mthumo wu ema. 12Se ku to maheka taku, va di tile Vajudha vale va nga ti zumba hagari kwawe, va tota hi zivisa digumi da sikhati, va txi ta kha vona, va nata hi wukela ngu ka otshe makhalo. 13Se ni to veka vawoneleli ka makhalo a hahatshi, ngu msana ka diguma ni ka makhalo o guleka; se ni to veka vathu ngu mimwaya yawe, ni matxhari awe, ni tingove tawe, ni malaho awe.
14Se ni to wonisisa, ni khukha ni txi khani ka vathangeli ni ka va thaviseki, ni ka miboti ya vathu:
Mi nga va thaveni; alakanyani Mkoma, wa hombe, wo thaviseka, lwelani vananu, vanana vanu, vasikati vanu, ni tinyumba tanu.
15Se ku to maheka taku, va di ti pfite valala vathu ti taku hi ti zivile, ni ti to Txizimu txi onhile makungo awe, hotshethu hi to tshumelela digumani, mmweyo ni mmweyo ka mthumo wakwe.
16Se ku to maheka taku, kukhukhela ka dona ditshiku dile, hafu ya majaha angu ma ti mu ko thuma, se yimwani hafu yi ti ni tingove, sitxhavangu, malaho, ni sikatawu sa sivhikelo; se vathangeli va ti ngu msana ka yotshe nyumba ya ka Judha. 17Avale va nga ti aka diguma, ni vale va nga ti neha thundu, ni vale va nga ti rwalela, mmwani ni mmwani a ti thuma ngu dianza dimwedo, se dimwani di ti ñote matxhari. 18Se ka vaaki, mmwani ni mmwani a ti ni ditxhari txiwununi kwakwe, ve simama kuaka; aniko m'veti wa mpundu, a ti kumweko ni nani. 19Se ni to womba ka vathangeli ni ka vathaviseki, ni ka miboti ya vathu, ni txi khani:
Mthumo mbwa hombe, kuve athu hi abnanisilwe ngu diguma, hi kule ni kule. 20Ka wukhalo wu mi no pfa diguwa da mpundu, mi na sengeletana kumweko ni nathu koneho; Txizimu txathu txi na hi lwela.
21Hi wu mahisile eto mthumo; se hafu yawe yi ti ni tingove, kukhukhela kugwimbani ka wuronga, an'ze kuwoneka ka tinyeleti.
22Kambe ka yona yile mbimo, ni to khani ka vathu: Mmweyo ni mmweyo a na zumbe ni dijaha dakwe Jerusalema, kasi ku ni wusiku va na va vawoneleli, se ni mitshikari, va na thuma. 23Se ani, ni vanathu, ni majaha angu, ni vawoneleli va va nga ti ni londetela, hi ti si leki syambalo sathu; mmweyo ni mmweyo a ti tsula matini ni matxhari akwe.
Currently Selected:
Nehemiya 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
