Jobe 9
9
Xamulo ya Jobe
( Sipimo sa 9 ni 10)
I mani a nga duketako kuphikizana ni Txizimu kani?
1Sekoko Jobe a to xamula a txi khene:
2 # Wona ni ka: Job. 4:17. Ngu ditshuri na tiziva taku ngu toneto;
m'thu a nga ti emelisa kutxani ka Txizimu kani?
3Ngako u lava kulwa ni Txizimu,
hambi tximwetxo ha ka 1.000 wa so maha,
kha txi na mbi kuxamula.
4Txizimu txi ni wutxhari mbiluni,
txona i nyamitamo ngutu;
i mani a nga ti bangisa ka txona, e mana kuthutha kani?
5Txizimu ngu txona txi rurisako mimango,
se tisika ta yona ti zinginika, yi si ti pfi, mndani ka kuhenya ka txona;
6atxile txi thavisako mafu ka wukhalo wa ona,
se tiphande ta ona ti txi zinginika;
7txi wombako ka ditambo, se dona di si humi;
kambe txi tsivela tinyeleti;
8atxi txokha txi gwimbako nzuma;
kambe txi tsimbilako txitimwi ka linene;
9atxi txi nga va nga Txingwingwi, Nyezi,
ni Tinyeleti ta mtxhanu ni timbidi,
ni sotshe so tshima sa Wuphemba.
10Atxi txi vangako silo sa hombe, si si kotekiko kubalwa,
ni sixamaliso saku kha si txhamuseleki.
11Txizimu txa pinda ngu masoni kwangu, ni si txi woni;
se txi tshumela, kambe kha ni txi pfi.
12Txa guleta txo maha;
i mani a no txi maha txi txi tshumeta kani?
I mani a no txi gela ku khene: Wo maha txani kani?
13Txizimu kha txi na mbi leka kuhenya ka txona;
hahatshi ka txona, va nama votshe vavhuneteli va mabava.
Ni walo mnandu, ni lulamile
14Ni nga sikotisa kutxani ku txi xamula ani kani?
Mwendo kusawula mapswi o womba masoni ka txona kani?
15Hambi i tiku no va wo lulama masoni ka txona, nga ni si txi xamuli;
kukhata, ka mlamuli wangu, ni ndi na kombela wumbilu.
16Hambi i ti ku no dhana, Txizimu, txi ni xamula, hambi keto,
ni si kholwi ti to txi engisa dipswi dangu.
17Nguko txa ni phatulela ngu txihuhuri,
kambe txi engetela silonda sangu ku si na txivangelo.
18Txizimu kha txi ni tumeli ni kuhefemula;
aniko txa ni tata ngu kubava.
19Se ngu mule ka mitamo, txona txi ni mtamo;
se amu ka kulamula, i mani a nga ni fananisako natxo kani?
20Ngako ni txo ti emela,
txisofu txangu txi na ni kona;
ngako ni txo ti womba mlulami, ni na nuwelwa wubihi.
21Hambi ni ti hetisekile, kha ni thembi dihika dangu;
na txhipisa dipswi dangu.
22Ngu toneto, mhaka ngu yiya;
ani ni khani txa fuvisa wo lulama ni m'bihi.
23Txi daya kukwapwa ngu txikuluveta,
sekoko txa seka kutiemela ka vo mbi na mnandu.
24Mafu ma ningetwe manzani ka m'bihi;
Txizimu txa fenengeta tikhohe ta valamuli;
ngako i si nga txona koko, se i mani kani?
Txizimu kha txi kholwi taku ni walo mnandu
25Masiku angu ma tutuma ngutu kupinda nyalivilo;
ma tutumile, kha ma zivi ka nga wona wunene.
26Ma pinda kufana ni sitimela sa matanga,
kufana ni digama di ti rinzako ka mpfimba.
27Ngako ni txo khani: Ani ni na leka kutitsetsa kwangu
ni na txitxa khohe yangu, ni kombisa kutsaka.
28Na thava kupanda kwangu,
nguko na tiziva to khu na mbi ni maha wo mbi na mnandu.
29Se ngako i ku ani m'bihi,
ni na thumela txani walo kani?
30Hambi ni nga samba ngu mati a hunguva,
ni sawulekisa manza angu ngu sephu.
31Ni ka toneto, Txizimu txi na ni pfhokometa madhakani,
se syambalo sangu sipune si na ni nyenyeza.
32Nguko txona hi nga m'thu kufana ni nani,
awu ani ni txi mxamula, ni kuya lamulwa.
33A walo wo ema hagari kwathu,
wo a nga veka dianza txitimwi kwathu vavambidi.
34Txizimu txi na thavise ndonga ya txona txitimwi kwangu,
kambe ni nga dhukiswe ngu kuthisa ka txona.
35Sekoko ni na womba-womba, kambe kha ni na mbi thava;
nguko konkuwa, kha ni nga ni tangu.
Currently Selected:
Jobe 9: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
