Nehemiya 2
2
Nehemiya a txiya Jerusalema
1Ku to maheka koko tito, ka mtxima wa nisani, ka dilembe da magumi mambidi a kufuma ka mfumeli Aritasasta, ku ti ti vekilwe vhinya masoni kwakwe, se ani ni to teka vhinya ni thelela mfumeli; aniko ni si khali kukarateka masoni kwakwe. 2Se mfumeli a to khene kwangu:
Nji txani khohe yaku yi godhola, na kuve khu lwali kani? Ina hi nga kukarateka ka mbilu. Sekoko ni to thava ngutu, 3ni txi khani ka mfumeli:
Hanya mfumeli kala kupinduka! Na lambela txani kukarateka mbiluni, na kuve didhoropa, wukhalo wa mathitha a vatate vangu, wu khundumusilwe, ni matimba a kona ma hisilwe ngu mndilo kani?
4Sekoko mfumeli a to khene kwangu:
U kombela txani konkuwa kani?
Sekoko ni to khongela ka Txizimu txa nzumani,
5ni txi khani ka mfumeli:
Ngako ti txi tsakisa mfumeli, ni kungako txithumi txako wu txi txi tumela masoni kwako, ni kombela ti to u ni rumela ka ditiko da Judha, ka didhoropa da mathitha a vatate vangu, kuva ni txi ya di aketa.
6Sekoko mfumeli a to ni gela a di khalahatshile kumweko ni mfumeli wa txisikati a txi khene: I mbimo muni di no heta dipfhumba dako, ni ku wu na wuya nini kani?
7Ni txi khani kambe ka mfumeli: Ngako ti txi kutsakisa awe mfumeli, ni ninge mapapilo a kuya ma kombisa ka vathangeli va mtxhatuko ka mnambo, kasi ku va na ni tumelela kutshawunyeta kala ni txi ya hoka Judha; 8ni papilo yo ya ka Asafe, muwoneleli wa thembwe ya mfumeli, kasi ku a na ni ninga tiphande to aka ngu tona sike sa mkhokhola, ni ta diguma da didhoropa, ni ta nyumba yi ani ni no zumba ka yona. Se mfumeli a to ni ninga, madingano ni wunene wa dianza da Txizimu, txitimwi kwangu.
9Sekoko, ni to hoka ka vathangeli va mtxhatuko ka mnambo, ni va ninga mapapilo a mfumeli; se mfumeli a ti tirumete kumweko ni nani vathangeli va mabutho ni vagadhi va mahantxhi. 10Se mbimo yile Sambalati, Muhoroni, ni Tobhiya txithumi, Muamoni, va nga pfa ti to ku ni m'thu wokari, a telako ku ta vhuna vanana va ka Israyeli, va to karateka ngutu.
11Se ni to hoka Jerusalema, ni zumba kona masiku mararu. 12Se ni to wuka ni wusiku, ani ni vavamna vokari, kambe kha na gela m'thu a ti Txizimu txangu txi nga ti ti vekile mbiluni ku ni ya ti mahela Jerusalema; hambi txihari ni si nga natxo, hahanze ka txile ni nga ti ti gadhile. 13Se ni to huma ni wusiku ngu Txike txa Mkovani, ngu didhawa da Txisima txa Dragoni ni ngu didhawa da Txike txa Ditalani, ni wonisisa maguma a Jerusalema, a ma nga ti ti khundumusilwe, ni matimba a kona ma nga ti ti hisilwe ngu mndilo. 14Se ni to pindelela ni ya ka Txike txa Txisima kala ka diziva da mfumeli; kambe ku singani wukhalo wo pinda ngu ka wona ni txifuyo txile ni nga ti ti gadhile. 15Sekoko ni wusiku ni to kwelela ngu txinambwanani ni ya wonisisa diguma; ni wuya, ni ta wulela ngu Txike txa Mkovani.
16Aniko vafumeli kha va kuziva mu ni nga ti yite kona, hambi ti ni nga ti maha tona; nguko ni sanzi kuwomba txilo ka Vajudha, hambi ka vaphaxeli, mwendo ka vafumeli, ni votshe vale va nga ti ka mthumo wa kona, va si zivi txilo.
17Sekoko ni to va gela ku khani: Ma wu wona wusiwana wu hi ku ka wona, aku Jerusalema a nga khundumuswa, ni matimba a kona ma nga hiswa; ngonani hi ta aketa diguma da Jerusalema, kasi ku hi si zumbi kambe tinganani.
18Sekoko ni to va gela nga ha dianza da Txizimu txangu di nga ni mahela wunene, ni mapswi ale mfumeli a nga ti ma wombile kwangu. Sekoko va to kha vona: Ahi khukheni hi aka! Se va to ti ningetetela kumaha mthumo wa wunene.
19Se mbimo yile a nga tiengisa Sambalati, Muhoroni, ni Tobhiya, txithumi txa Muamoni, ni Gesemi, Muharabhi, va to hiseka, ve hi txhipisa, va txi kha vona: Nda txani tona ti mi mahako kani? Mo lava kuwukela mfumeli kani?
20Sekoko, ni to va xamula ni txi khani: Txizimu txa nzumani, ngu txona txi no hi humelelisa; se athu sithumi sa txona, hi na khukha hi aka; kambe anu kha mi na txyavelo, hambi fanelo, ni txyalakanyiso amu Jerusalema.
Currently Selected:
Nehemiya 2: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
